Xukuumadda Rayaale Waa
U Caado In Marka Ay Doorasho Soo Dhawaato si gardarro ah U
Xidhxidho Siyaasiyiinta Xisbiga
Guddoomiyaha Xisbiga Mucaaridka ah ee KULMIYE Md. Axmed Maxamed
Maxamuud (Axmed-Siilaanyo),ayaa sheegay in Xukuumadda Madaxweyne
Rayaale marka ay doorasho soo dhawaato ama jirto hawl Qaranku
leeyahay oo laga wada qayb-qaadanayaa ay caadaysatay eedayn iyo
xadhig xaq-darro ah oo ay Masuuliyiinta sar-sare ee KULMIYE kula
kacdo.Isla markaana, waxa uu si weyn u cambaareeyay xadhiga
Cabdirashiid Ducaale Qambi oo ah Sarkaal Xisbigiisa ka tirsan oo
Jimcihii dhawayd Booliska Magaaladda Hargeysa ay Xabsiga u taxaabeen.
Guddoomiyaha KULMIYE Axmed-Siilanyo, waxa uu sidaa sheegay mar uu
maanta Warbiihinta ugu waramayay Madaarka Magaaladda Hargeysa,
halkaas oo isaga iyo Wefti KULMIYE ka tirsan oo uu hogaaminayaa ka
ambabaxayeen, kuwaasoo u kicitimay Magaaladda Nayroobi ee xarunta
dalka Kiiniya. Guddoomiye Siilaanyo oo safarkiisan ay ku weheliyeen
Guddoomiye Ku-xigeenka 2-aad ee Xisbiga KULMIYE Cabdiraxmaan
Cabdiqaadir iyo xubno kale. Isla markaana waxa uu Siilaanyo ka
waramay ujeedada socdaalkooda, xidhiidhkka ka dhexeeya Safarkooda
iyo Safar Wasiiro Xukuumadda ka tirsani ku tageen Jabuuti oo ay isku
diyaarad ahaayeen iyo sidoo kale arrimaha doorashooyinka soo socda,
kalsoonida komishanka doorashooyinka iyo qodobo kale oo muhiim ah.
Ugu horeyn Guddoomiye Axmed Maxamed Maxamuud (Siilaanyo) oo ka
hadlayay ujeedada socdaalkooda waxa uu yidhi, “Nayroobi ayaanu
tagaynaa, waxaanu u tagaynaa dadka taageerayaasha ah iyo ciddii kale
ee aanuu aragno ka dhaadhicino qadiyadda Somaliland iyo ta
Xisbigayaga-ba.”
Axmed Siilaanyo oo ka jawaabayay su’aal laga waydiiyay, in isaga iyo
Weftigiisu ay Jabuuti ku sii hakanayaan wakhtigan, waxa uu yidhi,
“Imika socdaalkayagani waxa uu ku jeedaa Magaaladda Nayroobi ee
xarunta dalka Kiiniya, Jabuuti iyo Itoobiya-ba imika waanu
siimaraynaa oo marinkayaga ayaa ah, ee uguma socono Safar ahaan.
Laakiin, Insha Allaahu wakhti aan dheerayn waanu tegi doonaa iyagana.”
Sidoo kale, Guddoomiyaha KULMNIYE, mar la waydiiyay in ay Nayroobi
kula kulmayaan kaliya taageerayaasha Xisbigooda halkaa ku sugan iyo
inay Masuuliyiinta Kiiniya la kulmayaan, waxa uu ku jawaabay oo uu
yidhi, “Inkasta oo aanu taageerayaashayada u tagayno, haddana dabcan
ama dawladda Kiiniya ha noqoto ama ciddii kale ee munaasib ah ee
noola muuqata munaasib, waanu arkaynaa, qadiyada Somaliland iyo
taayadana waanu kala hadlaynaa haddii Illaahay yidhaahdo.”
Guddoomiyaha Xisbiga Mucaaradka ah ee KULMIYE Axmed Maxamed Maxamuud
(Siilaanyo), waxa wax laga waydiiyay ujeedada Wefti KULMIYE ka
tirsan oo maalmahanba dalka Jabuuti ku sugnaa, waxaanu taa kaga
jawaabay Siilaanyo oo uu yidhi, “Kaasina waxa weeye mid
saaxiibtinimo ah oo Xubno Xisbiga ka tirsani ay sidooda ugu tageen
Jabuuti, dabcan dhulkaana taageerayaal waanu ku leenahay. Markaa
maaha Wefti rasmi ah ee waa Wefti saaxiibtinimo ah.”
Wefti Wasiiro ah oo ka socda Xukuumadda Somaliland, ayaa iyaguna
isla galabta ka dhoofay Madaarka Hargeysa, kaas oo Weftiga KULMIYE
ay isku diyaarad raaceen. Haddaba, Axmed-Siilaanyo oo la waydiiyay
xidhiidhka ka dhexeeya labada Wefti, waxa uu ku jawaabay, “Waxay
illa tahay Weftiga dawladdu meesha uu doono ayuu u bixi karaa, ee
waanu isku beeganay uun ee wax xidhiidh ah oo labada Wefti ka
dhexeeyaa ma jiro. Laakiin, waa iska caadi in dawladduna ay socoto,
Xisbigayaguna meeshii cidi ka joogto uu siyaarto.”
“Wakhti xadidan oo aanu u goynay ma jiro, laakiin kolay wakhti dheer
noqon maayo, Annaga oo mar walba maskaxda ku hayna. Halkaa haddaan
eray ka idhaahdo, waxaan jecelahay inaan hoosta ka xariiqo, waatan
diiwaan-gelinti ay dhamaatay caam ahaan, wakhtigii doorashaduna wuu
soo dhawyahay. Markaa waxaan jecelahay in aanu xooga aad u saarno,
inaan marnaba ajandihii iyo wakhtigii loo dhigay doorashada wax laga
bedalaa jirin ee ay doorashadu sideedii ku soconayso, oo aan wax
talaabooyin ah ama jalaafooyin ah aan Maamulka dawladda iyo cid kale
toona u dhigin. Arrinta diiwaan-gelintu waa arrin runtii loo baahnaa,
dalku fuliyay oo si fiican loo fuliyay, waana wax sideeda u taagan,
laakiin mar walba shardi uma aha in ay diiwaan-gelintu doorashada is
hortaagto. Waxaananu rajaynaynaa inaan doorashada iyo
barnaamijkeedii wax iska bedalaa jirin.”
Guddoomiyaha KULMIYE mar uu ka hadlayay kalsoonida xubnaha
Komishanka doorashooyinka Qaranka Somaliland, waxa uu yidhi,
“Komishanka doorashooyinka Qaranka waanu ku kalsoonahay, Xubnaha
Komishanku waa xubnihii loo doortay ee sharciga ahaa, wakhtigan
imika la joogo oo doorashadii in yari ka hadhay, waxay illa tahay,
in Hay’adaha qaranka oo dhan, haddii Axsaab la yahay, komishan la
yahay iyo haddii dawlad la yahay-ba layska kaashado sidii hawshaa
qaranka ee dimuquraadiyada dalku ay ku dhisan tahay, doorashadu si
xalaal ah u dhacdo, Annagu waxaanu diyaar u nahay in aanu la
shaqayno Guddiga doorashooyinka iyo ciddii kale ee ku shuqul leh-ba.”
Axmed Siilaanyo, oo la waydiiyay sida uu u arko xadhigii ay
Xukuumadda Madaxweyne Rayaale Jimcihii doraad Xabsiga ku dhigtay
Cabdirashiid Ducaale Qambi oo wakhtigan ka tirsan Xisbiga KULMIYE
iyo eedaynta loo jeediyay ee ah in uu ka dambeeyay shaqaaqadii
Buuhoodle ka dhacday sida ay wax ug jiraan waxa uu yidhi,
“Arrintaasi waa arrin aad iyo aad u fool xun oo aanu si buuxda u
dhaleecaynayno. Caado ayay u tahay dawladda marka ay doorasho soo
dhawaato iyo marka ay siyaasiyan soo baxdo hawl qaranka ka
dhaxaysaa, inay had iyo goor eedaha yimaada ay iska saaraan si
gardarro ah, dabadeedna u maraan dariiq aan sharci ahayn oo Ashqaas
muuqata oo Xisbiga Kulmiye ka tirsan Xabsiga loo taxaabo, sidii
kuwii hore. Arrintaa waxaanu u aragnaa mid xaqdaro ku dhisan,
waxaanu u aragnaa mid sharciga gef ku ah, waa mid aanaan qaadanayn
oo aanu aad iyo aad uga xunahay oo waanu cambaaraynaynaa.
Hadhwanaagnews
|