Xukuumadda Somaliland Oo La Sheegay In Ay Ciidamo Dul Dhigtay Shirka
Beelaha Sacad Muuse Ee Agabar
Dadweynaha ku dhaqan degmada Agabar oo fidiyey go-gosha Shirka
Beelaha Waqooyiga iyo Galbeedka
Hargeysa (TNN):-wararka naga soo gaadhaya degmada Agabar ee gobolka
Gabiley ayaa sheegaya in Xukuumada Somaliland ay ciidamo xoogan
dul-dhigtey degmadaasi, halkaasi oo lagu wado in maalmaha soo socda
uu ka furmo shirweynaha beelaha Sacad Muuse.
Sida ay noo xaqiijiyeen qaar ka mid ah dadweynaha ku dhaqan
Magaalada Agabar iyo sidoo xubnaha guddida qabanqaabada shirka loogu
magac daray HOODAALE ee beesha Sacad Muuse ayaa sheegaya in ay
xukuumadu dul-dhigtey degmadaasi Agabar ciidamo tiro badan, si ay u
kala daadiyaan ama u bur-buriyaan shirweynaha goobtaasi ka
qabsoomaya.
Dhinaca kale, Taliyaha qeybta ciidanka Booliska Gobolka Gabiley iyo
ciidan uu watay ayaa la sheegay in ay soo dul-degeen xalay degmada
Agabar, waxaanay dadweynaha deegaankaasi xukuumada ku eedeeyeen inay
faro-gelin toos ah ku hayso car-qaladeynta qabsoomida shirweynaha
beelaha Sacad Muuse, kaasi oo sida uu qorshuhu ahaa la filayay inuu
Axada todobaadkan ka furmo halkaasi.
Dadweynaha ku dhaqan degmada Agabar oo fidiyey go-gosha Shirka
Beelaha Waqooyiga iyo Galbeedka Hargeysa ayaa la sheegay inay si
weyn uga cadhoodeen Ciidamada ay xukuumadu dul-dhigtey shalay iyo
xilka qaadista lama filaanka ah ee lagu sameeyey guddoomiyihii
degmadaasi,Waxaanay ku doodeen inay xukuumadu faro-gelin qaawan ku
hayso habsami u qabsoomida shirweynahaas oo loo bixiyey HOODAALE.
Waxa kale oo ay xuseen guddida qaban qaabada shirkaasi in ciidamada
la dul-dhigay tahay hadidaad loogu-talagalay in lagu waxyeeleeyo
shirka beelaha Sacad Muuse.Sidoo Kale, Badhasaaabka Gobolka Gabiley
Md. Yuusuf Ibraahim Geedi ayaa xilka ka qaaday shalay guddoomiyihii
degmada Agabar Axmed Yuusuf Jaamac (Axmed Dheere), kadib markii sida
la sheegayuu amar ku saabsan talaabadaas uu ka helay madaxda sare ee
Dawlada Somaliland.
Arrintan ayaa ku soo beegantey wakhti qaban-qaabada shirweynaha
beelaha Sacad Muuse ee HOODAALE laga dareemayo guud ahaan Somaliland
oo lagu sii qul-qulayo degmadaasi si shirka looga qeybgalo, ayey
hadana xukuumadu hawlaheeda iska wadataa.
Lama garanayo waxay xukuumadu ka dhex urisay shirweynaha beelaha
Sacad Muuse, iyada oo ay hore u jireen beelo shirar noocaan oo kale
ah qabsaday,kaas oo ay kaga tashanayaan aayahooda mustaqbal iyo isku
xidhnaantooda.
Timacade News Desk
Hargeysa,Somaliland
|