Xukuumadda oo xabsiga ka siideysey
Xirsi Cali X.Xasan iyo
Abshir Xasan Xaashi
Xukuumadda Daahir Riyaale ayaa xabsiga ka siideysey
Guddoomiyekuxigeenkii hore ee Komishanka Doorashooyinka Qaranka,
Xirsi Cali X. Xasan iyo Abshir Xasan Xaashi oo labaduba u xidhnaa
arrimo siyaasadeed.
Guddoomiyekuxigeenkii hore ee Komishanka Doorashooyinka, Xirsi Cali
X. Xasan waxay ciidamada Boolisku ka soo qabteen tuulada Magaala-yar
oo bariga ka xigta magaalada Burco 03 August, 2008, waxaana la
siidaayey maanta oo taariikhdu tahay 03 Sept. iyada oo aan maxkamad
la horgeyn.
Xirsi markii boolisku qabtay waxay xukuumaddu ku eedaysay in uu ku
lug lahaa baabuur xukuumaddu sheegtay in madaxa laga jaray si qoryo
loo saaro iyo maleeshiyo ay tilmaantay inay isku urursanayaan
deegaamo ka tirsan Bariga Burco, iyada oo Wasiirka Arrimaha Guduhuna
uu warbaahinta u sheegay inay hayaan caddaymo in Xirsi uu xidhiidh
la leeyahay ururka Al Shabaab ee ka dagaalama magaalada Muqdisho iyo
Soomaaliya oo ku jira liiska Argagixisada Maraykanka.
Waxaana la siidaayey iyada oo aan maxkamad la horgeyn, si loogu
caddeeyo dembiga loo xidhay iyo eedaymaha Wasiirka Arrimaha Guduhu
sheegay.
Xirsi Cali X. Xasan oo galabta saxaafaddu la xidhiidhay, waxa uu
sheegay in la siidaayey, balse, aanu garanayn waxa lagu xidhay iyo
sida lagu siidaayey midna.
Hase yeeshee, wararku waxay sheegayaan in lagu siidaayey amar Daahir
Riyaale bixiyey, kaas oo ka dambeeyey wadahadal uu la yeeshay
odayaal ka socdey beesha Xirsi.
Sidoo kale, Abshir Xasan Xaashi, darawalkii hore ee Marwada Daahir
Riyaale, marwo Huda Barkhad, isla markaana ahaa madaxa gaadiidka
Madaxtooyada intii ka horreysey dabayaaqadii 2006 ayaa isagana saaka
laga siidaayey Jeelka Mandheera oo ku xidhnaa muddo 4 bilood ah,
iyada oo aan marna wax maxkamad ah la horgeyn.
Abshir Xasan waxa uu boolisku qabtay badhtamihii April 2008, kadib
markii muddo dheer ay ku dabajireen iyaga oo ka daba joogey hadal uu
siiyey Saxaafadda oo uu ku difaacayey suxufiyiinta Wargeyska Haatuf
oo u xidhnaa maqaal ay ku daahfureen musuqmaasuq uu ku lug leeyahay
qoyska Daahir Riyaale ee Madaxtooyada Somaliland, isla markaana uu
ku soo bandhigay caddaymo ku saabsan musuqmaasuqaas.
Abshir, sidoo kale, maxkamad lama horgeyn, lamana garanayo qaabka
loo siidaayey.
“Saaka subaxnimadii ayaa gaadhi boolisku leeyahay la igaga soo
qaaday Jeelka Mandheera ee aan ku xidhnaa, waxaana la I geeyey
gurigeyga. Mana garanayo amarka la igu siidaayey cidda bixisay,”
ayuu yidhi Abshir oo aan weydiiyey sida loo siidaayey.
Sidoo kale, Jaamac Maxamed X. Ducaale (Foos) oo ay walaalo yihiin
Wasiirka Arrimaha Dibadda Somaliland, mudane Cabdillaahi Maxamed
Ducaale, isla markaana la sheegay in wasiirka iyo xubno kale oo
qoyskooda ah oo ka tirsan xisbiga UDUB ay u xidheen aargoosi
siyaasadeed oo la xidhiidha Shirkii Gar’adag ayaa isagana la
siidaayey maanta, kadib markii sida la sheegay lagu waayey eedayn
been-abuur ah oo loo sameeyey.
Source:Somaliland.org
|