Xukuumadda oo Bilowday Tallaabooyin ay Kaga Aargudanayso Shaqaalaha Dawladda ee la Saftay Garabka UDUB ee Darawal

Xukuumadda Somaliland, ayaa bilowday tallaabooyin isugu jira hanjabaado iyo caga-juglayn ay kaga aargudanayso shaqaalaha ka hawlgala hay’adaha kala duwan ee dawladda ee lagu tuhmo in la safan yihiin ama gacan-saar la leeyihiin garabka xisbul-xaakimka UDUB ee ka soo horjeestay shirweynihii labaad ee xisbigu ku doortay murrashaxiinta uga qaybgeli doona tartanka doorashada madaxtinimada ee dhowaan dalka ka qabsoomi doonta.

Qaar ka mid ah shaqaalaha dawladda ee tallaabadan aargudashada ahi saamaysay oo Jamhuuriya la soo xidhiidhay shalay, ayaa xaqiijiyey in masuuliyiin sare oo ka tirsan xukuumaddu ugu hanjabeen in shaqada laga caydhin doono ama tallaabo adag ka qaadi doonto haddii aanay ka hadhin taageerada ay siiyaan garabka UDUB ee hoggaamiyaan siyaasiyiinta ku dhawaaqay in Madaxweyne Rayaale kula tartamayaan murrashaxnimada jagada madaxweynaha xisbiga dhexdiisa.

Xubnaha shaqaalaha ee arrintani taabatay oo ka cudurdaartay in magacooda la shaaciyo, ayaa tallaabadaas ku tilmaamay mid u muuqata amar-ku-taagleyn, gef iyo meel-ka-dhac lagu sameeyey xuquuqda aasaasiga ah ee muwaadin ahaan leeyihiin, isla markaana si weyn uga horimanaysa geeddi-socodka hawlaha dimoqraadiyadda ummadda Somaliland ka iibinayso beesha caalamka. Waxa kale oo hawlwadeenadaasi xuseen in tallaabadani jabinayso qodobka qastuurka ee qayaxaya In muwaadika uu cidduu doonayo dooran karo, isna la dooran karo.

Sidoo kale, xukuumadda Somaliland ayaa dhowaan ugu hanjabtay huteellada magaalada Hargeysa in aanay martigelin karin shir ka dhan ah ka UDUB ee hoggaaminayo Madaxweyne Rayaale, iyadoo dastuurku dhigayo in nidaamka suuqa ganacsiga xorta ah oo aan cid gaar loogu xidhi karin.



 

Jamhuuriya Online