Xukuumada
Somaliland oo Beenisay in ay Olole Ka Bilowday Gobollada Dalka
Aniga oo tix-raacaya wararkii ay
saaka wargeysyada qaarkood ku soo qoreen Bogga hore , kuwaasi oo ku
eedeeyay in olole siyaasadeed ay ka bilowday xukuumadu gobollada
dalka.
Wargeysyadaasi oo ka soo xigtay wararkaasi waa sida ay hadalka u
dhigeene, Madaxda Asxaabta Mucaaridka qaar ka mid ah.
Marka hore waxaanu leenahay in wararkaasi ay yihiin kuwo been abuur
ah oo aan sal iyo raad toona lahayn, marka labaad wufuuda Wasiirada
ah ee hadda ku sugan gobollada qaarkood, xukuumaduna ay u dirtay
waxa ay halkaasi u joogaan in ummada ay ku wacyi geliyaan ahmiyada
weyn ee diiwaan gelintu ay u leedahay Qaranimada Somaliland, waana
waajib saaran Xukuumada in ay ka hawl gasho ummada ku wacyi geliso.
Diiwaan gelintu sida aynu la socono waa arrin inagu cusub oo aan
dalkeena hore uga dhicin, waxaana xilka ugu weyni ka saaran yahay
Xukuumada in ay sida ugu haboon uga qabsoomaan diiwaan gelintu
gobollada Somaliland oo
dhan.
Ololaha doorashooyinku waxa ay leeyihiin wakhti cayiman oo loo
qoondeeyay sida ku cad xeerka komishanku ay dajiyeen.
Haddaba, kuwa u hamuumaya ololaha siyaasadeed iyo doorashooyinka
dalka ku soo fool leh, waxa aanu kula talinaynaa in wakhtigeeda ay
sugaan oo aanay ka hor dhicin, haddii kale waxa ay ummada ku
abuurayaan Jaha wareer iyo
Fawdad.
Alla Mahad leh
Siciid Cadaani Mooge
Af-hayeenka Madaxtooyada Somaliland
|