Xubno Guurtida oo
Ganafka ku dhuftay Gudi hoosaadyadii Golaha
Afartan xubnood oo ka mid
Mudanayaasha Golaha Guurtida Somaliland, ayaa dadafeeyay waxba kama
jiraan ku sheegay Guddi-
hoosaadyo uu dhawaan Guddoomiyaha Golaha Guurtida Saleebaan Maxamuud
Aadan (Saleebaan-Gaal). Isla markaana waxa ay Xildhibaanadaasi ku
doodeen in Xeer-hoosaadka iyo Shuruucda Golaha baalmarsan tahay
qaabka uu Guddoomiyuhu u magacaabay Guddigaas.
Xildhibaanadan Guuritda ka tirsan oo sida TV-ga afka dawladda ku
hadlaa caawa baahiyay tiradadooda 40 lagu sheegay, ayaa sida TV-gaasi
baahiyay muuqaal tirayar oo xildhibaano ah laga arkayay, hase
ahaatee, waxa ay sheegeen in ay 40 Mudane ku diidan yihiin qaabkii
uu Guddoomiyaha Golahaas Md. Saleebaan dhawaan u magacaabay
Guddoomiyayaasha Guddi-hoosaadyada Guurtida, xili Goluhu fasax ku
jiro.
Sidoo kale, waxa ay Xildhibaanadaasi ku doodeen, in Guddiga joogtada
ah iyo gudihoosaadyada Golaha uu wax ka bedal ku sameeyay, kuwaasoo
ay sheegeen in uu Gudoomiyuhu kaligii magacaabay, isla mrkaana aan
Golaha laga ansixin. Sidaa daraadeedna, aanay aqoonsanayn wax ka
bedalka uu Guddoomiyuhu Guddiyadaas ku sameeyay, isla markaana aanay
qawl iyo ficli toona ku matali karin Golaha xubnaha uu Magacaabay.
Waxaanay Guddoomiye Saleebaan u soo jeediyeen in uu u hogaansamo
Shuruucda iyo Xeer-hoosaadyada Golaha Guurtida u yaala.
Dhinaca kale, Guddoomiyaha Golaha Guurtida Md. Saleebaan Maxamuud
Aadan (Saleebaan-gaal), oo dhiniciisa Warbaahintu wax ka waydiisay,
doodda Xildhibaanada 40-ka gaadhaya ee gaashaanka ku dhuftay qaabkii
uu dhawaan u magacaabay qaar ka mid ah Guddoomiyayaasha
Guddi-hoosaadyada Golahaas, sida Guddoomiyihii Guddiga joogtada ah,
Guddoomiyihii Guddiga arrimaha bulshada iyo kuwo kale.
Hase ahaatee, Guddoomiye Saleebaan oo ka jawaabayay su’aasha
arrintaa laga waydiiyay iyo shuruuc ahaan kooda saxan, waxa uu yidhi,
"Xildhibaanada aad sheegaysaan 42 inay yihiin iyo inkale waa la
hubsan doonaa, Guddi hoosaadyada xeer ayaa lagu magacaabaa, Anaga
ayaa magacawna, anaa matala Golaha, hadday sidaa yidhaahdeena waxba
kama jiraan hadalkooda." Ayuu yidhi Saleebaan Maxamuud Aadan.
Si kastaba ha ahaatee, Golaha Guurtida ayaa dhawaanahan u muuqda
kuwo mawqif ahaan kala qaybsan, isla markaana ficiltan iyo olole
dhinaca Axsaabta siyaasadda ah ku kala milmay, halkii ay hore u
ahaan ama ugu muuqdeen kuwo dhinac kaliya ka raran. Iyada oo
Guddoomiyaha wakhtigan loo arko mid aan ka turjumayn danta dhinicii
hore uu Goluhu ugu badnaa ee Xukuumadda iyo Xisbigeeda, hase ahaatee,
dhex-dhexaad u ah dhinacyada siyaasadda.
TogdheerNews
|