Xildhibaano Ka
Dhoofay Baydhaba
Xildhibaano ka tirsan barlamaanka soomaaliya ayaa sababo dhinaca
ammaanka uga dhoofay Baydhaba iyadoo ka dagay magaalada Gaalkacyo.
Xildhibaanadan oo tiradoo lagu
sheegay 32 xildhibaan ayaa waxaa la sheegayaa inay u badan yihiin
xildhibaanada ka soo jeeda deeganada Puntland iyo Waqooyiga
Soomaaliya, kabixitaanka magaalada Baydhaba ayaa waxay ka danbeysay
kadib markii halkaasi xalay niman hubeysay ay toogasho ku dileen mid
ka mid ah xildhibaanada Baarlamaanka Soomaaliya oo lagu magacaabo
Xildhibaan Marxuum Ismaaciil Xassan Timir.
Marxuum Timir ayaa manta waxaa lagu aasay magaalada Baydhaba, iyadoo
aaaskiisii ay ka soo qeybgaleen Gudoomiyaha Barlamaanka Soomaaliya
Adan Maxamed Nuur (Adan Madoobe) iyo xildhibaano kale. Adan Madoobe
oo halkaasi hadal ka jeediyey ayaa sheegay inuu ka xun yahay oo ay
nasiib daro tahay dilka xildhibaan Timir.
Magaalada Baydhaba oo haatan ay ku sugan yihiin tiro badan oo ka
tirsan Barlamaanka Soomaaliya ayaa waxaa la sheegay inay jirto cabsi
iyo ammaan daro waqtigan soo wajahday xubnaha Barlamaanka Soomaaliya.
Source:VOA
|