Waxa Sharaf Iyo Karaamo
Mudan Odayaasha Dirta Koonfureed Ee Ku Baaqay!!!
Waxaan marka hore ku bilaabaya
magaca Eebe kor ahaaye. Waxaan salaamaya dadka akhristan dhambaalkan
yididiilada iyo naruurada xambaarsan waxa kale oo iyagana tix galin
mudan tafatirayaasha sii daaya si loo akhristo.
Warka xaley sidii roob gudgude
Raadtv-gu noo keenay
Ee uu rabaqey uunku
Ma runbaa dirta Koonfureedow
Aduun raasamaal ma lehe.
Waxaan sharaf iyo karaamoba mudan odayaasha dirta Koonfureed ee sida
raganimada iyo walaalnimadu ku jirto ugu baaqey in beesha caalamku
aaney indhaha ka qarsan, waxa wanaagsan ee ay qabsadeen dadka ku
dhaqan Somaliland, iyagoo weliba Somalida kale ugu baaqey in intooda
caqli lahi ay qirto waxa ay qabsadeen dadka reer Somaliland.
Waxba yaanu xeerkey i marin,
Xoolana i siine
Xaashe`e nin liban kaa xistiyey
Xumihii waa yaabe.
18 sano sano ayey dadka Somaliyeed ee ku nool koonfurta Somaliya ku
jireen dagaal iyo qalaalase ay ku naf waayeen kumaankun qof, kumaan
kun kalena ay ku bara kaceen, halka kumaankun kalena ay ka
dhuyaaleen dhulkoodii hooyo. Dhibaatada intaa leeg waxaa keliya oo
sababey waa rag caqli gaaba oo dhamaantood ka fikiraya jeebkooda iyo
danahooda gaarka ah. Weli fari kama qodna xal u helida koonfurta
Somalia waxaana sii laba laxaadsanaya khilaafka u dhexeeya imaan
lawayaasha marba shaadh gashanaya ee kolba intii markii hore isku
kooxda aheyd ay u sii kala jajabeyso unugyo iyo ururo is khilaafsan.
Waxaa wax laga xumaado ah in dano shaqsiyaad gaari ay leeyihiin uu
maalin kasta god madow ku sii rido rajadii umada Somaliyeed. Taas oo
keentey in magacii Somaliyeed uu noqdo wax laga naxo.
Bil xaqiiqatan waxaa la jooga markii caalamka iyo Somalida miyirka
qabtaaba ay qiri lahaayeen in la joogo xiligii laabta iyo niyada
laga ogalaan lahaa in Somaliland la siiyo aqoonsi buuxa oo caalamka
ay kaga mid noqoto. Somaliland oo kameel koone ah ista taagtey
Somalida tashan gara la` ayaa waxaa ka jirey 18 sano kala danbeyn
maamul iyo nabadgelyo aan ka jirin wadamada Caalamka ugu maaliyada
badan.
Dabcan hadii Caalamka, Africa iyo Somalida kelaba ay xaqiiqda u soo
noqdaan oo ay Somaliland indha runa ku eegaan waxaa hubaal noqon
doonta in markaa xal loo heli doono, xalinta khilaafka faraha lagaga
gubtey ee ka aloosan Koonfurta Somalia. Haa, muran kuma jiro in
maanta Somaliland aaney awood dhaqaale u hayn in ay si dhaba u
xaliso khilaafka Somalia, waxaa iyana waaliya ninka ku taliya in
Somaliland ay ku milanto halaaga ka socda Somaliyada Konfuureed.
Gegabagebadii waxaan anigoo ka hadlaya magaca dadka reer Somaliland
aan mahad celin u fidinaya odayaasha dirta koonfureed ee shirka
jariid ku qabtey magaalada Muqdisho iyagoo ugu baaqey caalamka iyo
Somalidaba in la joogo xiligii Somaliland xuquuqdeeda muranka laga
saari lahaa.
Alla mahad leh
Qalinkii: Osman Omar Dool
Oslo Norway
|