Wasiirka Arrimaha
Dibadda oo ka Waramay Qorshaha waxqabadka
Wasaaradiisa
Wasiirka wasaaradda Arrimaha
Dibeda JSL Cabdillaahi Maxamed Ducaale ayaa ka xog waramay hawlaha
shaqo ee ay wasaaradiisu qabato iyo tallaabooyinka siyaasada
arrimaha dibeda ee ay wasaaradiisu iyo Somalilandba hore u qaaday
intii lagu gudo jiray sanadkii dhamaaday ee 2009-ka.
Wasiirka Arrimaha Dibadu waxa uu kaga hadlay shir jaraa’id oo uu
shalay ku qabtay Xafiiskiisa kaasi oo uu Sidoo kale wasiirku waxa uu
shirkiisa jaraa’id kaga xog waramay xidhiidhka isa soo taraya ee ay
Somaliland la leedahay wadamada Dibeda iyo kuwa jaarkeeda ah, gaar
ahaana waxa uu wasiirku carrabka ku dhuftay wadanka Jabuuti oo
beryahan danbe xidhiidhka ay Somaliland la leedahay si weyn kor ugu
soo kacay.
Wasiirka arrimaha Dibedu Md. Cabdillaahi Maxamed Ducaale waxa uu
tilmaamay in wadanka Jabuuti oo ay Somaliland wada ambaqaadeed
xidhiidh saaxiibtinimo , iskaashi, iyo nabad gelyo uu haatan gaadhay
meel la taaban karo oo midho dhal ah.
Cabdillaahi Maxamed Ducaale, Wasiirku mar uu ka hadlayay Arrimaha
doorashooyinka iyo qabanqaabada shirweynaha 2aad ee Xisbiga UDUB
waxa uu tilmaamay in aanay Xukuumada dhexe ee Somaliland iyo Xisbiga
talada haya ee UDUB midna aanay ogolayn in doorashadu dib uga dhacdo
wakhtigii loo cayimay oo ah 29.March.2009. isagoo wasiirku tilmaamay
inay diyaar u yihiin wax waliba isla markaana ay caalamku ballan
qaadeen inay doorashada Madaxtooyada u soo diri doonaan goob
joogayaal caalami ah oo indha-indhayn ku sameeya doorashada.
Shirkaa jaraa’id ee wasiirka arrimaha Dibada waxa ku wehelinayay oo
goob jog ka ahaa wasiiru dawlaha arrimaha dibada Md. Siciid Aadan
Nuur iyo xubno ka mida agaasima waaxeedyada wasaaradda.
Wasiirka oo arrimahaa ka hadlayaana wuxuu yidhi “
Horta waa sidaasi uu sheegay Wasiiru-Dowluhu waxaan doonayaa in aan
halkan idiinka caddeeyo Wasaaradu waxna waa Protocol anigu aan
mas’uul ka ahay iyo Wasiiru Dowluhu Markaa wixii Wasaaradda guud
ahaan ka xumaada waxa iska leh Wasiirka Arrimaha Dibadda isaga ayaa
ugu horeeya madax meel ka saraysa oo la taabtaana ma jirto, ta kale
waxa weeyaan dar-dar galin doonaa hawlaha sidaa uu Wasiirku sheegay,
waxaanu aad iyo aad ugu mahad-naqaynaa Madaxweynaha JSL oo runtii
meelo badan culays noo saaray, marka Madaxweyne Dibad u baxo iyo
Warqada uu qoraa waxay miisaan siisaa xoojinta Siyaasaddii
Wasaaradda Arrimaha Dibadda taana aad iyo aad ayaanu ugu mahad
celinaynaa Madaxweynaha, waxna waxa aan la wadaagnaa Colleagues-kayaga
kale .
Taana wasaaraddu qayb wayn ayay kaga jirtaa guud ahaan waxaan
jecelahay walaalayaal inta aynaan su’aalaha u galin sidii
Madaxweynuhuba horeba u hambalyeeyay Madaxweynaha cusub ee
Maraykanka Mr. Obama ina aanu maanta halkan Dhaartii loo dhaariyay
xafiiska in aanu aad iyo aad u hambalyayno waa wax wayn oo
taariikhda Maraykanka iska bedeshay, Taariikhdii dadkii
African-Americans-kana waxa wayn ka bedeshay waxa kale oo aanu
hambalyo u diraynaa Hillary Clinton oo iyana la wareegtay maanta
hawsha sidoo kale waxaanu hambalyo u diraynaa Dr. Susan Rice
Wakiilka Qaramada Midoobay ee Maraykanka horena saaxiib Somaliland
ula ahayd. Waxa kale oo aan khaasatan u mahad-naqayaa safiirka
Ingiriiska ee Norman Ling iyo ku-xigeenkiisa John Marshal oo
labaduba gacan-siin wayn la leh xafiiskeena Addis Ababa ka furan,
waxaan jecelahay in aan si gaar ah ugu mahad-naqo kullankii ay noo
sammeeyeen kullankii ugu dambeeyay ee Wasiirkii Ingiriiska ee yimid
Addis Ababa oo gobolka marayay Admiral Lord West ayaa la yidhaahdaa
oo runtii waqti fiican na siiyay Xukuumaddana anuu aan u matalayay
aad iyo aad ayaanu runtii ugu mahad-celinaynaa, waxa kale oo aanu u
mahad-celinaynaa Safaaradda Maraykanka ee Nairobi Ambassador Runner
Burger iyo hawl wadeenada kale iyo safiirka u fadhiya Maraykanka
wadanka Djibouti Ambassador James Swan oo iyaguna runtii suurta
galiyay kulankii Madaxweynaha iyo Senator Feingold oo hawsha Afrika
u qaabilsan Senate-ka Guddoomiyena u ah kooxdaasi aad iyo aad ayaanu
ugu mahad-naqaynaa, Nairobi intii aanu joognay Wakiilkeena halkaasi
fadhiya Mr. Indho Buur oo aad noola shaqeeyay ayaan u mahad-naqayaa.
Waxa kale oo aan halkan uga mahad-naqaynaa Ambassador Bawakera
Nicolas oo warbixin fiican inaga qoray una gudbiyay Africa Union-ka
hawlahaasi aad iyo aad ayaan u jecelahay inaan uga wada-mahad naqno,
waxa kale oo aan u mahad celinaynaa Dowladda Ethiopia oo aad iyaduna
noo caawisa.
Waxa kale oo aan aad ugu mahad naqayaa Dowladda Djabouti oo aanu
yeelanay Strategic Partnership oo ah wax wayn oo inoo soo kodhay,
daris wanaaga iyo jaarkana sidaasi ayaanu u wadaynaa Insha Allah,
Dowladda Kenya sidoo kale xidhiidh wayn oo caaqiibo leh ayaa naga
dhaxeeya Kibaki waanu aragnay Wasiirul Khaarajiyaha Telefoon
ayuunbaa na kala xiga waan saaxiibkay Watankula , Ra’iisal Wasaaraha
Rail Odinga waa saaxiib wayn oo Somaliland leedahay waan nin yaqaana
Somaliland.
Intaa ka dib waxaa wasiirka la waydiiyay su’aalo waxaana ka mid ahaa
kuwan:
S. Maalmahan dad badan waxay u arkaan in Cawil hoggaamiyo xagga
arrimaha Dibadda markaa ma adiga ayaa gaabiyay oo lagu dhaliilayaa
inkastoo aad ahayd nin in badan ka soo shaqaynayay Arrimaha Dibadda
arrimahaasi maxaad ka odhanaysaa ?
J. Cawil walaal waa Oday Qaran weeyi, Shirkayagii Djabouti aanu ku
tagnayna waxa aanu ku tagnay Guddi, Guddida isaga ayaa Guddoomiye u
ahaa waana waxa aan aad iyo aad ugu faanayno, sidaad la socotaanba
waxay ahayd arrin hore loo soo dhammeeyay, arrinta ugu wayn ee
taalaana waa arrinta Nabad-gelyada, Wefdigana waxa aanu ku ahayn
saddex Wasiir iyo Wasiir ku-xigeenka Warfaafina, W/Maaliyada Cawil
iyo W/Daakhiliga C/laahi Ciro. Waxaanu meesha ugu tagnayna waa intaa
dhigoodii, Wasiirka Khaarajiga Djaboutina shir qudha oo uu kala soo
qabtayna ma jirin markaasi sidaasi ayuu Guddoomiye ku ahaa, waa oday
Qaran oo Siyaasi ah inqilaabkii ugu horeeya sammeeyay aad iyo aad
ayaan ugu han-waynahay dee kollayba sida loo kala wayn yahayna waa
mid meesha ku jirta “nin gu kaa waynina guri xeel kaa wayn baa la
yidhi” Golaha Wasiiradda waxa ka dhaxeeya sharaf “co-hesive) ayaanu
nahay wusara ah markaa waxa weeyaan waxa aanu ku shaqaynaa wadar iyo
wadajir marna port-folio ayaa lagu shaqeeyaa. Markaas Cawil
Guddoonkiisii hawl fiican ayuu soo qabtay waana noo sharaf.
S. Wasiir waxa la sheegayaa in Wasaaraddu Baryahan dambe in ay
dhaliilo daciif ah oo faro badan leedahay siib dhinca Khibrada
Diblomaasiyadda gaar ahaan Wasiirka, socdaaladu waxay noqdeen qaar
kaligaa aad baxdo oo aan lahayn awood lagu baxo culaysna lagu saari
karo meel, ta kale xafiisyo la furayo ayaad sheegteen iyo Librari
laakiin maad sheegin strategyada Wasaaradda arrintaa maxaad ka odhan
kartaa ?
J. Caalamku kuma shaqeeyo Kun-fa-yakuun, anigu waxa aan kalsooni
badan ku qabaa taariikhduna xusi doontaa aniga iyo Wasiiradii iga
horeeyayba ka soo bilaw Marxuum Sh. Yuusuf 1991 in Wasaaraddani
horumar gaadhayso mar walbana ay ahayd Incremental, maantana waxaa
aan aad ugu niyad samahay in horumar wayn la sameeyay wufuud badani
inoo timid oo ay ugu dambaysay qolyihii maalintii dhawayd inoo yimid
ma jeclin in aan wax kasta carabka ku dhufano wax badan oo dusha
aanu ka marnaa waa jiraan oo masalan Prime minister Gordon Brown
warqad rasim ah ayuu u soo qoray Madaxweynaha iyo qoladii halkan
timid dhambaal ayay inoo keeneen, kuma shaqayno anagu I arkaay i
maqlaay mana jeclin danta iyo hawsha ayuunbaa laga raac tan xagga
socodka aad ayaa loogu baxay inta badan waxa ina xaniba waxa weeyaan
waa arrin xagga dhaqaalaha ah, mar aanu dirno Xukuumada iyo mar aanu
dirno Axsaabta Qaranka iyo mar aan anigu baxo oo u baxo dalalkaas ay
inoo joogaan Wakiiladdeenu shirarka Caalamiga oo kale ayay ka qayb
qaataan Maxamuud Cabdi Dacar oo kale Brussels ayuu joogaa
S. Wasiir xagga loobinka waynu ka liidanaa sida la sheegayo ee
arrinkaa maxaa ka jira ?
J. Walaal Soomaalidu waxay tidhaahdaa tog waliba taagtii ayuu rgo
madaa, anagu waxa aanu is leenahay Xukuumada ahaan Qaran ahaan iyo
Wasiir ahaanba waxaanu la hadhnay in aanay jirin mid aanu ka
daalaynana maaha.
S. Wasiir Dalka Kenya sida aad sheegtay xidhiidh ayaynu la leenahay
oo lagu tilmoom in uu yahay meesha laga hago siyaasadda Afrika,
dhowaan waxa safar kaga soo noqday Guddoomiyaha Kulmiye Siilaanyo,
waxa uu sheegay in aad halkaasi dayacdeen xilkii idinka saarnaana
aydaan gudan oo ay gaadhay Madaxweyne ku-xigeenku aaminsan yahay in
Edna Adan ay tahay Wasiir Arrima dibadeedkii markaasi miyaanay ahayn
arrin aad gabteen ?
J. Horta walaal farxad wayn waxa ii ah Guddoomiyaha Xisbiga Kulmiye
haddiiba uu arrin qadiyad Somaliland ah ka soo shaqeeyay waan ku
hambalyaynaynaa oo waliba waanu odhan Dowladda Kenya waa la igu
diray, Wasiirkaa nagu diray Ethiopia iyo arrimaahsi, laakiin si
wanaagsan loo soo dhaweeyay run ahaantii waxa weeyaan dee Odaygu
isaga ayaa hadalkaasi yidihi xidhiidh wanaagsan ayaa naga dhexeeya
Madaxweyne Kibaki waanu aragnay waan la socday wafdigii Madaxweynaha
anigu ee ugu horeeyay ee Arab Moi illaa wakhtigii Cigaal oo ay ugu
horaysay 1993 iyo dhowr shir oo kale oo aanu Madaxweynaha (Cigaal)
ka sidanay Waraaqo, intii ka dambaysayna dhowr jeer ayaanu taagnay
Porto-folio-dana waxa haya Madaxweynaha iyo Wasiir khaarajiyaha
saaxiibo badana waanu ku leenahay, arrintan aad soo qaaday ee
Madaxweyne ku-xigeenka haddii uu arakay Axmed Siilaanyo dee waa
fiican tahay haddii uu arkay Axmed Maxamed, baryahan dambe waxa aad
moodaa duqu inuu ku wallacay Magaca la yidhaahdo Cabdillaahi Maxamed
Ducaale iyo Wasaaradda taasna waxa aan jecelahay in aanan halkaasi u
dhaafin, uu sheegay sifo shakhsi ah ayaan ku tagay meesha shirkii
jaraa’id ee uu idiinku qabtay Madaarka, markaas waxa habboon marka
dal aad tagto ee aad sifo shakhsi ah ku tagtid in aad sifo shakhsi
ah ku joogtid waxaanu arkaynay in arrintii u socotay Kaambayn iyadoo
waliba jaaliyaddii dhexdeeda Kaambayn wayn laga sammeeyay waa dal
ajnabi ah dalku shuruuc ayuu leeyahay inaga Kaambaynkeenu waa dalka
gudihiisa markaanu tagno anagu ama Axsaabtu hore ayaanu u dirnay
waanu dhowrnaa oo waa la dhowraa dalka aad tagayo dadka meesha
joogaana waa shacab inkastoo Somaliland asliyan yihiin, runtii waa
dad Kenya ah, taasna waxaanu u aragnaa waa arrin fajiciso ah markaad
eegto xeerkeena wali doorashadii lama galin waxa aynu ku jirnaa
Diiwaangelintii, arrintaasna waxaan u arkaa arrin gef ah oo
shuruucdeena gaf ku ah, Dalkaa Duqu tagayna inuu dhowro ayay ahayd
xafiisna waan ku leenahay shaqeeya.
Waaheen
|