Warbixin Waftigii UCID Ee La Kulmay Dadwaynaha Reer Washington-DC

Waftigii xisbiga UCID ee uu hogaaminayey Dr. Mohamed-Rashiid SH. Hassan oo booqasho ku yimid North America (USA & Canada) ayaa maalinti Sabtidii aheyd ee bisha February 14, 2009 la kulmay dadwaynaha Somaliland ee ku nool Washington, DC iyo nawaxigeeda (Maryland iyo Northern Virginia).
Xubnaha waftiga ayaa uga waramey dadwaynahaas ka soo qayb galey xafladii xaalada dalka Somaliland ku sugan yahey iyo doorashooyinka dalka ku soo fool leh ee xisbiga UCID ka midyahey sedexada xisbi qaren ee ku loolamaya madaxwayne iyo madaxwayne ku xigeenka doorashadaas oo ku soo beegan March 29, 2009.

Markii ugu horeysey waxa warbixin dheer ka bixiyey xisbiga UCID iyo arimihiisa dibada Xoghayaha xisbiga UCID u qaabilsan arimaha dibada, Mudane Ahmed Hussein FagFagaash. Mudane Ahmed wuxuu ka waramey siyaasada ku wajahan geeska Africa, Middle East iyo wadamada la dariska ah Somaliland. Isna waxaa halkaa warbixin dheer oo qaaye leh ka soo jeediyey Xildhibaan Naasir Haji Ali Shire oo u qaabilsan xisbiga UCID xaga siyaasada. Xildhibaan Nasir oo ka waramey xaalada dalku maanta ku jiro iyo xaga arimaha sharciga. Xildhibaan Nasir waxaa kaloo ka waramey doorashooyinka dalka ku soo foodleh iyo diiwaanglintii hada dalku soo marey. Isla markaa waxaa kaaloo warbixin qaayo iyo qiime lah bexisey Marwo Caasha Hussein “Mareykan”oo ah xoghayaha guud xisbiga UCID qaarada Yurub waaxda dumarka oo ka mid aheyd waftiga ayaa ka warentey qaybta wayn ee haweenka Somaliland kaga jiraan halganka wadenka iyo howlaha ay ka wadaan xisbiga UCID.

Marwo Caasha oo sheegtey in xisbiga UCID uu had iyo jeer xisbigau ka qayb galiyo wada tashiga iyo waxqabadka dalka dumarka iyo dhamaan bulshada reer Somaliland sida; dhalinyarada, haweenka, ardeyda dugsiyada/jaamacadaha iyo dadka laga tirada baden yahey. Marwo Caasha waxay kaloo ka warentey waxqabadka xisbiga UCID oo kaga jiro qaarada yurub tusaalena ay u soo qaadatey shirwaynihii ka qabsoomey London, UK oo ay soo qabanqaabiyeen gudida xisbiga UCID ee UK. Marwo Caasha waxay ku guubaabisey dhamaan dawaynihii reer Somaliland ee ka soo qayb galey xafladan gaar ahaan haweenka in ay wax la qabsadaan xisbiga UCID sababtoo ah xisbiga UCID waa xisbiga kaliya ee maanta u ogal haweenka Somaliland in ay ka qaybqaataan maamulka sare ee dowlada una qoondeeyeen ilaa 5 jago hadii xisbigu ku guuleystaan doorashada.

Kadib waxaa madashaa lagu soo bandhigey waxqabadkii xisbiga UCID ka qabteen wadenka Somaliland iyo howlihii ay ka qayb qaateen madaxda maamulka xisbiga UCID, hadey aheyd doorashooyinkii dagaanka, xildhibaanada, iyo doorashadii madaxwaynaha. Waxa kaloo ku jirey wax qabadkaa sida xisbiga UCID uu had iyo jeer ugu jiro dadaalka ummada reer Somaliland. Hadey noqoto xaga caafimaadka, tacliinta, nabadgalyada, arimaha bulshada, iyo aqoonsiga Somaliland. Waxa kaloo lagu soo bandhigey booqashooyin ay madaxda xisbiga UCID ku gaadheen gobalada, magaalooyinka, dagmooyinka dalka, xarumaha caafmaadka, agoomaha, iyo ciidamada qalbka sida ee ku jira xaga safka hore.

Dadwaynihii aad iyo aad ayey ugu riyaaqeen gulas, waqabadkii iyo warbixintii kala duwanayd ee lagu soo koobey qalabka DVD ah kana waramayey xisbiga waxqabadkiisii iyo halganka dheer ee xisbigu ugu jiro Somaliland.

Waxa kaloo hadal dheer oo aad iyo aad loogu riyaaqey ka soo jeediyey xafladaa Dr. Mohamed-Rashid SH. Hassan oo ah musharaxa madaxwayne ku xigeenka u taagen ee xisbiga UCID. Dr. Mohamed waxuu si qoto dheer uga waramey waxa uu xisbiga UCID uu u taagan yahey, xaalada dalka, iyo sidii ay xisbiga UCID wax uga qaban lahaayeeen xaalada maanta dalku ku jiro haddi ay doorashada ku guuleystaan. Dr. Mohamed-Rashiid waxa kaloo ka waramey in xisbigu hadyo jeer uu la tashado bulshada dalka: wax garadka gudihiisa iyo dibadiisaba ; culumaadiinka; odayaasha; macalimiint; ardayda; haweenka, iyo dhamaan umada reer Somaliland. Dr. Mohamed-Rashiid waxa uu u soo jeediyey dadwaynihii ka soo qaybgaley xafladaas in ay eegan sedexda xisbi qaren ka dibna qofkastaa uu eego faraqa u dhexeeya ee jira sedexdaa xisbi. Dr. Mohamed-Rashiid wuxuu isu barbar dhigey xisbiyada qaren ee dalka iyo siduu xisbiga UCID uga duwan yahey labada xisbi ee kale; Dr. Mohamed-Rashiid wuxuu ku tilmaamey xisbiga UCID in uu taageero ka heysto dhamaan bulshada reer Somaliland. Waxa kaloo ka waramey in uu xisbiga UCID uu u taagen yahey badbaadadda iyo daryeelka ummada reer Somaliland.

Ahmed Mahdi