Waar Bal duul Allaw dhegeysta,
duumo xaaqday!
Hamud H. Duale
“Xamarahan dagaagee dam ka siiyey beeraha, ninka wadhaf u daydayey,
M/weynihii la doortay, dimuqraadiga ahaa ma ka daaya buu yidhi, ma
ha duulin buu yidhi, ma ha daardaarin buu yidhi! Maalinba tay keenaa
tii kale ka daran, Waar bal duul allaw dhegeysta duuma xaaqday, waar
bal duul allaw dhegeysta duma xaaqday!
· Marka hore taageero af iyo adinba ah oo aan u dirayo Golaha wada
tashiga iyo toosinta Qaranka, the first of its kind (National
Politcal Presure Group) oo aan xil qaran u tartamayn. Marka xiga,
waxaan balan qaadayaa ajuuradii, jilib dhiga amma burmayeelka ee
xubinimadayda( Membership fee), maxaayeelay, waa halkii Gaariya eh
:“Sheekadan dhanbaan ahay, dhex dhexaad kamaan ihi”. Weligayba xusbi
qaran iyo xusbi beeleed midna kumaan toobad seegin, xildoon iyo
xoola doon ma ahi, dantii maraate magac beeleed adeegsanayana
weligee umma mashxaradin, col iyo laandayr baanu nahay, abkuu doono
ha sheegtee.
· Kan waxaan ugu degdegey taageeradiisa hal aan tebayey ayuu u
badheedhay oo kaalin banaanayd oo aan jecelaa in la buuxiyo ayuu
galay; waa xertan doonayey in la asaaso, maantana baahi jirta ayaa
keentay. Aniga waxay iiga dhigan yihiin Xerta wada tashiga iyo
toosinta ee Qaran, si aan loogu malayn in uu yahay xusbi qaran oo
afraad oo la asaasay oo baalmarsan sharciga, oo dhangag laha
beelaysani dhufays u soo gelo, abkuu doono ha sheegtee. Golahan
xubnihiisa iyo dawladu midna aflagaado ma gayaan, waxaasay mudan
yihiin dhaliil iyo taageero macquul ah, hadday jiraan. Dawlada iyo
golahan tartan kama dhexeeyo, Qarankaa ka dhexeeya, mid walba
waajibaad gaar ah ayaa saran.
· Waxaan ku rajo weynaha in dawlada Somaliland ay garawsato Golahan,
maalgeliso oo hawlahooda u fududayso, waayo waa baarumahii dawladu
in ay dhoohdo ka ilaalinayey. Waxaan ku rajo weynaha in deeq
bixiyayaasha maalgeliyaa doorashooyinku, hadday daacad yihiin
maalgelin doonaan kaabayaasha barbaarinta iyo geedi socodka
dimoqraadiyada iyo ururada bulshada ee siyaasada, ee madaxa banaan.
Intaasi waa aniga iyo dummadayda, aragtidaan qabo oo aan oogta ka
cadeeyey. Bal aan hoos u daadego oo aan hadaltire ku sii ladho.
Layli biyaha uurkiisa ku jira, ayuu ka diidaa, iyada oo aan garri
lagu afuufin, galoolna ku foodhyin. Dhagar qabana dhulka u
dhaqdhaqaaqa, dhirtaa ku cida, foodhida dabayshiyo, ta fiinta ka
didaa. Ilayn waa danbiiley.
Waxaan uga dan leeyahay dawladan ka didaysa Golaha Wada tashiga iyo
toosinta, wuxuu daaran yahay maageedu in dalba juuqadeedaa wax la
dedo ka xeel dheer tahay, qalqalooca geediga way og tahay. Waxaa ku
sargo’an sumad laba aflayntii KULMIYE sameeyey, kala saaristiisii
Madaxweynaha iyo Xusbiga. Denbigaana cid leh mooyi. Tolow yaa yidhi
innoo kala gooya?
Macal cune muuqan dooneeye, diidmada qayaxan ee distuurka iyo
dimuqraadiyadu baalmarsan ee dawladu waxay I xusuusey sheekadii
ninkii ugaadhsadaha ahaa iyo biciidka. Haddaan soo koobo sheekadu
waxay leedahay nin ugaadhsade ah ayaa kayn biiciid joogo soo galay.
Ugaadhsadihii intaanu biciidkii arag, ayuu biiciidkii dareen galay
oo ka shakiyey in loo soo dhukusayo, markaasu “bif” yidhi.
Ugaadhsadihii ayaa maqlay biftii. Intuu yaabay ayuu yidhi “Taloo yaa
u sheegay”. Malahayga wuu uriyey. Kadibna ugaadhsadihi wuxuu ugu
jawaabceliyey biciidkii: “Ma ganide, ha sahadsan”. Dulacadaydu waa
bifta dawladda wax baa nooga iftiimay. Waxaan leeyahay: “dawladee ma
ganidey ha sahadsan”.
Haddaan intaa kaga gudbo hoga tusaalayntaa nasteexada ah iyo
tamashlaynta waayeel oo aan dulmar ku sameeyo Ururada bulshada
(pressure groups) gaar ahaan kuwa “Political Pressure groups”,
waxaan ku soo qaadan doonaa Golaha wada tashiga iyo toosinta madax
banaan oo ah kii ugu horeeyey ee noociisa ee ummaddu yeelato iyo
kuwii hore u jirey iyo kuwa haatan abuurmay ee danahooda gaarka ah
ee u midoobey.
Sideedaba ururada loo yaqaan “Political Pressure Groups” ee madax
banaani waa kaabayaasha dimoqraadiyada, waa dhaabadaha ummadi kaga
badbaado diktaatooriyada iyo anigay igu gudhaa iyo maamul xumo.
Ururada bulshadu waa laba qaybood, qaar madax banaan oo habka
dimoqraadiyada waafaqsan iyo qaar aan madax banaanayn oo magac u
yeel ah oo waafaqsan habka diktaatooriyada oo dawladu maamusho.
Ururada bulshada (pressure groups) ee wadanada diktaatooriyada ku
dhaqma, madaxdooda iyo ururkoodaba waxaa maalgeliya oo masruufa
dikteetarka iyo mishiinkuu adeegsado, sidaa daraadeed isaga ayay u
hogaansan yihiin oo danihiisa iyo ammaantiisa ka horeeysiiyaan danta
bulshada, isaga ayay u adeegaan, bulshadana way marin habaabiyaan,
mar haddaan la ogolayn kuwu u dhigma oo madax banaani oo toosiyaa.
Waad soo aragteen kuwaas oo kale oo waa kuwii Bedel Bukaas adeegsan
jirey, waa kuwii ku luuqayn jirey: “Burhaankaa baxaaya, Nuurkaa
bildhaamayaa, dhawaaqay isku baaqayaan, barbaarta iyo shaqaalahoo is
biirsadoo ………………………….”,
Ururada bulshadu waxay ka kooban yihiin qaar danahooda gaarka isku
baahaysta in ay u doodaan oo u ololeeyaan, kuwaas oo ay ka mid noqon
karaan ururka danaha macalimiinta, ururada xuquuqda haweenka,
ururada xuquuqda dadka la yaso amma laga tiro badan yahay, ururada u
dooda reer miyiga, ururada warfidiyeenada, ururada ardayda, ururada
xuquuqda dhallinyarada iyo abaydinka iyo qaarkale oo badan. Kuwani
bulshadeena way ka hirgeli waayeen oo dantii ay wada lahaayeen weli
waxaa ka weyn Abnimadaa iyo qaadhaanka. Ma koraan, ma kobcaan. Waxaa
ka gacan sareeyey oo hadheeya “Trible Political Pressure Groups”,
kuwaas oo ka faa’ideysta iyo dhaqanka soo jireenka ah.
Dhinaca siyaasada, Somalida markaad eegto ururada danahooda gaarka
ah isku bahaysta, waxaa ugu xoog weyn, uguna da’ weyn ururada
garaadka la colka ah iyo wax alla wixii aragti cusub ku taamaya. Waa
ururka odayaal dhaqameedka ee nidaamka beelaha intifaacsada. Ururkan
dawladuhu kama maarmaan oo waxay u fududeeyaan nidaamka qaybi oo
xukun, waxay taageeran siduu Gaariye sheegay: “Nin iskii kartidii
isu taagi kareen, oo u haysta atteero laga hoos galo eeda” oo halkii
lagala xisaabtami lahaa abuura beel wada mucaarid ah iyo beel wada
muxaafid ah.. Ururkan iyo dhaqankaasi waa kii Xaaji Adan Afqalooc,
Faarax Omaar, Timacadde, Gaariye iyo qaar kale oo badan tiirka
qabadsiiyey, oo wax kasta oo ay dudubiyeen dabaqa saaray. Maxamed
Ibraahim Warsame (Hadraawi) ururkani waa ka soo hogaan bare ee af
dhabaandhab aayar ah uu la aamusay.
Urur dhaqameedkani dhaaxuu nin hanaqaad isbiday soo hogaan baraye
bal dayaa, waa kaa Proffessor Axmed Ismaciil Samatar sii
dabayshadaye, waa kaa ka duday duulkii uu u bogi jirey iyo wadartii
Somali weyn. Wuu nasiib badan yahay oo sidii SNM-ta Xabashida ummu
gelin, ee Hargeysa ayuu jabhadiisa ka furtay, isaga oo ku luuqaynaya
ninba waa mar eh, mus ma kula koray.
Urur dhaqameedkani waa ka soo xula golayaasha deegaanka, wakiilada
iyo Guurtida. Waa miisaanka la saaro maalinba golaha fulinta cidda
xilka loo dhiibayo, iyada oo aan karti iyo hufnaan loo eegin. Urur
dhaqmeedkani wuxuu kala furfura Arday isku dan ah, macalliimiin isku
dan ah, shaqaale isku dan ah………………….
Ururkani wuxuu ku guuleystey in warbaahinta casriga ee adeegsata
teknoolijiga ma dhaafaanka ah, in aanay beelnimadii iyo aragtida
odayaal dhaqameedka ka madax banaan . Waa ururka kelifey in ay beel
waliba xaadhin samaysato oo ay keeb la yuurur ahaato, jil isla
tooxaaya.
Ururka kale ee laxaadka weyni, waa urur diimeedyada; culimada
dafaarka ahi, adeegsadaan. Waa fiqiyada aan tolkood ka janna tagin.
Waa fiqiyada xildoonka ee dhallinyaradu u adeegsada in ay
isbiimeeyaan. Waxay gacan saar leeyihiin oo isku hiiliyaan Odayaal
dhaqameedyada. Danahood guud iyo baqamaalka bulshada way ka midaysan
yihiin. Waxay adeegsadaan “Xagu gebi, Xaguna gebi, guntu walalac,
aakhiruu war jiraa” dabadoodna lama baano. Ururkani weligii umma
hiilin waxgarada iyo abwaanadii aan kor ku xusay. Dantooda kama
gaabsadaan oo way isku duuban yihiin iyaga oo islamarkaana, sida
siyaasiyiinta beelnimada isku ekaysiinaya, in ay daacad u yihiin.
Ma soo wada koobi karo ururada eh, waxaan intaa raacinayaa ururada
nin iyo meeshii ka dirirka ah sida guul wadayaasha Darban ee meel
laga dalbanayo aanad garaneyn iyo gaara bildhaanada markay xil
hayaan iftiima ee difaac beeleedka galay, marka xilka laga
wareejiyana weerar beeleedka gala ee aan labada goorood garaadkisu
mid uun yahay, waayo ninka reer difaacaya iyo ninka reer u dudayaa,
wax isma doorshaan. Gabal dayaha, la shaqeeya cadceeda beeshooda
hadba u soo baxda, ee marka mid reerkooda ah la magacaabo,
wishiiriya ee wiwidha, marka laga wareejana murugooda ee madoobaada
ee weliba wallaha ku rafta iyo anaga ayaa la noo jeedaa. Kuwan
laftoodu ma hawl yara, waa kalkaaliyayaasha, kooxda Odayaal
dhaqameedka iyo dawlada, si toos ah iyo si dadban ba.
Haddaba ururadani waa kuwii hidaha iyo dhaqanka oo barkhadooda iyo
balaayadoodaba horaa loo soo arkaye, waxaa Somaliland daad u soo
galay markii KULMIYE la wareegey xilkii qaranka. Waxaa Abuurmay urur
kooxoodyo aan la isku ogeyn. Markiiba waxaa kala xidhiidh furtay
ururkii la doortay iyo hogaamiyahoodii oo Madaxweyne noqday, kadibna
Waxaa Unkamay urur kooxyadan danahooda u midoobey:
· Urur kooxeedka dawliga ee uu hogaamiyaha ka yahay Axmed Maxamud
Siilaanyo.
· Urur kooxeedka Kulmiye oo sii kala kacay, kuna murmaya biciidkaan
dili doono baruurtiisa, sabaga laga shiili doono anigaa cabi doona
iyo cabi meysid.
· Golihii Wakiilada ee dadweynuhu soo doortay, ayaa iyaguna isku
rogey urur kooxeed danahooda gaarka u midoobey oo la hal maalay urur
kooxeedka dawliga ah, muxaafid iyo mucaaridna aan kala lahayn,
taladood waxay noqotay mashahar kordhis, cimri dhererso iyo in ay
isku dhigaan wadiifad iyo wasiir sugayaal. Dadkii soo doortay ee
xilka u igmadey way ka maarmeen.
· Guurtidii iyaduna waxay isku bedeshey urur kooxeed danaheeda ka
doorbiday danihii qaranka. Taladood waxay noqotay waqtiga oo la
kordhisto iyo mushaharka oo la kordhisto, waxay ku luuqeeyaan
geerida horteed, daar cad bay gogshu ii taal. Dana kama laha xilkii
qaran ee loo igmadey.
· Ururadii mucaaridka ee shacbigu xilka qaran u qoondeeyey, ayaa
iyaguna siqiiray, markay golayaashii midoobeen, ee afti ay ku yeelan
waayeen golayaasha dhexdoooda ee la takooray. Iyaga laftoodu
haybadii xusbi qaran, way ka guureen oo waxay iskugu biyo shubteen
xusbi kooxeed. Qaar badanina xubnahoodu waa wasiir sugayaal iyo
wadiifad loo magacaabo.
· Distoorkii qaranka, waxay ka dhigeen distoor kooxeed iyaguun u
adeega, waana sobobta keentay in dawladdu ku doodo Golaha wada
taashiga iyo toosinta wuxuu baalmarsan yahay sharciga. Ma
baalmarsana laakiin waxay baalmarsan yihiin distoor kooxeed iyo
sharciga la jiifiyaana banaan.
Intaas oo halbaas ah is hareer taal, waxaa masruufa wadhatada. Ku
darso, ina dan sheegow, waxaa sii dheer la taliyayaa G/Madaxtooyada
hoganeysa oo aan tiro iyo cadad lahayn, iyo guddiyo isa saarsaaran
oo tiro mooyee aan tayo lahayn oo dhammaantood ku luuqaynaaya nafta
dooji mooye qaranimo laga xawaaree. Midi bay daabka haystaan.
Waxaas Xamara ah oo dagaagay oo beerihii dam ka siiyey, colka wadhaf
ku dayayaa ma danbiilayaalbaa? Waa su’aal jawaab leh iga war dhawr.
“Intaas oo marxaladood duulka soo mara nahay, haddana maanta ka
horoow, dhagaxyaale nama helin, haddan manta ka horrow dhuunyaale ”.
La soco qaybaha danbe
|