Togga
Dacar-Budhuq oo Saddex Gaadhi Qaaday
Xannibayna Wasiiro iyo Madaxdii Xisbiyada
Togga Dacarbudhuq oo dhinaca bari
ka xiga magaalada Hargeisa una dhexeeya Hargeisa iyo Berbera ayaa
shalay qaaday qiyaastii saddex gaadhi, Saddexdan gaadhi oo isugu
jiray Gaadhi Layla Calawi ah, Gaadhi Xamuula iyo Surf gaadhi
dawladeed ah ayaan dhammaantood dadkii la socday wax ku noqon.
Gaadhigan Leyla Calawida-ah ayaa
sidan Afar dumara oo midi caruur tahay iyo wiil yar iyo darawalkii
ayaa waxaa soo badbaadiyey dadkii daadku xanibay ee dooxa
hareerihiisa tubnaa, balse gaadhiga ayaa gebi ahaan daadku qaaday
isagoo jebiyey kawarka hore iyo muraayadda horeba, dhinaca kale
gaadhiga weyn ee uu qaaday daadku ayaa ahaa gaadhi Waaraada oo
xamuul raashin ah siday, balse gaadhiga Surf-ta ah ayaa iyada laga
badbaadiyey ka dib markii daadku qaatay iyada oo gaadhi kale ka soo
dhex jiiday.
Toggan ayaa shalay xannibay dad aad u tiro badan oo isaga gooshayey
magaalooyinka bariga iyo galbeedka Somaliland dhinaca kale waxaa
toggan ku xayirmay madax badan oo ka soo noqotay aaskii
Guddoomiyihii bisha cas ee ka dhacay degmada Sheekh, madaxdan oo ay
ka mid ahaayeen Wasiirada Hawlaha Guud Siciid Sulub, Caafimaadka
Cabdi Haybe, Xildhibaanno, Madaxda Xisbiyada Mucaaradka ah oo ay ka
mid ahaayeen Axmed Siilaanyo, Faysal Cali Waraabe, Cabdiraxmaan
Saylici, Cabdiraxmaan Cabdulqaadir, Xoghayaha Xisbiga Kulmiye iyo
madax kale oo aad u tiro badnayd
Togagga Abdaal, Dacar-buduq iyo Aw-barkhadle ayaa xilliyada roobabka
sidan si la mid ah gaadiid u qaada dhinaca kalena xayira isu socodka
magaalooyinka Bariga iyo Galbeedka Somaliland, sannad walba waxaa
badana ku darsama biyo kayd u noqon lahaa bulshada Somaliland oo
xilliyada abaaraha ay ka soo yeedhaan qaylo dhaan harraad ama baahi
biyood, balse illaa hadda ma jirto qorshe dhaba oo xukuumadda iyo
shacbiga Somaliland uga yaalla sidii biyahan looga faa’iidaysan
lahaa ama xataa loo yarayn lahaa khatarta ay ku hayaan gaadiidleyda
bixisa cashuuraha waddo marista, iyadoo aanu jirin cid gacan
siinaysa qofka sidan oo kale ay daadadku gaadiidkiisa uga qaadaan.
Source:Sanaag.org
|