Todobaadkan iyo weriyaha laanta curdinka

 

Todobaadkan waxaan indiin soo gudbineynaa waraysi uu qurbaawi la yeeshay Weriyaha Laanta Curdinka. Qodobaduu uu ka waraystay waxaa ka mid ah:

1.Xamarje iyo rag kale ee xujoobey

2. Xidhiga Boqor Buur Madaw, Madoobey Xasarad.

3. Sulayman Maxamud Aadan oo weli garba-duub u xidhan.



Waraysigii oo dhamaystirani waa kan:



Qurbaawi: Weriye; bal iiga waran arrinta xidhiga Xamarje iyo saaxiibadii?

Weriyaha L.curdinka: Xamarje lama xidhan ee wuu xujoobey!

Qurbaawi: Waa maxay wuu xujoobey? Ma xarunta Sayid Maxamed Cabdille Xasan baa la joogaa?

Weriye LC: Meeshii wareegto lagu xukumo ee golayaasha sharciga iyo Maxkamadu aanu Madax banaanayn ee M/weynaha ka ammar weynaado, waa iska Xaruntii Ina Cabdilla Xasan keligii laga ammar qaadan jirey ee uu ina Cali Qablax ka yaabay ee uu ka deyriyey.

Qurbaawi: Ayuu ka xujoobey?

Weriyaha L.curdinka: Wuxuu ka xujoobey Xarunta Madaxtooyada?

Qurbaawi: Siduu uga Xujoobey xarunta?

Weriye LC: Waxaa lagu eedeeyey Xatooyo Xoolo Dawersi ah, oo danyarta looga soo qaraamaaday Carrabta.

Dadka qaar waxay leeyihiin waa Hashii Laaca aragtay aan Laagaba ogeyn. Qaar kale ayaa ku doodaya qabtii inna xasan rakuub ayaa ku dhacday, Qaarna waxay leeyihiin waa sakaaradii budhka la kulantay. Qaarna waxay ku doodayaan hadday tuuktu is khilaafto xaqaa dilaaca. Isku soo wada xooriyoo waxaa dhammaan lagu kalabaydhi waayey Garsoorka qaranka oo aan la hubin in uu madax banaana yahay iyo in kale, in ha la horkeeno. Taasina ceeb ma ah. Ninkii diidaa danbiile ah.

Qurbaawi: M/weynaha waxaa looga bartay markay suruqdo ee xaajo la isku mari waayo in uu guddi xul ah oo xaqaani a, u saaro. Tabtaasi miyay katibtey?

Weriyaha lC: Haa, oo way katibtey, maxaayeelay wuu ku talax tegey adeegsigeedii oo muu beekhaansan mana kala hanbaysan ee wuu is wada keeb raaciyey, waxay noqdeen guddi, guddi saran, guddi kale saran iyo raad gadasho. Dadweynahu way ka kharaareen guddi, waxay ka kharaareen Golayaasha shacbiga oo isku bedeley wasiir sugayaal islamarkaana xalaalaystay in iyaga oo xilkii huwan ay ururada la tartamaan. Sidaa daraadeed Intaan guddiba la magacaabin dhallinyarta iyo ahelkiisii ayaa la wareegey oo yidhi waa in la horkeenaa garsoor xaq ah oo xalaal ah, oo lana qanciyaa. Waxay leeyihiin in keligii daalin yahay iyo in uu keligii la dulmane, in uu baadil yahay iyo in uu barii' yahay, maxkamadu ha kala caddayso.

Qurbaawi: Xamarje, muxuu ku doodayaa?

Weriyaha LC: Xamarje wuxuu ku doodayaa anigii roonaa ayay i rogatey. Waa mu’aamarad cad oo loo cummaamaday. Ha, la baadho kiiska oo maxkamad ha la i geeyo.



Wuxuu leeyahay baadhitaanka Cammaan ha laga soo bilaabo. Ha la soo qaado wareegtadii Mr. X M/tooyadu ugu wakiilatay in loo soo dhiibo deeq. Ha la soo helo wakiilkii warqada dawliga ah Cammaan ula tegey, ciddii la heshiisey ee go’aamisey in aan dadkii la gaadhsiin ee lagu wareejiyo ganacsato. Ilaa hadda waxaan isku haystaa ayuu leeyahay Kashife loo koodhay.

Qurbaawi: Warbaahinta madaxa banaan, ta dawliga ah, ta dayesan, ta beelaysan, ta belo sheega ah iyo ta barkhad sheega ah, ta taabaalaysan iyo ta lagu qadhaabtaba ma laga yaabaa in maxkamadaa loo ogolaado si ay toos dadweynaha, ula socodsiiyaan geedi socodka kiiska, si ay xani iyo beeni u hadho, oo looga badbaado ku tidhi ku teenay, hunuu hunuu iyo hinbiriisi?



Weriyaha LC: Horta adduunka ma jirto warbaahin madax banaan. Waxaa jira warbaahin xaglisa iyo tu xag jir ah. Teenu waa wada xagjir aragti gaar ahna ma laha. Waxay xag jir ku tahay: Ereyadii af-somaliga, waxay qaateen oo kobcinayaan qaybta ku salaysan aabahay goblanta ee halista ah. Waxay ka duulaan "Gujis baan uga dhig nahay gebiga daarood" iyo "loo diid danood iyo hadduu degi lahaa ciid", waxaa naafoobey oo curyaamay waa erayadii debecsanaa ee Xagliska ee xagliska loo adeegsan lahaa sida: "Heedhee ina abti, abbaay, aadoo, huunn. Warbaahinta casriga ah ma banaana xagjirnimadu, laakiin waxaa banaan xagliska iyo dhinac u janjeedhsato.

Horta warbaahinteenu waa taa haddii loo ogolaanayo iyo haddii kalaba. Hawshaasi waxay u taalaa wasiirka cusub, dad badan ayaa ku calool fayow in uu xujadaa ka dabaalan doono oo loo ogolaan doono warbaahinta iyo ciddii kale ee danaynaysa ee xaqiiqo raadis ah.

a

Xidhiga Boqor Buurmadaw, madoobey xasarad

Qurbaawi: Bal ka waran xadhiga Boqor Buur Madaw?

Weriyaha LC: Xidhiga Buur Madaw wax sidaa u sii ridan ma ah, anshax beeleed ayuu u xidhan yahay. Siyaasad qaran umma xidhna, Xootooyo xoola dadweyne umma xidhna. Sir Madaxtooyada ah oo bixiyeyna umma xidhna.

Qurbaawi: Oo haddaa muxuu u xidhan yahay?



Weriyaha LC: Wuxuu xidhan yahay xeer beeleed. Tiraba dhawr jeer ayuu ku xadgudbey shirkii Gar adag. Xasarad iyo Aflagaadooyin ayay beeshu ka tirsanaysaa. Xaduudii maxdax dhaqameednimada wuu ka gudbey. Sidaa daraadeed beeshuu u xidhan yahay. Waa arrin beesh u yaala oo aan qaranka khusayn.



Qurbaawi: Waar ninku xabsi beeleed kuma jiro, xabsigii qaranka ayuu ku jiraa oo lagu masruufaa. Ciidan beeleed soo qabtana beeluhu ma laha, xabsi ay ku xidhaana ma laha, siduu arrintu ku noqonaysaa kiis beeleed?

Weriye: Waayaha iyo isbedelka cusub ee KULMIYE soo kordhiyey weeyi. Wasiirada beesha ka soo jeeda ayaa ciidankii qaranka, xabsigii qaranka iyo masaariiftii qaranka u adeegsanaya in Buur Madaw lagu takooro.

Kol hadday sidaa tahay dadka qaar ayaa ku doodaya in xabsiga laga kireeyo beelaha, ciidanka qaranakana ay ammaaneystaan oo wixii xeerkooda jebiya ku soo xidhaan, kii qaadhaanka bixin waaya iyo kii maalinba beeshu afkay ku hadlayso ku hadli waayana soo garba-duuba.

Qurbaawi: Oo sidaasi Boqor af-duubis miyaanay ahayn?

Weriyaha LC: Ha, oo waxaa laga af-duubay Madaarka dhexdiisa. Loolama dhaqmin sidii muwaadin xil-haya, ha iska xasarad batee. Xasaradu denbi qaran iyo denbi qoys midna ma ah. Yako ayay mudan tahay iyo ganaax, laakiin xidhig ma mudna.

Qurbaawi: Sidee loo furdaaminayaa arrinkiisa?

Weriyaha LC: Horta maxkamad qaran lama keenayo. Wuxuu sugayaa Guddi beleed iyo shir guddoonkii Garadag ee uu ku gacan saydhay. Ciddii u Boqorka u ahaa iyo golah beesha ayaa ka wada xaajoon doona. Markay soo daayaana waxaa laga sugayaa in ay kharashkii dawlada kaga baxay jiifkii, jalkii iyo daryeelkiisii, intuu uu xidhnaa.



Garba-duubka iyo garaad-duubka Sulayman Maxamud Adan



Qurbaawi: Guddoomiyihii Guurtida iiga waran, siyaasigii gaamurey?

Weriyaha LC: Sulayman Maxamud Adan, siyaasigii brofishinalka ahaa; tan iyo Kulmiye siduu xilka ula wareegey, Hargeysa sooma caga dhigin. Waxaa la leeyahay Xanuun waa jiraa, waxna way u weheliyaan.

Qurbaawi: oo Muxuu u garba-duuban yahay?

Weriye LC: Beeshiisu way ogtahay, beelaha kalana loo sheegi maayo.

Immika iyo dana arrinta Sulayman way ka qota dheer tahay ta xamarje iyo Buurmadaw aan mar kale kaaga waramo, Salaadii bay gaadhey.