Suldaan Maxamed Suldaan Cabdiqaadir  oo Shacabka ugu baaqay inaanay Axsaabta Siyaasadda ku kala raacin hab qabiil

Suldaan Maxamed Suldaan Cabdiqaadir Suldaan Cabdilaahi oo ka mid ah Salaadiinta ugu faca-weyn Saldannaddaha Somaliland, ayaa ka hadlay Qaddiyadda gooni-isu-taagga Somaliland, isaga oo sheegay in mabda’iisu uu yahay mid ka duwan ka Shacabka. Waxaanu ka warbixiyay Shirar nabadaynta Soomaaliya ah oo uu ka-qayb galay, isla markaana wuxuu Salaadiinta dalka ugu baaqay inay isugu yimaadaan Shir.

Suldaan Maxamed Suldaan Cabdiqaadir waxa uu naqdiyay Salaadiin uu sheegay inay Xisbiyada dalka kala taageeraan, kuwaas oo uu ku tilmaamay kuwo aan go’aan ku yeelan karin arrimaha Somaliland.

Waxaanu ugu baaqay Salaadiinta dalka inay Shir isugu yimaadaan. “Salaadiinta reer Somaliland waxaan leeyahay, waxa yeeshaan sida aad maanta tihiin si maahee, Salaadiintu ha isu timaaddo oo hala wada tashado, iyaga ayuun baana leh xalka kama-dambaysta ah ee Umadda. laakiin, Nin Suldaan ah oo Xisbi la safan, go’aan kuma yeelan karo arrimaha Somaliland ee Xisbigiisaas ayuun buu ku ekaanayaa. Anagu Xisbi ma nihin, Xisbina ma raacsanin ee kii soo baxa ee guusha badan leh, ayuun baanu leenahay noolow.” Ayuu yidhi Sul. Maxamed oo dorraad ka hadlayay Munaasibad lagu caleemo-saaray Suldaan cusub oo ay yeelanayaan Beesha Deegaanka Cadaadley, taas oo Degmadaas lagu qabtay.

Suldaanku wuxuu Shacabka ugu baaqay inaanay Axsaabta Siyaasadda ku kala raacin hab qabiil, isla markaana aanu ugu ololayn. Balse, mabda’ ay ku kala raacaan. “Laakiin, taasi waxay ku xidhan tahay dadka, waar Ninkii dalka wax u qabanaya uun la socda, Ninkii aan wax u qabanayn iska dhaafa. Xisbigu waa mabda’a oo qofku wuxuu aaminsan yahay uun weeye, ee maaha kan ayaa reer hebel ah iyo kan ayaa reer hebel ah. Hadduu Qabiil idinka gelo, waynu ku dhimanaynaa ee yaanu qabiil idinka gelin, waxani waa mabda’a ee qof walowba halka aad raacsan tahay, reernimo ha ugu ololayne, qoladii kula fikrad ah uun u ururi oo u kaxee Xisbigaaga. Laakiin, haddaad reernimo ku ololayso, wixii inaga soo maray reernimo waynu ognahay. Markaa waxaan leeyahay, mabda’a Dimuqraadiyaddu wuu ka soo horjeedaa waxa Qabiilka la yidhaahdo, Qabiilna uma baannin inaynu ku dhaqano.” Ayuu yidhi Suldaan Maxamed.

Suldaan Maxamed Suldaan Cabdiqaadir waxa kale oo uu ka hadlay qaddiyadda gooni-isu-taagga Somaliland, waxaanu sheegay in inkasta oo aanu ka hor imanayn goonni-isu-taagga Somaliland, hadaana ay jirto mabda’ uu ka naamisan yahay. Isla markaana wuxuu ka warbixiyay socdaallo uu kaga qaybgalay qaar ka mid ah Shirarkii nabadaynta Soomaaliya. “Koonfur markaynu ka goosanaynay Qabiil kagamaynu goosanayn ee waxaynu xaq u lahayn ayaynu kaga goosanaynay, haddii Qabaa’il loo kala goosanayo, dee Isaaq rag badan baa ku hadhi lahaa Dawladda Xamar oo imikaba aad arkaysaan in ay ku sii socdaan. Anigu Ishaan farta ka soo geliyay, meel ay nabadi ka dhawdahay maaha (Koonfurta Soomaaliya), Carta ayaan tagay, Imbigaati Anigoo ku sii socda ayuu Nin Wasiir ahi igu dhaartay oo aan ka soo noqday. Horta ka hor iman maayo waxa dadkaygu ay doonayaan, laakiin, Mabda’ baan aaminsanahay ee maalinta ay dadku Gidaarka soo taabtaan, ayaan odhanayaa Aniguna kan ayaan aaminsanaa ee ila raaca. Waayo, Qofku wixiisa inuu sheegto dheg-xumaan ma leh, qofba wuxuu aamisanahay weeye. Haddaynu Somaliland ku gaadhi waynay 18 sannadood, waynu daba soconaynaa uun ilaa aynu soo taabano Gidaarka. Laakiin, yaan laga hadhin baan idin leeyahay oo inyar baa idiinka hadhay.” Ayuu yidhi Suldaan Maxamed Suldaan Cabdiqaadir.

Suldaan Maxamed waxa uu sheegay in dal waxa lagu hoggaamiyo ee aayihiisa lagu xukumaa ay tahay go’aanka Madax-dhaqameedka, sidaas darteed dalal ka mid ah kuwa dunida hadda la doonayo in wada-tashiga ku dhisan Odayaasha laga hirgeliyo. “Nabadgelyadaa Umaddu ay ku nooshahay ayay Caalamka oo dhanna soo eegayaan, waxay leeyihiin, dadkani (Somaliland) Afrika, Ameerika, Eeshiya iyo Yurub waxaan weli lagu dhaqmin ayuu ku dhaqmay oo dal aan Aqoonsi haysan oo nidaamkoodii samaystay oon Ilaahay mooyaane cid kale u baahnayn, halagaga daydo siday wax u qabsadeen. Imika waxa lagu dhaqayaa Pakistan, Afgaanistaan baa lagu dhaqay, Taymil-Taygariska (Sirilanka) ayaa beri lagu soo qabanayaa. Dariiqii Somaliland ay martay waa Odayaashu waxay isku af-gartaan oo ay noqonaysaa natiijada u dambaysaa. Meel Odayaashii ay ka tageen-na, meel maaha.” Ayuu yidhi Suldaan Maxamed Suldaan Cabdiqaadir Suldaan Cabdilaahi.
 

Source Ogaal