soo
gebogebaynta diiwaangelinta g/sanaag iyo
komishanka oo u guuraya burco
Guddoomiyaha Guddida
Diiwaangelinta Codbixiyayaasha Komishanka Doorashooyinka Qaranka JSL
Md. Ismaaciil Muuse Nuur ayaa sheegay in Komishanku u guurayo
Magaalada Burco Xarunta Gobolka Togdheer, halkaasi oo ay ka maamuli
doonaan hawsha diwaangelinta codbixiyayaasha Gobolka Sool.
Guddoomiyaha guddida diiwaangelinta Codbixiyayaasha ee Komishanka
Doorashooyinka Qaranka, Ismaaciil Muuse Nuur ayaa sheegay in
Komishanku u guurayo magaalada Burco ee xarunta Gobolka Togdheer
maalmaha soo socda, halkaasi oo ay ka maamuli doonaan hawsha
diwaangelinta codbixiyayaasha ee gobolka Sool oo la filayo in la
bilaabo 02/01/2009.
Guddoomiyaha Guddida Diwaangelinta Ismaaciil Muuse Nuur oo maanta u
waramayay Radio Horyaal, waxa uu sheegay in hawsha diwaangelinta
gobolka Sanaag la soo gabagabayn doono caawa saqda dhexe, isla
markaana hawl wadeenada Komishanku ay isugu iman doonaan magaalada
Burco, halkaasna ay uga ambabixi doonaan Gobolka Sool. Waxana uu
sheegay in Komishanku xarumo ku-meel-gaadh ah ay ka samaysteen
magaalada Burco, halkaas oo ay ku soo hoyanayaan agabkii iyo
shaqaalihii diiwaangelinta ee ka hawlgalay gobolka Sanaag, halkii ay
ka iman lahaayeen Hargeysa.
Goobaha Diiwaangelinta codbixiyayaasha ee gobolada Sool iyo Sanaag
ayaa la kordhiyey, iyada oo xukuumadda iyo Komishanku isla qaateen
in diiwaangelinta laga sameeyo meelo ka mid ah goboladaas oo aanay
doorashooyinku hore uga dhicin, isla markaana aan ku jirin qorshaha
lagu saleeyey diiwaangelinta ee ay maalgelinayaan deeqbixiyayaashu,
balse, xukuumaddu sheegtay inay bixinayso kharashka ku baxaya.
Goobaha cusub ee la kordhiyey ayaa gobolka Sanaag, waxa ka dhashay
xasaasiyad iyo xiisad, waxaana ka suuragalay dhawr goobood oo
deegaamada Dhahar iyo Badhan ah oo ay shalay iyo dorraad ka
bilaabantay diiwaangelintu.
Hase yeeshee, gobolka Sool oo loo kordhiyey 68 goobood oo cusub ayaa
Guddoomiyaha Guddida Diiwaangelintu waxa uu sheegay inuu rajeynayo
in Gobolka Sool aanay wax caqabado ahi ka iman doonin goobaha la
kordhiyey, si nabadgelyo ahna ay uga wada qabsoomi doonto.
Goobahaas la kordhiyey ee gobolka Sool waxa ku jira qaybo ka mid ah
degmada Buuhoodle oo ka tirsan Gobolka Togdheer. Guddoomiyaha
Guddida Diiwaangelinta oo la weydiiyey maadaama degmadaasi ka tirsan
tahay Gobolka Togdheer oo diiwaangelintu hore uga qabsoontay, sida
loo raaciyey gobolka Sool, waxa uu sheegay in goobaha Buuhoodle ay
yihiin meelihii aanay hore doorashooyinku uga dhici jirin, isla
markaana tirada ka soo baxda goobahaas lagu dari doono tirada
gobolka Togdheer.
Dhinaca kale Xasan Maxamed Cumar Looshade oo ka mid ah xubnaha
Komishanka doorashooyinka Qaranka ayaa sheegay in 30 goobood oo ka
mid ah goobaha diwaangelinta ee degmooyinka Badhan iyo Dhahar ee
bariga Sanaag loo kordhiyay muddo hal maalin ah in diwaangelintu ka
sii socoto, maadaama oo dib u dhac ku yimi wakhtigii ay
diwaangelintu ka bilaabmi lahayd. Labadaa degmo ayaa diiwaangelintu
ka bilaabantay Sabtidii iyo Axaddii shalay.
Xasan Looshade waxa kale oo uu sheegay in goobaha kale ee
diwaangelinta Gobolka Sanaag la soo gabagabayn doono caawa saqda
dhexe oo ku eeg wakhtigii loo qoondeeyay hawsha diwaangelinta
gobolka Sanaag. Waxaana laga filayaa caawa inay ku dhawaaqaan
natiijada hordhaca ah ee tirada dadka iska diiwaangeliyey gobolkaas.
Source: Somaliland.Org
|