Somaliland oo lagu Martiqaaday Shirka Maal-gelinta ee Djibouti

 

Waxa beryahan dambe ifaafaalaheeda la arkayaa xidhiidhka Somaliland iyo France oo sii xoogaysanaya. Lixdii bilood ee u dambeeyey waxa Somaliland booqasho ku yimid ilaa 3 wefti oo ka socda safraaradaha Faransiiska ee Geeska Afrika.

Waxa sidoo kale bilaabmay dhaqdhaqaaq ay dawladda Fransisku ku taageerayso dadka Afka Fransiska ku hadla ee reer Somaliland ama kuwii hore ciidamada Fransiska ka tirsanaan jiray.

Waxa sanadkii hore ka dhacay magaaladda Paris shirweyne Fransisku kaga hadlayey maalgelinta Djibouti iyo Geeska Afrika kaas oo Somaliland laga casuumay. Qaybtii labaad ee Shirkaas ayaa bishan March 13da ka dhacaysa magaalada Djibouti. Sidaanu ilo xogogaal ah oo ka tirsan safaaradaha France ka helnay, waxa si rasmi ah loogu casuumay shirkaa ka dhacaya Djibouti xukuumadda Somaliland khaas ahaan rugta Ganacsiga. Waxana la filayaa in Somaliland halkaa u dirto wefti balaadhan oo dhawr wasaaradood ka qaybqaadan doonaan khaas ahaan macdanta iyo biyaha oo la filayo inay soo bandhigaan macluumaadkii laga sameeyey sahanka shidaalka Somaliland.

Wararku waxa kale oo ay sheegayaan in ka dib shirkaas wefti ka socda aqalka sare (Senet-ka) Fransisku uu booqasho ku iman doono Somaliland. Intaa ka hor waxa Somaliland soo gaadhi doona wefti kale oo hordhac ah oo la xidhiidha deeq bixinta khaas ahaan qaybta waxbarashada luqada fransiska.

 

 

Waaheen