Somaliland kursigeeda
sida loo koraa waa sibiq, sida looga degaase waa Silan !
Yaase
ka masul ah arintaasi ?
Waa la kordhinayaa iyo maya ee la
kordhin maayo mudada xilka ay madaxweynaha Somaliland iyo ku
xigeenkiisu hayaan, ayaa hadana gunaad iyo dhulux cusub oo kaar
badan inagu haya ah, waa xumada iyo laxawga garaaciisu hada ina
saaqsan yahay, ee aan carcartooda ka seexan la' nahay, hadaadse si
kale wax u eegto waxad arkaysaa,inay sidani caado u noqotay qarankan
yaree curdinka ah, oo wacad, axdi iyo balan la galaa aanay intaba ka
shaqayn Somaliland, bal dib u raac sooyaalka iyo taariikhda dalkan
Hooyo ee Somaliland, een aduunyada ku garamayno way jirtaa iyo ma
jirto, waar bal meeshan eega cagtaba loo dhigi la' yahay ee la
diidan yahay inay yara xasisho iyo, in sharciga iyo xeerasha la
samaystay tamariyaan oo shaqeeyaan, yaab!, Si aad iila garato
sheekadayda bal dib u eeg intii ay jirtay Somaliland oo ah 18 gu',
iyo sida kolba tururntuo iyo suuldaaro loogu qonafayo, ay ku
tukhaantukhooto oo dee malaha Allah ha sahlo e laba doonayo inay
dhulka jag ku tidhaa ooy kala firidhoba.
- Ugu horayn, 18-kii bishii shanaad ee 1991-kii ( Burco) ayaa ay
ahayd markii beelaha ku nool Somaliland oo dhami isla qaateen inay
dib ula soo noqdaan jiritaankii qaranimadoodii Somaliland ee ay
lixdankii ( 1960 kii ) ka qaateen Ingiriiska, gudoon iyo qabuul iyo
beerkeena burcad la isku mari ayaa lagu bilaysimay, waa hagaag e,
yaa hadaba loo dhiibaa maamulka ayaa la is waydiiyay? waxa la isla
gartay in SNM lagu baxnaaniyo doorkan oo ay dalka hogaamiso laba gu'
yood oo soo naqan doona, waa 1991-1993-kii, markaana ku wareejiso
talada dalka Shacabka, waa qaadanay ayaa la isla gartay iyo gudoon,
dhexdaanay u xidhatay SNM, inay oofiso balantii, habase yeeshee hada
ku noqon mayno waxii dhacaye sidii shanqadhyarida ahayd ee ay ku
koreen kursiga oo kale ugama degin SNM nimankii magaceeda ku qabtay
talada!.
- Markii labaad hadana, 1993-kii ( Boorama) waa kuwii waxgaradka iyo
duqaytida dadka reer Somaliland oo dhami isla qaateen in isbedel
dalku u baahan yahay, ee xilkii madaxweynenimo Allah ha u naxariisto
labadaba-e, C/raxmaan Maxamad Cali iyo Maxamad X. Ibraahim Cigaal,
loo kala wareejiyay, taasi ka dibna tiiyoo dhawr jeer la kordhiyay
xiligii maamulkii Cigaal uu garta iyo dawga u lahaa, oo dadka qaar
saluugsan yahay sida ay wax u socdaan, oo ay ku eedaynayaan
golayaasha, cadaalad daro iyo xil-gudasho la i, iyo weliba inay u
dabran yahiin madaxtooyada oo qas badan iyo qaylo door ahi taagan
tahay ayuu Hoyday oo uu geeriyooday Marxuum Maxamad X. Ibraahim
Cigaal-na Allah ha u naxariisto-e .
- Markii sedexaad, 2002-dii ( Hargaysa) geeridii madaxweyne Cigaal (
Ahun) ka dib, ayaa si ku meel gaadh ah loogu sii dhiibay talada
dalka madaxweyne ku xigeenkii xiligaa oo ahaa Daahir Riyaale, isla
hal gu' ka dibna waxa la qabtay doorashooyin, uu hadana siday
doontoba ha noqotee uu ku soo baxay mudane Daahir Riyaale Kaahin,
xiligii u suntanaa isna xilka hayntiisa ee loo xariiqay oo ahayd
shana sano, waa la soo dhaafay oo waxay ahayd 2008-dii, waxa loogu
daray hadana, hal gu' oo kale sababtii kasta ee doontaaba ha keentee,
kiina waa la isla soo dhaafay oo hadana waxan maqlaynaa 6-bilood oo
hor leh ayaa loogu qaraf siiyay shalay, oo ay taariikhdu ahayd
28-kii bishii sedexaad ee 2009-ka ! waxa ka danbeeya 6-daa biloodna
Allah ayaa og sida ay noqonayso.
- Markaad hadaba sidaa u yara hoomaydo eed u eegto, sida ay 3-da
madaxweyne ee reer Somaliland soo maray/ yeesheen ku koreen kursiga,
maanay cadayn inay marka hore si sibiq ah madasha ku yimaadaan
siyaasiyiintaasi, marka danbese tagistoodu adkaato ! yaase ugu wacan
baad u malaynaysaa taasi? waa dadka shacabka ah oon weli si dhab ah
u garan ama u dareemin qaran-nimadu waxay tahay, ee nin jeclaysiga
Qabiilka iyo Beelaysigu ku salaysani kala wayn tahay taas, waana
bartaa halka ay ka wareeman tahay Maandeeq ee hedeeda iyo wadkeedaba
noqonaysaa hadaan laga waantoobin.
- Gabagaboda, waxan odhan lahaa, malaha hadal lama daayee, yaa
damaanad qaadaya in lix bilood ka dib doorasho aan qabyo lahayni
dhacayso? jawaabtu waa cidna, Nin baa laga hayaa '' walee beerta aan
biqilkeeda arkayaanan bohol ka buuxin ", ma doorashada gudideeda iyo
dawladeedu ay kuwaan ogahay yahiin baa habsami ku dhamaan? ha u
fadhiyin !, Allah ha sahlo, dadka reer Somaliland-na iyagaa ku wax
la',waa ( Karis xun iyana ku wax la'), kuwaasaaban lahayn iska wax u
qabso iyo tabaruc maxay dalka ugu dhisan waayeen?.
Somaliland ha
Jirto oo ha Joogto.
|