Somali Week Festival 2009
Jimce 23 - Khamiis 29 Oktoober - Oxford House,
Derbyshire Street, Bethnal Green, London E2 6HG
Debbaaldegga Toddobaadka Fanka iyo Suugaanta Soomaalida 2009
Kayd Somali Artist and Culture iyo REDSEA-ONLINE.COM waxay si wada
jir ah kuugu soo bandhigayaan Debbaaldegga Toddobaadka Fanka iyo
Suugaanta Soomaalida ee sannadlaha ah, kana dhaca Landhan, UK.
Debbaaldaggu wuxuu bilaabmayaa sannadkan maalinta Jimcaha, 23
Oktoobar soconayaana ilaa Khamiista 29 Oktoobar 2009; wuxuu ka mid
yahay sidii caadada ahayd xuska taariikhda dadka madow ee waddanka
Biritayn ee ka dhaca bisha Oktoobar.
Debbaaldegga Toddobaadka Soomaalida ee 2009, waxa aannu ku
martiqaadaynaa la kulanka iyo isbarashada abwaanno socoto inoogu
yimi iyo aqoonyahanno soo bandhigi doona waxqabadkooda, qeexidoona
oo ka doodidoona waxsoosaarkooda iyo kuwo jaalkood, iyada oo
dadweynuhuna qayb ka yahay. Waxaa kale oo la soo bandhigayaa filimo
Fanka iyo Masraxa Soomaaliyeed ee Jabbuuti oo uu diyaariyey Cabdalle
Xaaji oo ka socda TV Qaranka ee Jabbuuti, iyo muuqaallo
(documentary) kale.
Ujeeddooyinka ugu waawayn ee Toddobaadkan waxaa ka mid ah in la
dhiirrigeliyo oo la taageero farshaxan-yahanka Soomaalida ee soo
kacaya iyo in la suurtageliyo aqoon isweydaarsi dhexmara
farshaxan-yahanka soo koraya iyo kuwa taabbaqaadka ah, kuwo UK
saldhig u tahay iyo kuwo dalalka Soomaalidu degto ka yimi intaba.
Waxa kale oo aannu sii xoojin doonnaa in aannu dhiirrigelinno
ahmiyadda farshaxanka Soomaaligu u leeyahay guud ahaan bulshada
Soomaalida.
Halqabsiga sanadkani wuxuu mar kale beegsanayaa faafreebka. Faafreeb,
qeexiddiisa guud ahaaneed, waxay tilmaamaysaa joojin ama horistaagid
fikradaha qof ama koox. Faafreebistu ma aha qiimayn dhab aha ama
faaqidaad taban oo ku saabsan fikirka laga hadlayo saxnimadiisa ama
gefnimadiisada. Waxa faafreebka ku kici kara cid kasta, ha ahaadeen
madax dawladeed, ururro gaar ah, maamulka xubin warbaahineed,
qorayaasha iyo mararka qaarkood farshaxanyahannada laftooda.
Mawduuca iyo toddobaadkaba waxaa gardaadinaya Rashiid Sheekh
Cabdillaahi “Rashiid Gadhwayne”, kaas oo eray kooban ku ibafuri
doona arrimaha la xidhiidha Iscabbirka. Waxa la isla eegi doonaa
“waa maxay faa’iidada ama khasaaraha ku jira iscabirka xorta ah ama
la’aantiisa”.
Waxa doodaas lagu lafagurayo arrimaha la xidhiidha faafreebka iyo
cabudhiska ka qayb qaadanaya aqoonyahanno iyo hal-abuur ay ka mid
yihiin Rashiid Sheekh Cabdillaahi, Cali Banfas, Sheekh Maxamuud
Sheekh Dalmar iyo Baarleex waxaa halkaas lagaga doodayaa
waaya’aragnimadii kala duwanayd ee ay shakhsiyadahaasi soo mareen
xilliyadii kala duwanaa, iyo weliba qaababka kala duwan ee
faafreebku ahaan karo iyo siyaabihii ay ula kala macaammileen
xaladahaas soo waajahay.
Toddobaadkan oo isugu jiri doona bandhigyo kale sida: tix (gabay),
bandhig suugaaneedyo, falanqayn buugaag, miyuusig, riwaayad iyo
majaajilo, kuwaas oo wadajir loo soo bandhigi doono, waxa iska
kaashanaya abwaanno, qoreyaal, heesaa iyo dhegeyste ay ka midka
yihiin: Aamina Cabdilahi, Kinsi Haaji Aden, Cabdalle Xaaji, Baarleex,
Axmed Saleebaan Bidde, Cali Banfas, Boon Xirsi, Xasan Cabdi Madar,
Cabdiraxman Yuusuf Carten, Mahamed Jaamac “Kayd”, Sheekh Maxamoud
Dalmar, Rashiid Sheekh Cabdillaahi “Gadhwayne”, Maryan Mursal Ciise,
Cabdi Bahdoon, Nimco Deggan, Nimco Yasin, Cabdikariim Raas, Prince
Cabdi , Martin Orwin, Jaamac Muuse Jaamac, Mahamed Hassan "Alto",
Cabdillaahi Cawed Cige, Mahamed Baashe X Xasan, Aar, Dararamle,
Xudaydi, Beeldaaje, Saciiid Jaamac, iyo kuwo kale oo badan.
Nagala soo qayb gal debaaldeggan Todobaadka Fanka iyo Suugaanta
Soomaalida. Wixii faah faahina ama isbeddel ah kala soco:
www.redsea-online.com iyo
www.kayd.org.
Waxaad kale oo kala soo xidhiidhi kartaa teleefonka
07903712949 ama u dir email
agaasimaha bandhigga
ayan_mahamoud@kayd.org
|