Shirkadda
Oomaar oo Raashin ugu Deeqdey Xarunta Agoomaha
Gabiley
Shirkadda ganacsiga ee Oomaar Company, ayaa shalay kaalmo raashin ah
ugu deeqday xarunta Agoomaha ee degmada Gabiley.
Raashinka shirkaddu siisay xarunta agoomaha Gabiley oo ah mid ay ugu
talogashay waqtiga bisha barakaysan ee Ramadaan waxa u ka kooban
yahay 50 kiish oo bariis ah, 50 kiish daqiir ah, 30 kiish sonkor ah,
30 kartoon caano ah, 50 jirkaan oo saliid ah.
Badhasaabka Gobolka Gabiley Mr. Maxamed Axmed Aw Cabdi (Xabiib),
ayaa hadal kooban oo uu munaasibaddii guddoonsiinta raashinka ka
jeediyey, waxa uu si weyn ugu mahadceliyey shirkadda Oomar oo uu
sheegay inay sannad walba kaalmo siiso xarunta agoomaha Gabiley,
taas oo ah mid aad u culus miisaankeedana leh iyadoo aanay shirkaddu
ku koobnayn buu yidhi raashinka oo keliya, balse ay siiso waxyaabo
badan oo ay ka mid yihiin iidaanka raashinka, Qaloodiga xoolaha iyo
dhar iyo kabo, sidaa darteedna looga baahan yahay dadwaynaha reer
Gabiley gudo iyo dibedba inay kaga daydaan tallaabada tallaabadaa
shirkaddu qaaday oo ay siiyaan xarunta agoomaha wixii ay u qaban
karayaan.
Maamulaha Xarunta Agoomaha Gabiley Mr. Cumar Cabdi Muxumed (Cumar
Dheere), ayaa isaguna si weyn ugu mahadnaqay Oomar Company, isagoo
sheegay in waxqabadka xarunta agoomaha ee shirkaddu uu yahay mid
kaalin wayn ugu jira oo aan ku koobnayn raashinka ay sannad walba
cunaan iyo iidaankiisa, balse u dheer tahay deeqo isdaba jooga ah oo
ay siiso xarunta agoomaha Gabiley, sida gharka, kabaha iyo dhismaha
hool weyn oo xarunta dhexdeeda dhawaan shirkaddu hirgelisay, taas oo
uu xusay inay ka danbaysay ballanqaad uu sameeyay mulkiilaha Jaamac
Oomar.
“Mahad weyn baanu u haynaa haddaanu nahay masuuliyiinta xarunta
agoomaha Gabiley, guud ahaana dadka reer Gabiley waxaan leeyahay
tusaale wayn ha idiin noqoto oo aad kaga dayataan Jaamac Oomar Seed
si aad idinkuna wax ugu qabataan carruurtiina,” ayuu yidhi maamuluhu.
Waxa kale oo isaguna ka hadlay Cabdillaahi Faarax oo ka mid
wakiillada shirkadda Oomar Company ee Gabiley oo sheegay inay
dardaaran wayn ku qabaan ilaalinta iyo ka warhaynta xarunta Agoomaha
Gabiley oo aan ku koobanayn oo keliya sannad walba marka xilligan oo
kale raashiinka la siinayo balse nalagu amray inaanu wax kasta oo ay
u baahdaan siino.
Maaha markii ugu horreysay ee shirkadda Oomar deeq noocan ah siiso
agoomaha Gabiley, haseyeeshee sannad walba waqtigan oo kale ayey
deeqdan oo kale siisaa, iyadoo shirkaddu si weyn uga warhaysa
xaruntaas.
Jidka Weyn ee Badhtamaha Gabiley oo Dib loo Dhisayo
Gabiley (Jam)- Jidka weyn ee badhtamaha magaalada Gabiley, ayaa
shalay lagu bilaabay in dib loo hagaajiyo, kaas oo burburay oo u
baahnaa in wax laga qabto.
Dawladda hoose ee Gabiley ayaa shalay subax bilawday inay dib-u-dhisaan
jidka wayn ee badhtamaha magaalada oo wax yar ka sii hadhsanaayee
burburkiisa, waxana barqadii la geliyay cagaf labada haad ee jidkaas
oo laga guray ciidda si loo simo loona hagaajiyo.
Waxa isa soo tarayey dhawaanahan yididiilooyin hor leh oo uu gobolku
horseed u yahay, kaas oo ay ku dhiirradeen dawladda hoose inay wax
ka qabtaan horumarinta bilicda magaalada Gabiley oo kor loo qaaday,
iyadoo kawaan cusub dhawaan loo furay hilibleyaasha Gabiley,
qashinka magaalada olole ballaadhan lagu qaaday gaadhi iska rogo
ahna loo iibiyay dawladda hoose qaybta nadaafada iyo bilicda.
Haddaba, jidkan laamiga ah ee cusub oo noqon doona lafdhabarta
magaalo-madaxda Gobolka Gabiley, ayaa maalinba maalinta ka danbaysa
sii burubayey cid hore wax uga qabtayna aanay jirin, taas oo ay
maamulka dawladda hoose xil iska saareen sidii loo hagaajin lahaa
jidkaas oo ah halbowlaha bilicda magaalada Gabiley.
Waxa dib-u-dhiska jidkaas laga bilaabay inta u dhexaysa isgoyska
waddada sare ee New Gabiley ilaa khayriyada oo qiyaastii ilaa hal km
oo dherer ah, sida ay xaqiijisay Maayar/xigeenka Gabiley Marwo
Khadra X.ismaaciil Yoonis (Khadra Xaaji Gaydh), waxana dhinaca
qalabka ka caawiyey maayarka caasimadda Hargeysa Eng. Xuseen
Maxamuud Jiciir.
Source:Jamhuuriya Online
|