Saraakiil ka Socda
Sirdoonka Jarmalka oo Qarsoodi ku Yimi
Somaliland
Shan xubnood oo ka socda
Sirdoonka dalka Jarmalka, ayaa socdaal qarsoodi ah shalay ku yimi
caasimadda Somaliland ee Hargeysa.
Ma jiro wax war ah oo ay xukuumaddu ka soo saartay saraakiisha
sirdoonka ah ee ka socda dalka Jarmalka, hase ahaatee sida ay
Jamhuuriya u xalay xaqiijiyeen ilo xogogaal ah waxa weftigu shalay
ka soo dageen Madaarka Egal International Airport ee magaalada
Hargeysa, isla markaana la socday diyaarad ay leedahay hay’adda
Qaramada Midoobay ee ECHO.
Weftiga saraakiisha ka tirsan sirdoonka dawladda Jarmalka, waxa
Madaarka ku soo dhoweeyey taliyeyaasha Sirdoonka Qaranka iyo
ciidanka Booliska, Mr. Maxamed Nuur iyo Maxamed Saqadhi Dubbad,
kuwaas oo u soo gelbiyey dhinaca gudaha caasimadda oo loo soo
galbiyey dhinaca caasimadda, balse ilaa hadda lama rasmi ahaan
goobta la dejiyey.
Taliyaha Booliska Somaliland oo Jamhuuriya khadka telefoonka xalay
ku weydiiyey socdaalka saraakiisha sirdoonka Jarmalka iyo ujeeddada
safarkooda, ayaa afka ka xidhay inuu tafaasiil ah bixiyo arrintaas,
waxaannu si kooban u yidhi; “Adeer, nimankaa aad sheegayso anigu
shaqo kuma lihiye waydii xafiisyada ku shaqada leh.”
Sidoo kale, masuuliyiinta Wasaaradda Daakhiliga iyo Taliyaha
Sirdoonka Qaranka oo aannu isku daynay in aannu la xidhiidhno si wax
looga weydiiyo ujeeddada safarka saraakiisha ka tirsan
mukhaabaraadka Jarmalka ayaanay noo suurtogelin in aannu telefoon ku
helno.
Socdaalka saraakiisha ka socda sirdoonka Jarmalka oo aan si rasmi ah
loo ogayn ujeeddadiisa, ayaa la tuhusan yahay inuu salka ku hayo
baadhitaannada la xidhiidha weerarradii argagixiso ee 29 October
2008, waxa la filayaa in safarkoodu ku qotomi sidii ay Somaliland
uga caawin lahaayeen baadhitaanka ciddii ka dambaysay qaraxyadii
axmaqnimada ahaa ee lala beegsaday xarunta Madaxtooyada, Safaaradda
Itoobiya iyo xafiiska UNDP ee magaalada Hargeysa.
Geesta kale, sida uu saxaafadda u xaqiijiyey Wakiilka Somaliland u
fadhiya dalka Kenya, waxa horraantii toddobaadkii socdaal qarsoodi
ah dalka ku yimi xubno ka tirsan hay’adda CIA-da dalka Maraykanka,
kuwaasoo ujeeddada socdaalkoodu la xidhiidho baadhitaannada
weerarradii argagixiso ee dadka badan ku waxyeelloobeen.
Waddamada beesha caalamka oo Maraykanku ka mid yahay ayaa
qaraxyadaas kadib ku dhawaaqay inay Somaliland gacan ka siinayaan
hawlaha baadhitaannada la wado ee la xidhiidha weerarradaas iyo sida
oo kale la-dagaallanka iyo ka hortagga argagixiso.
Jamhuuriya Online
|