Safiirka Ingiriiska Ee
Itoobiya Oo Socdaal Gaaban Ku yimid Somaliland Iyo Ujeedada
Kulamadii Uu La Yeeshay Dhinacyada Siyaasada
Danjiraha dawlada Britain ee
dalka Itoobiya, Mr Norman Ling, iyo wefti uu hogaaminayo ayaa
galabta socdaal gaaban oo la xidhiidha u kuur gelida asbaabaha dib u
dhaca doorashada keentay iyo u diyaar garowga doorashada
madaxtooyada ku yimid Somaliland.
Wefdiga safiirka Ingiriiska oo ay xubno ka yihiin afar dublamaasi oo
ka socda safaarada Ingiriiska ee Itoobiya, wuxuu socdaalkiisa ku
sifeeyay mid uu ku darsayay qaabka u diyaar garowga doorashada
madaxtooyada Somaliland iyo asbaabaha keenay inuu dib u uga dhacdo
xilligii hore loogu cayimay ee 29-ka bishan March.
Safiirku wuxuu sheegay inay danaynayaan dimuqraadiyada Somaliland
wixii khilaaf ee ka jira dalkana lagu waajaho wada hadal, isagoo
tilmaamay in ay u arkaan in meel dhexe la isugu yimaado.
Norman Ling, wuxuu kulamo gooni gooni ah la yeeshay saddexda xisbi
qaran ee UDUB, KULMIYE iyo UCID, guddiga doorashooyinka Somaliland,
shirgudoonka aqalka odayaasha, qaar ka mid ah dadka reer Somaliland
ee haysta dhalashada Britain, hay’adaha deeqbixiyayaashu ay
kharashaadka doorashooyinka u soo mariyaan Somaliland iyo
masuuliyiinta wasaaradda duulista hawada iyo gaadiidka cirka.
Masuuliyiinta dhinacyada uu wefdiga safiirku la kulmay ayaa sheegay
in ay u gudbiyeen maqqifkooda iyo qaabka ay u arkeen in xal lagu
gaadhayo.
Socdaalka Danjirahan ayaa ku soo beegmay xili uu muran dastuuri ahi
ka taagan yahay dib u dhaca doorashooyinka, oo xisbiga ugu awooda
badan mucaaridka ee KULMIYE uu gaashaanka ku dhuftay wakhtiga cusub
ee komishanku u cayimeen doorashada oo ah 31 ka bisha May ee foodda
inagu soo haysa.
Ramaasnews
|