Saan-saan Colaadeed oo ka soo korodhay Gobolka Selel, hal qof oo
Xariirad lagu dilay iyo Laascaanood oo Nin Shicib ah aano shalay
lagu Khaarajiyay
xariirad Maleeshiyo Beeleedyo isku horfadhiya Nawaaxiga Xariirad iyo
wararkii u dambeeyay ee Khasaaraha iska hor-imaad shalay dhex maray
Laascaanood(TNN)-Dablay Hubaysan oo aan haybtooda la aqoonsan ayaa
shalay aroornimadii Nin socota ahaa ku dilay Duleedka Magaalada
Laascaanood ee gobolka Sool, kaasoo sida la sheegay ay hiirtii hore
toogteen laba Nin oo hubaysan.
Marxuumka la dilay oo sida la sheegay ay walaalo ahaayeen Sarkaal ka
tirsan Ciidamada qaranka ee Jiidaha Bariga, ayaa wade ka ahaa gaadhi
nooca xamuulka qaada ah oo ka yimi dhinaca Beled-weyne, waxaana
wararku sheegayaan in lagu toogtay Tuulo wax yar u jirta Laascaanood
oo uu habeen hore gaadhigu ku hoyday.
Ma jiro wax wara oo ka soo baxay Laamaha amaanka Gobolka Sool iyo
Maamulka Gobolka toona oo ku saabsan sababta Marxuumka loo dilay iyo
in la soo qabtay Dablaydii dishay, balse warar aanu ka helnay
Magaalada Laascaanood ayaa sheegaya inaan la soo qaban gacan
ku-dhiiglayaashii dilkaasi geystay, kuwaasoo wararka qaar
tibaaxayaan inay Aano hore u dileen Marxuumka.
Aanadaasoo ah mid la xidhiidha Sarkaalka ay walaalaha yihiin oo sida
loo tirinayo ay Kooxda Khaatumo u aqoonsatay inay walaalo yihiin.
Dhinaca kale, saan-saan Colaadeed ayaa laga dareemayaa degmada
Xariirad iyo deegaamada hoos yimaada, ka dib markii shalay gelinkii
dambe hal qof lagu dilay, laba kale lagu dhaawacay meel wax yar u
jirta Magaalada Xariirad.
Dhimashada halka qof iyo kuwa dhaawacmay ayaa warar kala duwan oo
laga helay deegamadaasi sheegayaan inay ka dambeeyeen Maleeshiyo
Beeleed Beesha Ciise ka soo jeeda oo beryahanba deegaamadaasi lagu
sheegayay, kuwaasoo wararka qaar sheegayaan inay isku dhaceen
Maleeshiyo beeleed kale oo halkaasi ku sugnayd.
Isku dhacan labada maleeshiyo ayaa lagu soo waramayaa inay dhalisay
saan-saan colaadeed oo deegaankaasi laga dareemayay saacadihii la
soo dhaafay, wallow sida lagu soo waramayo ciidamo Milateri ah la
kala dhex dhigay labada maleeshiyo.
Ma jirto ilaa hada wax talaabo ah oo ay xukuumadda Madaxweyne
Siilaanyo qaaday si arinta loo qaboojiyo iyo war ka soo baxay oo la
xidhiidha mushkiladaasi, aan ka ahayn Ciidamada la kala dhex dhigay
labada Maleeshiyo.
Source: Waaheen
|