Rayaale oo Mar Labaad Dib ugu Celiyay KULMIYE Xubintii uu Komishanka u soo Xulay

Axmed-Siilaanyo oo ku eedeeyey Madaxweynaha inuu ka baxay ballan ay wada galeen Isniintii

Hargeysa (Longlivesomaliland News)- Madaxweyne Daahir Rayaale Kaahin, ayaa mar labaad shalay dib u celiyey xubinta uu xisbiga mucaaradka ah ee KULMIYE u soo xulay Komishanka Doorashooyinka cusub, isla markaana la ka dalbay in xisbigu soo beddelo.

Sidaa waxa u xaqiijiyay warbaahinta Guddoomiyaha xisbiga KULMIYE Axmed Maxamed Maxamuud (Siilaanyo) oo saxaafaddu weydiisay waxa ka jira in Madaxweyne Rayaale mar labaad dib ugu celiyay xubintii ay u soo magacaabeen inay u matasho Komishanka Doorashooyinka ee hadda dhismaheeda lagu jiro.

Guddoomiye Siilaanyo waxa uu intaa ku daray in Madaxweyne Rayaale kulan uu shalay kula yeeshay Qasrigiisa Madaxtooyada kaga heshiiyeen inaan dib loo soo celin haweenayda uu xisbiga KULMIYE u soo xulay Komishanka cusub, isla markaana Madaxweynuhu kaga baxay ballan ay isku ogaayeen oo uu shalay buriyay, mar labaadna dib ugu soo celiyay xubinta ay heshiiska ka gaadheen Isniintii.

Waxa kale oo uu Axmed-Siilaanyo sheegay inay xisbi ahaan kulan degdeg ah ka yeesheen arrintan, sida ugu dhakhsaha badanna go’aan uga soo saari doonaan mawqifkooda ku aaddan dib u soo celinta xubintaas oo uu xusay in KULMIYE shir uga fadhiyo wakhtigan wixii ay ka yeeli lahaayeen.

Waa markii labaad ee toddobaadkan gudihiisa ee Madaxweyne Rayaale dib u celiyo haweenayda xisbiga KULMIYE u soo magacaabay inay ka mid noqoto Komishanka Doorashooyinka ee cusub. Xubintan oo magaceeda la yidhaahdo Ilhaan Maxamed Jaamac waxa Madaxweyne Rayaale ku eedeeyay inay ka mid tahay guddiga fulinta ee xisbiga KULMIYE.

Haseyeeshee, Guddoomiyaha KULMIYE ayaa isagu ku dooday in Marwo Ilhaan wakhti hore iska casishay xilkii ay ka haysay xisbiga, sharciyanna Madaxweynuhu aannu xaq u lahayn inuu kala shaandheeyo xubnaha loo soo xulo Komishanka ee ka yimaadda dhinacyada xaqa u leh soo magacaabiddooda, balse kaliya cidda go’aan ka gaadhi karta kala shaandhaynta amma ansixinta Guddiga Doorashooyinka loo soo magacaabo uu yahay Golaha Wakiillada kadib marka Madaxweynuhu u gudbiyo.

Dhinaca kale, Madaxweyne Rayaale ayaan isagu ilaa hadda soo magacaabin saddex xubnood oo xeerka doorashooyinku u jideeyay inuu Komishanka u soo xulo, hase ahaatee afarta xubnood ee ilaa hadda loo soo xulay waxa ay kala yimaaddeen labada xisbi mucaaridku soo magacaabeen iyo laba Golaha Guurtida ka yimi.







Source: Jamhuuriya Online