Rayaale
iyo Salaadiinta Sacad Muuse oo Wadahadal
Xasaasi ah ka Yeeshay
Xuduudaha Deegaannada Waqooyiga
Hargeysa iyo Gabiley
Salaadiin iyo cuqaal ka tirsan beelaha Sacad Muuse ayaa habeenkii
Arbacadu soo galaysay xarunta madaxtooyada kulan kula yeeshay
Madaxweynaha Jamhuuriyadda Somaliland Md. Daahir Rayaale Kaahin,
kaas oo ay Jamhuuriya u xaqiijiyeen ilo xogogaal ah oo kulankaa ku
dhadhawaa.
Madax-dhaqameedyadu ugu gudbiyeen Madaxweynaha codsi ku waajahan
deegaannada Waqooyiga Gobolka Hargeysa iyo Gabiley loogu salayn
lahaa nidaamkii lixdankii eek ala xaddaynta gobollada iyo
degmooyinka.
Kulankan oo ay ka qaybgaleen siddeed suldaan, cuqaalo, culimo iyo
odayaal ka tirsan beesha Sacad Muuse ayaa sida ay ilahaasi sheegeen
waxay xubnaha beeshu Madaxweynaha u gudbiyeen qoraal ay kaga
digayaan in halis weyni ka dhalan karto xilligan oo ay dalka ka
socdaan hawsha diiwaangelinta ay ka iman karto deegaannada Waqooyiga
Hargeysa iyo Gabiley, kuwaas oo hore uu muran weyne uga taagnaa,
isla markaana la sheegay in la raaciyey gobollada Awdal iyo Salal.
Beesha ayaa ilahaasi tibaaxen si looga hortago khatarta arrintan ay
dhinacooda ku taliyeen in lagu dhaqmo sida uu dhigayo nidaamkii
lixdankii eek ala xadaynta gobollada iyo degmooyinka, isla markaana
deegaan walba la raaciyo gobolkii ama degmadii uu ka tirsanaa.
Haseyeeshee waxa la sheegay in Madaxweyne Daahir Rayaale Kaahin
aannu aqbalin taladii ay ula tageen madax-dhaqmeedyadu, isla
markaana uu ku wargeliyey in lagu dhaqmayo sida sharcigu dhigayo,
sharcigaas oo aannu caddayn kii lixdankii iyo mid kale toona.
Dhinaca kale, waxay oday-dhaqameedyadu arrintan shalay kulan kala
yeesheen xubnaha Golaha Wasiirrada ugu jira beesha, kaas oo ay
wararku xuseen in aad la isugu tusaaleeyey sidii xal looga gaadhi
lahaa arrintan xaasaasiga ah, balse waxay iluhu xuseen in aan
kulankaa wax natiijo ahi ka soo bixin.
Xiisadda muranka deegaannadan ayaa si weyn u soo if baxday
xilliyadii ay ku beegnaayeen doorashooyinkii dalka ka dhacay, kuwaas
oo xayiraad la saaray iyada oo aan wax xal ah laga gaadhin dhinaca
ay raacayeen, isla markaana aanay wax doorasho ahi ka dhicin.
Jamhuuriya Online
|