Rag Allow,Guushii Laga Soo Hooyey Saddexdii Doorasho Ee Komishankii Hore, Iyagoo Isku Duuban Ay Libtooda Lahaayeen,Maxaa Rayaale Gaarka U Siiyey

Horta, Komishankii hore, waxa guddoon u ahaa inaysan ka hadlin oo ay iska dha afaan, wixii lib sheegasho ah oo aysan soo qaadin wax-qabadkoodii hawleed, tan iyo muddadii shanta sano ahayd ee ay xilka Doorasho hayeen, iskana liqaan fool-xumadii iyo xormo darradii uu Madaxweyne Rayaale kula dul kufay, iyagoo ka duulaya murtida aragtida maNno sheegasho la’aanta ah ee tidhaahda “laa shukur calal waajib”. Hase yeeshee, waxa iyana hore loo yidhi, haddii lagu shee go waa laysi Sheelaa, haddiise lagu sheegi waayo waa laysi sheegaa.!

 Sida la wada ogsoon yahay Komishankii mudnaa boggaadin iyo sharrifaad Qaran, waxa lagula kacay fool-xumo iyo nidaam-darro ka baxsan maamulka Dawliga ah, waxaana isweydiin leh, ulajeedada laga lahaa in lala sugi waayo, inay xilka ku wareejiyaan Komishanka cusub, markaasbna intooda badani magacaabnaayeen (Macal cune soo bixi doonee). Hase yeeshee Komishankii hore iskuma qoomameynaayo ka tegista xilka, maadaama ay mudadoodii ku dhamaysteen guul, godob la’aan, xasarad la’aan, kuna joogaan Bulshada dhexdeeda (maanta) sharaf iyo qadarin, taasoo ah wax ilaahay loogu mahadnaqo.

 Hawlihii Doorashooyinkii hore ee Dalka laga hir-geliyey waxay soo mareen marxalado adag oo is-daba joog ahaa, iyadoo aysan dhicin marnaba sanduuq-sanduuq kale dhaafay iyo shaambad-shaambad goob kale ku qaldantay, iyo sidoo kale agab-qalab iyo shaqaale Doorasho oo dib uga dhacay ama ka daahay goobihii iyo Xafiisyadii loogu talo galay, waxa kaloo nasiib wanaag ahayd inaan wax nabadgalyo xumo ahi ka dhicin meelnaba, taasoo libta iyo guusha laga gaadhay dhammaan saddexdii Doorasho, ay iska lahaayeen Hay’adihii sida wadaninimad ah uga qaybqaatay iska-kaashaday sida:-

1) Dadweynaha reer Somaliland.
2) Bulshada rayidka
3) Ciidamada nabadgalyada
4) Asxaabta Qaranka
5) Komishanka Doorashooyinka iyo shaqaalahooda oo iska lahaa mas’uuliyada guud ee hagista iyo fulinta hawlaha Doorashooyinka oo dhan.

6) Akademiyadda iyo Saxaafadda xorta ah.
7) Madaxweynaha oo isna lahaa hoggaaminta guud ee habsami usocodka hawlaha Doorashooyinka iyo suurta-gelinta wixii baahi ah ee uu hadba Komishanku u soo jeediyo, taasoo uusan sida runta ah kala bakhayli jirin, intii awoodiisu ahayd, uuna lahaa sharafka koowaad.

 Sidaas daraadeed, guushii Doorashooyinka ee la soo qabtay, ma jirto cid si gaara u sheegan karta keligeed, waxa nasiib daro ah in Xukuumadda Rayaale gole iyo fagaare kasta ee ay is-taagaan guddo iyo dibedba, kaga faanaan inay Dalka keligood ka hir-geliyeen saddexdii Doorashaba, iyagoo caado ma xishoodnimo ah ka dhigtay inay duudsiyaan kaalintii uu Komishanku hormoodka ka ahaa, iyo sidoo kale doorkii wax-ku-oolka ahaa ee Hay’adaha Stake-holders ka ahaa aan la’aantood Doorashooyinba aysan suurtowdeen.
 Waxay isweydiintu tahay, maxa keenay, inay xukuumadda Rayaale keligeed sheegato, guulihii Doorashooyinkii hore oo aysan sacabka indhaha ka saaraan qaybihii kale ee isha gunta ugu jirey, leelka Doorashada, taasoo la yaab leh, inay iska fogeeyaan Dadka kaloo dhan, oo ay keligood kaga faanaan goob kasta oo la joogo (Caano Nin loo lisay la og, Doorashana cidii maamushay la’og).

Yaa u soo dhafray oo habeen iyo maalinba u soo jeeday hir-gelinta Doorashooyinka?
Yaa isaga gooshay Dalka gudihiisa min Gobol ilaa Gobol, Degmo ilaa Degmo, Tuulo ilaa Tuulo iyo Goob ilaa Goob?
Yaa Safaro ku gaalaa-bixiyey Dalalka debeda, si loo iibgeeyo himilada Doorashooyinka iyo midho dhalinta hiigsiga geedi socodka Dimuqraadiyadda, una tagay:-

a) Ethiopia
b) Kenya
c) UK
d) Holland.
e) Sweden
f) Norway

(Shugri iyo Jawaan waxay la jiifaan, lana jiitamayaan dhibtii iyo diiftii ka soo gaadhay soo jeedkii iyo taagnaantii badnayd, kuwo kalena dhinac u jan-jeedhsameen)
 Tan iyo maalintii laga fara-xashay Doorashadii Madaxtooyada waxay canaasiirta hoosta kaga naban Madaxweynaha, in badan ku disayeen oo ay dhagaha uga buusheen inuu ka takhaluso Komishanka, kuna bedelo kuwo xulasho ah oo ay leeyihiin, iskana hubaan, hase yeeshee, Madaxweyne Rayaale, wuxuu isdiid-siiyaba, wuxuu markii Komishanka mudadii xilkoodu dhammaaday amar ku bixiyey in si looga aarsado, loona tuso itaalkooda la bahdilo, oo la kibir jebiyo, iyadoo hadhcad loo wada jeedo, Xarunta Komishanka debeda looga tuuray, lagana fara-maroojiyey, Gaadiidkii iyo Telifoonadii ay ku shaqaynayeen (xaashee Nin libin kaa xistiyey Jirdow xumihii waa yaab), taasoo ahayd mid aan qaban oo aysan u qalmin Komishankii Dalka ka saaray saddexdii Doorasho ee is-xigay, una soo hooyey libta lagu faano.
 Dhammaan Dadka reer Somaliland, Rayaale wey u aqoonsan yihiin, inuu ahaa dayixii Doorashada, maadaama uu yahay hoggaamiyaha Dalka, hase yeeshee, isagu Komishankii Doorashooyinka soo maamuley uma aqoonsana inay noqdaan xidigo tix-gelin muddan.


Rag Allow, Su’aasha taagani waxay tahay, Komishankii soo maamulay saddexdii Doorasho, ahaana maskaxdii, Mashiinkii iyo muruqii hir-geliyey dhammaan Doorashooyinka lagu faano, ma mudan yihiin in kaalintii ay ku lahaayeen, taariikhda Doorashada Dalka, laga duudsiyo, oo loogu abaal gudo sharaf xumo, bahdilaad iyo magac ka dil, halkii laga odhan lahaa oo keliya Odayaal, waajibkiinii Qaran waad gudateene, Nabadgalyo iyo Good Byre, taasi layaab kuma aha Komishanka, waxaana Tusaale ugu filan sidii looga abaal-dhacay halgamayaashii SNM ee Dalka xoreeyey oo aan maanta xaq iyo xurmo toona ku lahayn Dalkii ay naftooda u soo hureen, iyadoo ay ka mudan yihiin, kuwii cadowga la jirey ee la safnaa. Haddii cidi odhan doonto Odaygu isba cadow la joog buu ahaa ee muxuu leeyahay, waa dhab inaan ka mid ahaan jiray mas’uuliyiintii Gobollada, waxaase marag ma doon ah, inaanan ka mid ahayn kuwii denbiga ka galay Dalkooda iyo Dadkooda toona, waana laga marag in laba jeer la igu xidhey qadiyaddii Dalka, kana mid ahaa Saraakiishii laga mastaafuriyey Hargeysa, lagana mamnuucay inay ku soo noqdaan kana shaqeeyaan Dalkooda hooyo, iyadoo xataa la ii diiday inaan soo galo Hargeysa, si aan uga qaybgalo aaskii Hooyaday iyo Xaaskaygii oo ka mid ahaa Dadkii faqashtu ku dishay Hargeysa.


ALLAA MAHAD LEH

Axmed Cali Goodir
Hargeysa, Somaliland