Odayaasha Beelaha Hawiye
oo ku eedeeyay Itoobiya in ay ka baxday
ballantii
Odayaasha Dhaqanka iyo Midnimada
Beelaha Hawiye ayaa maanta shaaca ka qaaday in Dowladda Itoobiya ay
ka baxday ballanqaadkeedi ahaa in ay Ciidamadeeda kala baxeyso
Soomaaliya.
Guddoomiyaha Golaha Dhaqanka iyo Midnimada Beelaha Hawiye Maxamed
Xasan Xaad ayaa sheegay in ay dadka Soomaaliyeed quud-dareynayeen in
ay Itoobiya Ciidamadeeda kala baxdo Soomaaliya, hayeeshee aysan
taasi dhicin.
“Dowladda Itoobiya mudadii ay qabsatay in ay ciidamadeeda kala
baxeyso Soomaaliya waa laga gudbay, hadana waxay dagaallo ka waddaa
gobollo ka tirsan Soomaaliya, taasina waxay noo muujineysa in
Itoobiya aysan rabin in ay Ciidamadeeda kala baxdo Soomaaliya”ayuu
yiri Maxamed Xasan Xaad.
Guddoomiyaha Golaha Dhaqanka iyo Midnimada Beelaha Hawiye waxaa uu
sheegay in ay ku baaqayaan in ay Itoobiya Ciidamadeeda kala baxdo
Soomaaliya, sidoo kalena ay Ciidamada kale ee shisheeye ka baxaan,
“Soomaaliya uma baahna Ciidamo shisheeye, dhibaatana waxaa ugu filan
middii ay u geysteen Dadka Soomaaliyeed Ciidamada Shisheeye ee
haatan ku sugan”ayuu mar kale yiri Maxamed Xasan Xaad.
5-tii bishan ayay ku beegneyd mudadii ay Dowladda Itoobiya u
qabsatay in ay Ciidamadeeda kala baxeyso Soomaaliya, balse waxaa
muuqaneysa in Dowladda aysan weli diyaar u ahayn in ay Ciidamadeeda
kala baxdo Soomaaliya.
Hiiraan
|