Musharaxiinta jagada Raysalwasaaraha ee xisbiga KULMIYE soo wadaa
waa kuwama maxaase lagu kale dooranayaa
Sida ku cad go’aankii dhawaan
lagu soo gabagabeeyay doodii iyo khilaafkii siyaasadeed ee u
dhaxeeyey mas’uuliyiinta xisbiga mucaaridka ah ee KULMIYE, waxaa la
isla qaatay in hab dhismeedka dawliga ah ee Somaliland lagu soo
kordhiyo jagada Raysalwasaare. Waxaana hadda soo baxaya doodo iyo
fikrado la xidhiidha qofkii loo magacaabi lahaa jagadaasi iyo
shuruudaha lagu xulanayo.
Faa’iidada ay la leedahay fikradan oo la qaataa waxa weeye iyadoo
talada dalka la wadaagi doono, oo awoodda madaxwaynuhu ayna noqon ta
maanta Riyaale leeyahay oo kale ee uu waxwalba isagu keligii go’aan
ka gaadhaayo. Khasaaraha ay yeelan kartana waxaa ka mid ah in
muranada siyaasiga ah ee xukuumaddu bataan oo awoodda laysku qabsan
karo sida dawladda Embigaati oo kale.
Shuruudaha laga doonayo inuu yeesho hogaamiyaha noqonaya
Raysalwasaaraha waxa ka mid ah inuu yahay nin aqoon iyo karti uu ku
hogaamin karo dawlad leh, waa inuu la jaanqaadi karaa aqoon ahaan
iyo kartiba heerka Raysal wasaareyaasha ka jira bariga iyo geeska
Afrika, sida Milez ka Ethiopia iyo Odingaha Kiiniya oo kale si uu
Somaliland ugu soo gooyo cadkeeda. Waa inuu noqdaa shakhsi
Soomaliland si kalsooni leh u matali kara marka laga hadlayo
arrimaha kaga xidhan dawladaha jaarka, kuwa dunida iyo golayaasha
caalamkaba. Waa inuu leeyahay xirfad iyo aqoon uu ku hogaamiyo
wasiirada dalka iyo shaqada ay u xilsaaran yihiinba. Waa inuu
leeyahay aqoon iyo karti uu ku noqon karo madaxwayne haddii loo
baahdo. Waa in uu noqdaa nin ka madax banaan is qabqabsiga iyo
wenjalaada ay siyaasiyiinta Soomaliland inta badan ku soo jireen,
sidaa awgeed uu noqdaa hogaamiya aan hore qayb uga soo qaadan
siyaasadda muragsan ee dalka, kana turjumi kara baahida iyo xaqiiqda
taala Soomaliland maanta iyo sidii wax looga qaban lahaa.
Iyadoo xisbiga KULMIYE isku raacsan yahay shuraahaasi intooda badan,
ayaa waxaa hadda soo baxaaya tibaaxo sheegayo magacyada
shakhsiyaadka dadku carabka ku hayaan. Waxaa musharixiintan ka mid
ah mudane Axmed Xaaji Cadami oo hore ugu tartamay jagada musharaxa
madaxwayne ku xigeenka KULMIYE, laakiin aan ku guulaysan, kana
tirsan Golaha Fulinta, kana mid ah madaxda sare ee ee xisbiga. Waxaa
kaloo ka mid ah mudane Dr.Cabdisalaan Yaasiin, oo ka mid ah Golaha
Dhexe ee xisbiga iyo Dr. Maxamed Cabdillaahi Cumar oo ah Xogahaya
Arrimaha Dibadda ee xisbiga, ahna xubin Golaha Fulinta, kana mid ah
hogaamiyayaasha xisbiga..
Mudane Cadami haddii aynu soo qaadano marka hore, waa nin oday ah oo
sharaf iyo xilkasnimo badan leh, qaybna ka soo qaatay dhismaha
dimuqraadiyadda Soomaliland, kana mid ah odayaasha faro ku tiriska
ah ee ka soo jeeda bariga Sanaag ee ka dhex muuqda siyaasadda
Somaliland. Taageero badan oo codeed iyo tayo cusub oo hogaamineed
oo uu ku soo kordhin karaa hogaaminta dalka run ahaantii ma muuqato
hadda. Laakiin haddii uu ku guulaysto jagadan waxay dalka u yeeli
kartaa sawir qurux badan oo muujinaaya in hogaanka dalka beelaha oo
dhami kuwada jiraan.
Dr. Cabdisalaam Yaasiin waa aqoonyahan ka soo jeedaa Galbeedka Burco,
kana mid ahaa SNM ilaa iyo min bilawgii, guulo la taaban karana ka
soo hooyay halgankii SNM ta. Waa nin la aaminsan yahay inuu
waayoaragnimo ku soo kordhin karo hogaamineed dalka, soona kordhin
karo taageerada xisbigu ka helo deegaankiisa. Laakiin waxaa ka
horiman karta arrimo salka ku haya xurguffo soo taxnaa ilaa SNM tii
oo u dhexeeyay isaga iyo rag kale oo hadda ku jira madaxda xisbiga,
iyo isagoo loo arko nin mayal adag oo ay dadka iyo hogaankaba kali
boodi karaan, taasoo maamulka ku keeni karta degaanasho la’aan.
Dr. Maxamed Cabdillaahi Cumar, oo ka soo jeeda woqooyiga iyo
galbeedka Hargeisa, gaar ahaa deegaanka Gabiley, waa aqoonyahan leh
aqoon casri ah iyo farsamo hogaamineed oo dalku hadda aad ugu baahan
yahay. Waxaa la rumaysan yahay inuu dalka ku soo kordhin doono
maamul dawladeed iyo hogaamin siyaasadeed oo tayo leh, dalkana ku
xidhi doono caalamka. Xisbiguna wuxuu ka haysataa deegaankiisa
taageero badan. Haseyeeshe, waxaa jirta in jagada guddoomiyanimada
xisbiga lagu heshiiyay in lagu wareejiyo Muuse Biixi oo ay isku beel
ka soo wada jeedaan Dr. Maxamed, markaa way adagtahay in jagada
Raysal wasaarahana la siiyo beeshan.
Seddexda musharaxba way buuxin karaan jagadan. laakiin waxaa la kale
dooran doonaa sddex shay (1) quruxda dawladnimo ee ay keenayso
magaacidda Axmed Xaaji Cadami (2) taariikhda SNM iyo aqoonta wada
socota ee Cabdisalaan Yaasiin iyo (3) hogaaminta tayada leh ee ay
aqoontu hagayso ee Maxamed Cabdillahi. Magacaabidda kama dambaynta
ahse waxaa leh Guddoomiye Siilaanyo marka uu talada dalka ku
guulaysto. Fikirku waa mid ii gaar ah.
Kulmiye ha
guulaysto , Somaliland ha
guulaysato.
Cali Cabdi Warsame
Hargeisa , Somaliland
|