Munaasibad Loogu Wanqalay Xaaji Saalax & Dardarta Diiwaan Gelinta

Wasiirka Wasaarada Maaliyada Cawil Cali Ducaale ayaa maanta ugu baaqay dadweynaha Degmada Xaaji Saalax inay diiwaan gelinta tahay fursada ugu danbaysa ee ay haystaan Muwaadiniinta, isla markaana ay abuuraan jawi lagu dhaqaajin lahaa Maamulada Deegaanadooda.
Wasiirka waxaa hadalkan maanta kaga dhawaaqay munaasibad balaadhan oo loogu talo galay Walqasha Degmada Xaaji Saalax oo 125 KM dhinaca Koonfureed ka xigta Magaalada Burco halkaasi oo isaga iyo Koox Wasiiro iyo Xildhibaano ay ka qayb qaateen kulanka Degmada.

Degmada Xaaji Saalax oo horey uga tirsanayd Degmada Burco ayaa waxay ka mid ahayd Degmooyinka ay xukuumada Somaliland ku soo kordhisay Degmooyinka Dalka, kaasi oo ay ku muransanaayeen xuduudaheeda Gobalka Togdheer iyo Oodweyne.

Wasiirka Maaliyada waxaa uu warkiisa ku sheegay in Degmooyinka Dalka ay ku jiraan tartan lana sugayo mid waliba natiijada ay la timaado.

“ Diiwaan gelinta qofka aan ka qayb galin waxaa uu dafiray Muwaadinimadiisa” ayuu Yidhi.

Wasiirka Wasaarada Hawlaha Guud iyo Guriyeynta Siciid Sulub Maxamed oo isaguna ka mid ahaa Masuuliyiinta ka qayb galay munaasibadii ayaa soo dhoweeyey inay dadweynuhu ku tashadeen siday u samayn lahaayeen horumar ku saabsan Degmadooda.

Wasiirkani waxaa uu ka dalbaday dadweynaha Xaaji Saalax in Sarartooda Degmo ay ku xidhnaan doonto hadba tirada ay la yimaadaan iyo weliba mawqifka Xisbi ee ay qaataan.

“ Aniga iyo Wasiiro kale waxaanu soo hoynay Gobal iyo Sadex Degmo gunaafyada na qiima ridaya ka ilaaliya libtayada” ayuu yidhi.

Sidoo kalena Wasiir Ku xigeenka Wasaarada Ganacsiga C/xaliim Maxamed ayaa isaguna Talaabo hore loo qaaday ku tilmaamay inay degmooyinka cusubina ay halgamaan sdiay u xajisan lahaayeen Kaalintooda, aan hore loo shaacin balse daboolayd.

Munaasibada Walqasha oo ay si weyn uga hadleen Xildhibaano ka mida Golaha Baarlamaanka Cuqaal iyo Duqayda Deegaanka waxay sees u tahay siday Deegaanada Togdheer ay u kala jiidanayaan goobaha la geynayo diiwaan gelinta iyo weliba soohdimaha deegaanada.

“Walqal u dhac, oo Alla Bari u dhac, oo Diiwaan gelin u dhac”
Waxa ay ka mid ahayd hadaladii Chief Caaqil Maxamed Daahir Cabdi oo ka hadlay jawiga Munaasibada Xaaji Saalax.

Dooda ku saabsan Walqasha Xaaji Saalax ayaa iyaduna waxay ka dhalatay muran ku saabsan ilaa iyo 10 Tuulo oo bulshada deegaanka Galbeedka Burco ay ku kala qaybsan tahay xuduudaha ay yeelan doonto Degmooyinka Burco iyo Degmada Oodweyne, tuulooyinkaasi oo kala ah Bali-Lamare, Boodhley, Jameecaad Caynaanshe, Goraya-ooda, Ceeg, Bali-obsiiye, Cali Faarax, iyo Xaaji Saalax.

Yusuf Ibraahim Warsame (Ilka Case)
Burco , Somaliland
Email: xagaa67@hotmail.com