Mujaahid Cali Maxamed
(Cali Guray)ayaa maanta shaaca ka qaaday in uu ka baxay xisbiga
mucaaridka ah ee KULMIYE

Mujaahid Cali Maxamed (Cali Guray)
oo ka mid ahaa siyaasiyiinta miisaanka leh ee xisbiga mucaaridka ah
ee KULMIYE iyo Mujaahidintii SNM, ayaa maanta shaaca ka qaaday in uu
ka baxay xisbiga mucaaridka ah ee KULMIYE, waxaanu tilmaamay in uu
naftiisa kala shawrayo xisbigii uu ku biiri lahaa
Md. Cali Guray, war-saxaafadeed dheer oo uu shirkaasi jaraa’id ka
akhriyay ayaa wuxuu u qornaa sidan:-
"Markaan xaaladda siyaasadda iyo marxalada xasaasiga ah ee wakhtigan
eego, gaar ahaan mawqifka xisbiga kulmiye ee dib u dhigista
doorashada Madaxtooyada iyo sida guud ahaan arrimaha Kulmiye loo
waday in muddo ah eegay, waxaan ugu dambayntii go’aansaday in aan ka
baxo xisbiga kulmiye, laga bilaabo maanta oo Khamiis ah taarikhduna
tahay 19 bisha 3-aad 2009-ka. Sababaha igu kalifay inaan ka baxo
kulmiye in aan halkan faahfaahin badan kaga bixiyo ujeedadaydu maaha,
balse ujeedadaydu waa inaan wax ka iftiimiyo ayaan u arkaa inay
tahay lagama maarmaan.
KULMIYE waxa uu fursad u haystay in uu noqdo ama uu noqon karo Xisbi
isbedal doon ah oo mug weyn oo wada qaadi kara dhamaan is bedal
doonka Somaliland, haddii ay Beelo yihiin, haddii ay Kooxo yihiin
iyo haddii ay shaqsiyaad noqdaanba.
Wakhtiyada qaarkood Riyadaasi waxay ahayd mid rumoobi karaysay,
laakiin tala-xumo dhinaca xisbiga ah ayaa sabab u noqotay inay
rumoobi waydo oo sidii Xubnada ay gudho haddii ay run tahay in
KULMIYE yahay xisbi dimuquraadi ah oo la ogol yahay in taladiisa la
rog rogo, waxa iyana run kale ah, in KULMIYE talooyinkiisa la
rogrogaa ay yihiin kuwo go’aamadoodu ay meel sii yaalaan, waxaana
sii dhiga in gaar ah, oo goor gaar ah, meel gaar ah si gaar ah wax
gaar ah isugu timi.
Illaa wakhti ku siman u diyaar garawgii doorashadii Golaha
Wakiillada, go’aamada xisbigu qaataa waxay mar walba ahaayeen kuwo
lagu jabo ama laga noqdo marka gidaarka madaxa lagu soo dhufto, inta
goor ee diidnay iyo yeeli mayno ay horeysay ee haddana haye iyo
yeelay ay ku xigtay waa la og-yahay, waxay taasi ku dhacdaa
tala-xumada aan sheegayo iyo cidda talada saxda ah keenta oo afka
lagaga dhufto.
Tala-xumaddu waxa ay sharciyawdaa oo go’aan Xisbi ay noqotaa marka
laysku maandhaafo, murankana laysku mari-waayo ee ugu dambaynta
Guddoomiyaha Xisbiga laftiisu shaabbadda ugu dhufto intii
tala-xumada wadatay, inta goor ee ay taasi dhacday tiro iyo xad
malaha, sidaas ayaanay tala-xumada Xisbigu u tahay mid garab og oo
uu Guddoomiyaha Xisbiga KULMIYE Siilaanyo u yahay garab. waxa ay
soomaalidu tidhaahdaa mayd maxaa ugu dambeeyay? iyo kaa imika la sii
sido. Annigu waxaan aaminsan nahay in aanay jirin wado kale oo
doorasho loo mari karo oo aan ahayn tii aynu haynay ee ahayd
wada-tashiga Komishanka iyo Xisbiyada, xataa haddii ay dib u dhacyo
yimaadaan.
Waxa la keenay talo kale oo odhanaysa mar haddii ay doorashadii dib
u dhacday Daahir Rayaale waxa uu inoo galay dabin, wada-tashiga
Komishanka iyo Xisbiyadana wakhti iskaga lumin mayno xilkana waxa ka
dhaw in labada Gole kulan wada-jir ah yeeshaan xilkana ka qaadaana
Madaxweynaha iyo ku-xigeenkiisa oo cid kale ay u dhiibaan, inta
ra'yigaa qaba ee uu ka yimi waxa ka mid ah rag aan KULMIYE-ba ahayn
oo iyagu arrinka ku wada doorasho la’aan, Xisbiyo la’aan, Komishan
la’aan iyo Xukuumad la’aan, si loo wada sinmo oo la’aan laysugu wada
yimaaddo.
Markaa Annigu waxaan leeyahay la’aan uma socdo, ee ciddii ku socotaa
ha raacdo." Ayuu hadalkiisa sii raaciyay Cali.
KULMIYE iyo dadku waxa ay ka cawdaan dawlad xumo, marka uu KULMIYE
yahay Xisbi siyaasi ah, waa inuu la imanayaa wax dhaama waxa laga
cabanayo, Annigu waan waday oo waday oo wadaya……….., waxaan ka wadi
waayay waxa KULMIYE dadka ugu baaqayaa inuu yahay Abaar ka guur oo
Abaar u guur, sida aan u arko Abaar Abaar loogama guuro, waayo waxa
la korodhsanayaa waa geeddi, eeddiguna waa socod, daal, qaxar iyo
dhibaato, waxa loogu badheedhaa in guriga laga guurayo la dego Guri
ka roon. Sidaa daraadeed, KULMIYE marka aynu dib u eegno, wax ay
xisbiyada kale ku kala tagan yihiin ma jiro, cid waliba warqad
wanaagsan oo kanaan qabanayaa iyo kanaan qabanayaa waa la qori karaa,
laakiin Innaga Somaliland ahaan nin kasta oo Madaxweyne doonaya
rakaabkiisa ayaa la eegaa.
Axmed-Siilaanyo waxaanu ugu taagi waynay, waar dadkan aad meesha ku
soo ururisay ee aad horumuudkii xisbiga ka dhigtay ee talooyinkan
lagu jabayo meesha keenaya ka daa, waxa ku jira dadkuna ay wada
yaqaanaan kuwii uu Cabdiraxmaan-Tuur nacay, ee Maxamed Xaaji
Ibraahin Cigaal nacay ee Daahir Rayaale nacay, ayaa maanta KULMIYE
hormuudka koobaad ka ah,haddii ay musuqmaasuq xukuumadda wax kaga
sheegi karaan ma jiro, waayo nin walba waa la yaqaanaa oo shalay
ayuu soo maray.
Ragga maanta ay talada KULMIYE ka go’do waxa ka mid ah rag aan
waayo-aragnimo siyaasadeed iyo maamul midna lahayn, meel ay ka
yimaadeen aanaan garanayn, bulshada meel ay kaga jireen aanaan
garanayn, uqaba Xisbiga inay iyagu leeyihiin, dadka kalena ay yihiin
dad iyaga uun taageersan, ragoodii waaweynaa ee ka midka ahaa kuwaa
aan sheegayo ee ka siyaasisanaa ee ka waaya-aragsanaa nin walba geed
cidla ah ayaa lagu xidhay, dabadeedna waxa xagga hore la soo
mariyiay inamo yar-yar oo afka buuraya oo u qaba inay maanta
Madaxweynayaal yihiin, kuwaasi markay barri dawlad noqdaan ee ay
noqdaan innamadan doobyaya ee SNM sheegayana ee libaaxyada lagu
sheegayaa, oo illaa iyo qaaxo ahaa kuwii ummadda tobonka goor soo
jabiyay markuu Axmed Siilaanyo isku xeeray iyo qolo la yidhaahdo
marka go’aan la soo gaadho qoladii dibada joogtay ee lacagta
bixinaysay ayaa xanaaqaysa, kuwaasoo aanaan Annagu garanaynba.
Markay istaagtay in dib loo guurro, anniga waxay illa noqotay in
xisbigan halka loo wado ama uu u socdo aanan ku qanacsanayn, in
haddii talada uu qabto halka uu gaynayo aanan ku qanacsanayn, in
aanan waxba la wadaagi karayn, in badan oo KULMIYE ah ayaa rayigan
ila qabta, laakiin mushkiladu waxa ay tahay inta in gaar ahi wax
gaar ah goynayso halka ay gaynayso haloo daayo.
Waxaan kaga baxayaa eray kaftan ah, waayo waxa la yidhi reer
Magaalku kaftanka ayuu runta isugu sheegaa. qoladan xagga barriga ee
aanu Xisbiga ku nahay Shuraakada Illaahay hortii waxaan odhanayaa
waad ciyaargud xun-tihiin, rag iyo dumar, carruur iyo cirroole
waxaanu diyaar u ahayn oo illaahay nagu ogyahay inaanu taageerno oo
aanaan waxba ka hagran oo si fiican uga tuno, laakiin dhibaatadoodi
waxay noqotay, kol waxay dhabqinayaan sacabkii, kola way ka darayaan
oo waxay odhanayaan golihiiba hala baabi’iyo, haddii golahaba la
baabiyo oo saaxad lagu ciyaaraba la waayo dee si ciyaartu ciyaar u
noqonayso anigu garan mayo."
Cali Guray, oo ka mid ahaa aasaaseyaashii xisbiga mucaaridka ah ee
KULMIYE wuxuu shacbiga Somaliland ugu baaqay inay nabad gelyadooda
ilaashadaan isla markaana aan laga leexin qorshaha doorashooyinka.
SDWO
|