Maxkamada Gobolka Oo
Xukun Xadhig Ah Ku Riday Tifaftiraha Wargayska
Yool Maxamed Cabdi Curad
Maxkamadda gobolka Hargaysa ayaa
maanta ku xukuntay 5-bilood oo xadhig ah Tifaftiraha Wargayska Yool
ee ka soo baxa Magaalada Hargaysa Maxamed Cabdi Curad,kadib markii
uu muddo dhan 20 maalmood uu ku xidhnaa xarunta ciidanka danbi
baadhista ee [CID] ee Magaalada Hargaysa.
Xadhiga Suxufigan Maxamed Cabdi Guuleed [Curad] ayaa ka danbeeyey
kadib markii ay xeer ilaalinta guud ee qaranku ku eedeysay inuu
qoray warar been abuur ah, isla markaana uu soo saaray wargeys aan
ka diwaangashanayn xeer ilaalinta qaran, basle ruqsad kaliya ka
haysta Wasaarada Warfaafinta.
Hasayeeshee. Qareenka Suxufigan oo lagu magacaabo Xildhibaan Maxamed
Saalax ayaa ku gacan saydhay eedeymahaas loo soo jeediyey. Waxaanu
ku dooday qareenku in ogolaanshaha ama ruqsada xarun warbaahineed ay
bixiso wasaarada warfaafinta oo kaliya,sidaa darteedna uu wargeyska
‘Yool’ uu Sharci yahay, isaga oo ku sababeeyey in xeer ilaaliyaha
guud ee qaranku ka diiday diwaangelintiisa wargeyskan.
Sidoo kale waxa uu qareenkani suxufigan ka difaacay eeda warka oo uu
ku tilmaamay mid uu ka soo xigtay wakaalad warbaahineed, isla
markaana uu cadeeyey xigashadeeda.
Garsoore Cabdiraxmaan Madar Caraale oo kiiskan qaadayey ayaa sheegay
inay suxufigan ay maxkamada horteeda kaga cadaatay inuu baahiyey
warar aan sal iyo raad toona lahayn oo aanu dhab ahaan shahooda
xaqiijin Karin, sidaa awgeedna ay maxkamadu ku xukuntay muddo shan
bilood ah.
Xeer ilaalinta Gobolka Hargaysa ayaa la sheegay in ay hor-joogsatay
in ehelada Suxufigani ay bixiyaan qiimaha xadhigiisa lagu
xukumay,taas oo ay maxkamadu ogolaatay waxanay sheegeen in ay ambiil
ka qaadanayaan xukunka lagu riday Maxamed Cabdi Curad.
Hadhwanaagnews
|