Madaxweyne
Rayaale Oo Dhirbaaxo Siyaa sadeed Ku Dhuftay
Wasiirkiisa Warfaafinta
Madaxweynaha Somaliland Mudane
Daahir Rayaale Kaahin ayaa dhirbaaxo siyaasadeed ku dhuftay
wasiirkiisa warfaafinta Mudane Axmed Xaaji Daahir Cilmi, ka dib
markii amar uu bixiyay lagu joojiyay hawl ugaadhsi oo ay kooxo
Qatariyiin ahi ka waddeen Somaliland, kuwaas oo la sheegay in
wasiirka warfaafintu wadanka ku soo casuumay.
Kooxahaas Qatariyiinta ah, oo toddobaadkii hore dalka yimid, waxa la
sheegay inuu wadanka Qatar ka soo horkacay wasiir Axmed Xaaji Daahir
oo muddooyinkii u dambeeyay hawlo gaar ah halkaas u joogay, waxaanay
dalka ku soo galleen dal ku gal uu wasiirku u fududeeyay.
Raggaas Qatariyiinta ah oo tiradooda lagu sheegay tobaneeyo xubnood,
waxa markii ay dalka yimaadeen ay xeebaha waqooyiga Hargeysa ka
bilaabeen ugaadhsi ay ku urursanayeen duurjoogta. Hase yeeshe markii
ay si rasmi ah hawshii ay u socdeen u gudo galleen, ayaa
Madaxweynaha Somaliland Mudane Daahir Rayaale Kaahin, uu amar ku
bixiyay in laga joojiyo ugaadhsiga ay ku dhex jiraan, waxaana la
sheegay inuu Madaxweynuhu amarkiisa u tixraacay digreeto la sheegay
inuu hore ugu mamnuucay ugaadhsiga duurjoogta dalka. Raggaas
Qatariyiinta ah ayaa la sheegay inay kooxo Boolis ahi ka soo
kaxeeyeen deegaanadii waqooyiga ee ay hawsha ugaadhsiga ah ka wadeen.
Wasiirka Warfaafinta Somaliland Axmed Xaaji Daahir, ayaa la sheegay
inuu ku guul daraystay dedaal uu u galay in raggaas dib loogu fasaxo
hawsha ugaadhsiga ah ee ay dalka u yimaadeen. Dad badan ayaa
Madaxweyne Daahir Rayaale Kaahin ku bogaadiyay tallaabada uu ku
joojiyay urursiga khayraadka keliya ah ee uu dalku leeyahay ee sida
fudud loogu casuumayo shakhsiyaadka shisheeyaha ah ee sida arxan
darada ah u ugaadhsanaya nooc kasta oo ka mid ah duur joogta
Somaliland. Sidaas oo ay tahay tallaabada uu Madaxweyne Rayaale
qaaday ayaa waxa ay dhirbaaxo siyaasadeed ku tahay wasiirka sida
fudud ee deg deg ah ugaadha wadanka ugu soo casuumay Qatariyiinta uu
ku qancin kari waayay inuu wadankooda ku galo baasaaboorka
Somaliland.
Si kastaba ha ahaate, qof kasta oo masuul ah, waxa la gudboon inaanu
masuuliyadiisa iyo xilka qaranka loogu dhiibay uga faa'iidaysan dano
gaar ah, balse uu ugu shaqeeyo qaranka iyo umadda inteeda badani
wada danyarta tahay ee uu xilka u hayo.
www.geeska.net
|