Ma Ninka Xukumi Kari Waayay 150 Qof , ayaa
Lagu Aamini Karaa Somaliland?
Waxa hubaal ah in cid kasta oo la
socota hadalada uu Gudoomiyaha Xisbiga Kulmiye Mudane Axmad Maxamad
Siilaanyo ka jeediyo fagaarayaasha iyo munaasabadaha lagu kulmo, in
uu ka dhadhansan karo sida kulul ee uu u weeraro madaxda xisbiga
UDUB .
Waxa aan shaki ku jirin in habka loo qabtay shirka iyo sida uu
Siilaanyo u maroorsaday talada xisbiga Kulmiye, ay muujinayso sida
uu Siilaanyo u yahay kalidiitaliye aan ogolayn in lala tartamo.
Siilaanyo waxa uu si cad isku hor-taagay in lagula tartamo jagada
Gudoomiyanimada iyo ta murashaxnimada madaxweynenimada. Qaamuuska
dimoqraadiyadda kuma jirto qof kalidii jago sare isku soo sharaxa oo
la yidhaahdo cidi lalama tartamin.
Sida u caadada ah, marka uu fagaarayaasha kahadlayo Mudane Axmad
Siilaanyo, waxa uu aad u dhaleeceeyaa madaxweyne Riyaale oo uu ku
tilmaamo in aannu ahayn qof u soo dagaalamay ama ka qayb-qaatay
halgankii, balse uu yahay mid ka soo horjeeday halgankii hubaysnaa
ee ay SNM soo gashay, hadaba waxa layaab leh sida uu uga hor-yimid
in Mujaahid Cabdi Raxmaan Aw Cali oo ahaa qofka qudha ee beesha
samaroon kaga jiray halgankii SNM in uu noqdo Madaxweyne ku xigeen.
Waxa dad badan ka yaabisay taageerada uu Siilaanyo siiyay
CabdiRaxmaan Saylici oo aan haba-yaraatee wax taariikh ah ku lahayn
halgankii hubaysnaa ee ay SNM kaga soo horjeeday taliskii Siyaad
Barre. Taageeradan uu Siilaanyo siiyay C/R Saylici waxa ay ka soo
horjeedaa hadafkii uu fagaare walba kaga tiraabayey ee ahaa in ay
dawladnimadii gacanta u gashay dad aan u soo dagaalamin gobonimada
Somaliland.
Ficilka Siilaanyo uu ka muujiyay shirwaynihii Golaha Dhexe ee uu
Xisbiga Kulmiye ku qabsaday Magaalada Burco, waxa uu muujinayaa sida
uu dimoqraadiyaddii uu xisbigu ku faani jiray u dhaawacay.
Aqoondarada Siilaanyo waxa ay dhaawacday isku duubnaantii xisbiga,
waxa ayna meesha ka saartay mala-awaalkii iyo hadaaqii ahaa in uu
Xisbigu ku guulaysandoono doorashooyinka soo socda.
Damaca aan xadka lahayn ee uu Siilaanyo la yimid waxa uu ka
turjumayaa dabeecaddiisa ku dhisan xukun jaceylka . Arintani waxa ay
khatar ku tahay hanaanka dawladnimo ee ku dhisan dimoqraadinimada ee
ay Somaliland hiigsanayso. Dada badan ayaa rumaysan in haddii uu
Siilaanyo noqdo madaxweyne aanay dalka ka jiridoonin dimoqraadiyad
iyo tartan loo galo hogaanka dalka sida haatanba uu ka muujiyey
Kulmiye dhexdiisa.
Waxa aan shaki ku jirin in ay maanta beenawday waxyaabihii uu
Siilaanyo ku faani jiray iyo mabaadiidii dhalaan habaabista ahayd ee
uu Kulmiye dadweynaha ku beer-laxawsanjiray.
Waxa ay dad badani saadaalinayaa in haddii ay Siilaanyo iyo C/R
Saylici ku guulaystaan doorashada soo socota, in ay suurtagal tahay
in si dhib yar uga tanaasulaan gooni-isu-taaga Jamhuuridyadda
Somaliland.
Waxa dad badan fajiciso ku noqotay sida aan gabashada lahayn ee uu
Siilaanyo u maroorsaday maamulka xisbiga, taas oo dhalisay in uu
xisbigii Kulmiye laba ugu kala jabo. Taan waxa keentay maamul-xumada
Siilaanyo.
Waxa hadda la is-weydiinyaa sida xisbi kala jabasani uu doorasho u
gelikaro iyo sida uu taageero uga helilkaro dadweynaha Somaliland ee
ogaaday in ay dimoqraadinimo ka dheer tahay Xisbiga Kulmiye .
Hadadaba waxa ay is weydiintu tahay Ma Ninka xukumi kari waayay 150
qof , ayaa xukumi kara Malaayiinka qof ee reer Somaliland, jawaabtu
waa maya suurta gal maaha.
Abshir C/laahi Hassan
Hargeysa, Somaliland
|