KULMIYE oo ka Digey Olole Madaxtooyadu ku Doonayso in Xilka Lagaga Qaado Guddoomiyaha Guurtida

Guddoomiye-ku-xigeenka koowaad ee xisbiga KULMIYE mujaahid Muuse Biixi Cabdi, ayaa si kulul u cambaareeyay olole la sheegay in toddobaadadan u dambeeyey xukuumaddu ku doonaysay sidii xilka looga qaadi lahaa Guddoomiyaha Golaha Guurtida Md. Saleebaan Maxamuud Aadan.


Muuse Biixi Cabdi oo shir-jaraa’id shalay gelinkii dambe ku qabtay xarunta KULMIYE ee magaalada Hargeysa, ayaa waxa uu si adag uga digay khatarta uu ololahaasi keeni karo waqti loo diyaargaroobayo doorashada, isaga oo ku macneeyey inuu yahay mid la doonayo in khalkhal lagu geliyo doorashada soo socota, isla markaana nuxurka ololaha wakhtigan ku soo beegmay uu yahay mid siyaasiyan iyo nabadgelyo ahaanba aanu dalku qaadi karin oo u muuqda mid gacan cadaw oo dibadeed ku jirto.


“Dalku wuxuu ku jiraa doorashadii ugu weynayd oo ah tii Madaxtooyada, markaa maanta hay’ad walba, qof walba iyo urur walba waxa waajib qaran ah inuu nabadgelyada ilaaliyo, dhexdiisana dhulka dhigo oo aynu dhammaanteen u jeesano sidii nabadgelyo iyo deganaansho inoogu dhici lahayd doorashada. Marka aynu distoorka eegno dalka labada hay’adood ee ugu sarreeyaa waa Madaxtooyada iyo Golaha Guurtida, baratakoolka kowaad waxa leh Madaxtooyada, ka labaadna Shirguddoonka Guurtida, waxa nasiib-darro ah oo aan caqliga geli Karin oo aan waqtigeedii ahayn in maanta la bilaabo olole Shirguddoonka Guurtida lagu beddelo,” ayuu ydihi Muuse Biixi.


Guddoomiye-ku-xigeenka KULMIYE waxa uu sheegay in aan dalku wada qaadi karin in mar qudha labada hay’adood u sarreeyaa doorasho wada galaan, cidda wada ololaha Shirguddoonka Guurtida lagu beddelayanaa aanay u danayn Somaliland, isaga oo shaki ka muujiyey inuu cadow gacan ku leeyahay; Isaga oo arrintaa ka hadlayeyna waxa uu yidhi; “Dalku ma qaadi karo in labada hay’adood ee ugu sarreeyaa isku mar doorasho galaan, taa distoorka ayaa sheegaya in aanay labadaa hay’adood mar doorasho wadagelin, waayo xilka Madaxtooyada waxa laga dhigay 5 sanno, ka Guurtidana 6 sanno, ujeedadu waxa weeye waa labadii hay’adood ee u sarreeyey ee midina waa inay joogto midna doorasho ku jirto. Waxaannu u aragnaa arrintaas in cidda ka dambaysa iyo cidda ka talilaysay midna ummadda u danaynayn, waxayna u muuqataa in cadowga Somaliland soo gacan geliyey oo uu inoo dhigo qorshe aynu mar qudha wadagalno khalkhal iyo doorasho, waxaan leeyahay cidda arrintaas soo abaabushay waa cid aan ka fikirin nuxurka danta Somaliland siyaasiyan iyo nabadgelyo ahaanba.


“Sidaa darteed waxaannu si qaylo dheer ugu baaqaynaa cidda arrintaas abaabulaysaa inay maanta cagta u dhigaan, waayo marka hore waxay caqabadaynayaan doorashadii Madaxtooyada mar labaadka waxay keenaysaa doorashada Shirguddoon Guurtida mar saddexaadka haddii aynu labadaa doorasho galno waxa soo baxaya anigu ma garanayo, taasi inoo dan maaha.”


Md. Muuse Biixi Cabdi waxa uu sheegay in Guddoomiyaha Guurtida Md. Saleebaan ka mid ahaa ragga ugu adag ee ka soo horjeeday, isla markaana sabab u ahaa guushii UDUB ee doorashadii hore, “Annaga KULMIYE ahaan Shirguddoonka Guurtida; metelan Saleebaan oo kale waa ninkii ugu adkaa ee naga soo horjeeday, haddaanu dantayada siyaasiga ah ka eegno oo KULMIYE dantiisa mooyee tu qaran ka eegayn waxaannu odhan lahayn UDUB baa ishaysata oo shirguddoonkii ka soo horjeedsatay, waxaannuse u aragnaa Guurtida iyo Madaxtooyadu inay yihiin hay’ado qaran oo ah in la ilaaliyo, sidaa darteed Saleebaan oo doorashadii hore la wada ogaa inuu ahaa ninkii 80% hirgeliyey in UDUB guulaysto, maanta Shirguddoon iyo awooddaa u leh, haddii mid siyaasiyad wadno waxaannu odhan lahayn ka faa’iidaysta.”


Mujaahid Muuse Biixi waxa uu arrintan ku macneeyey inay leedahay dareenno hor leh oo ay muujinayaan waxyaabo hore aan UDUB loogu aqoon oo hadda ka soo baxaya, “Arrintaasi dareemo badan bay soo xoojinaysaa oo weliba ay u badan yihiin sida wararku nagu soo gaadhayaan oo leh Madaxtooyada ayaa arrintaa ka dambaysay oo soo dhaqaajisay. Mudda gaaban gudaheed intii shirkii UDUB ka dambaysay waxa UDUB ka soo baxay codod aynaan hore u maqli jirin oo ku saabsan wax la qabsashada koonfur, waxaad moodaa xukuumadda iminka joogta iyo UDUB inay aad u soo dhaweynayaa ninka loo cummaamaday Koonfurta Soomaaliya, weli intii la doortay ninkaasi wax uu ka beddelay siyaasadda Somaliland iyo meel uu arrinta Somaliland kaga hadlay halka uu ka taagan yahay maynu arag, markaa wax uu kaga duwan yahay kuwii hore ma hayno ee haddii xukuumaddu hayso ha inoo sheegto.”


Bal u fiirso UDUB in allaale iyo intii UDUB bud-dhigga u ahayd ee soo saartay doorashadii hore way ka maqan tahay, nin doorasho doonayaa dadkiisa codka u haya ma kala diro, ka soo bilow bilowdo Cabdi Aw Daahir, Gees, Axmed Yuusuf Ducaale, Darawal, Ismaaciil-yare, Duur, Aadan Tarabi iyo rag kale waa ilaa dhawr iyo labaatan nin oo ah intii soo saartay UDUB, waa la isqaban karaa oo xisbi walba rag baa ka dareera, laakiin miisaanka intaa leeg inuu ka dareero ee iminkana khalkhal la geliyo Guurtida miyaan la odhan Karin timirba laf baa ku jirta.”


Ugu dambeyn, waxa uu u soo jeediyey mudanayaasha Guurtida inay ka digtoonaadaan beddelaad ay xilligan ku sameeyaan Shirguddoonka, isla markaana ay ka fiirsadaan ololaha laga dhex wado, “Waxaannu soo jeedinaynaa Guurtidu haddii ay Shirguddoonkeeda beddelayso ha sugto inta doorashada Madaxtooyadu dhammaanayso, ha noqoto sida xeerku ahaa ee loo dhisay halka hadhow muranka kala saaraysa. Odayaasha Guurtidana waxaan leeyahay haddii ay ka hoostay, haddii loo soo dhiibayba iyo hadday meel soke ka eegeen dib ha uga fiirsadaan,” ayuu hadalkiisa ku soo gunaanaday Muuse Biixi.




 

Jamhuuriya Online