Imaaraadka
oo Mashiin Nooca Dabka Dhaliya ah ugu Deeqay
Wakaallada Korantada Hargeysa
Amiirka dalka Imaaraadka Carabta Sheekh Xamdaan Binu Zaid Al-Nahyaan,
ayaa ugu deeqay hay’adda Korantada ee magaalada Hargeysa mashiin
weyn oo ah nooca dabka dhaliya.
Mashiinkan oo awooda dab-soo-saarkiisu tahay
1650KVA, waxa siday wakiilo ka tirsan hay’adda Bisha Cas ee
Imaaraadka oo uu leeyahay Amiir Xamdaan, kuwaasoo Maareeyaha
Hay’adda Korantada Mr. Xuseen Cilmi Warsame
uu kala wareegay.
Xaflad ballaadhan oo loo sameeyey
kala guddoomashada deeqdaas oo maanta lagu qabtay Huteelka Hargeysa
Club ee magaalada Hargeysa, ayaa waxa ka qaybgalay Wasiirada
Daakhiliga iyo Madaxtooyada, Maayarka Caasimadda, Maareeyaha
hay’adda Korantada, Guddoomiyaha hay’adda Shaqaalaha, xildhibaano ka
tirsan labada aqal ee Baarlamanka iyo martisharaf kale.
Guddoomiyaha hay’adda Korantada Mr. Xuseen
Cilmi Warsame oo furitaankii xafladaas hadal ka jeediyey,
waxa uu ugu horreyn aad ugu mahadnaqay Sheekh Saalax Al-jabiri oo
siday mashiinkan, kaas oo uu sheegay inuu gacantiisa ku keenay
xarunta, arrintaas uu ku tilmaamay mid layaab leh oo aanay filayn.
Mr. Xuseen Cilmi waxa uu xusay in
mashiinkani uu qayb ka yahay waxyaabo badan oo Amiirka dalka
Imaaraadku Somaliland u ballanqaaday inuu ku caawin doono, kadib
safar dabayaaqadii sannadkii hore uu dalkaas ku tagay wefti uu
hoggaaminayey Madaxweyne Rayaale, kuwaas oo qaarkood hore u
yimaadeen sida riigii biyaha qodayey, kuwo kalena soo socdaan.
“Madaxweynuhu safarkii uu ku tagay Imaaraadka waxa uu kula kulmay
Amiir Xamdaan oo uu ka dalbay arrimo badan oo dalkeena lagu
horumariyo, qaar wey yimaadeen sida riigii biyaha, mashiink anina
waa deeqda awalkeedii xagga korantada waxa soo daba socda mashiin
kale iyo qalabkii lagu fidinayey, markaa saaka annaga cid naga
farxad badani ma jirto,” ayuu yidhi Maareeyaha
hay’adda Korantadu.
Mr. Xuseen
Cilmi waxa kale oo uu sheegay in mashiinkani uu yahay mid aad
qaali ah oo qiyaastii qiimihiisu uu noqonayo ilaa
$300,000 (saddex boqol oo kun dollar),
isaga oo xusay in mashiinka kale ee u soo socda iyo qalabka kaleba
uu aad uga qaalisanaanayo. Waxaannu si weyn ugu mahadnaqay amiirka
Imaaraadka Sheekh Xamdaan.
Xildhibaan Khadar Aadan Xuseen (Khadar
Ambassador) oo ka mid ah Golaha Wakiillada Somaliland oo
xafladaas ka hadlay, ayaa sheegay in wax kasta oo shacabka reer
Somaliland la siiyo ay aad ugu baahan yihiin, isla markaana ay aad
ugu mahadnaqayaan dalka Imaaraadka, isaga oo ka dalbay inay ka sii
siyaadiyaan mucaawanadooda ay Somaliland siinayaan.
“Wakaaladda Xoogga korantada waxaan leeyahay waxa la idiinka baahan
aad si wanaagsan u ilaalisaan, waayo idinka ayey masuuliyaddu idin
saran tahay. Waxaanan isleeyahay in aynu wax dambe helnaa waxay ku
xidhan tahay sidaynu u xannaanayno wixii ina soo gaadhay,” ayuu
yidhi Xildhibaan Khadar Ambassador,
waxaannu intaa raaciyey, “Waxa kale oo an ka cosdan lahaa maamulka
Wakaallada Korantada inkasta oo aan ogahay in awoodu yar tahay
haddana caasimadda ma wada gaadho laydhku, markaa aniga oo ku
hadlaya magaca dadkii aan wakiilka ka ahaa waxaan odhan lahaa
qorshaha ku darsada in si dhakhso ah loo fidiyo korantada caasimadda
oo hadda ku kooban maagalada badhtamaheeda.”
Maayarka Caasimadda Eng. Xuseen Maxamuud
Jiciir oo isna halkaa ka hadlay, ayaa shaaca ka inay soo
socdaan laba mashiin oo ah qaar aad u muhiim ah oo kalyaha lagu
baadho, kuwaas oo uu iyagana Somaliland ugu deeqay amiirka
Imaaraadka Sheekh Xamdaan Binu Zaid, isaga oo arrintaa ka hadlayeyna
waxa uu yidhi;
“Waxa kale oo farxad weyn leh in
laba mashiin oo ah kuwa kelyaha lagu sifeeyo ay soo socdaan iyo
weliba dhakhtarkii tababarayey, waa arrin aad u muhiim ah maxaa
yeelay waad ogaydeen in qofka kelyuhu xannuunaan loo qaadi jiray
Jabuuti ama Imaaraadka. Markaa waxaannu leenahay Sheekh Xamdaan
Ilaahay hakaa abaalmariyo caawimadaas ummadda reer Somaliland-na way
ku soo hambalyeynayaan oo mid ay iloobayso maaha.”
Ugu dambayntii
Wasiirka Madaxtooyada
Md. Nuur Amiin oo xafladaas soo xidhay,
ayaa sheegay in mucaawanadani ay ka mid tahay midhihii ka soo baxay
wadahadaladii dhexmaray weftigii Madaxweyne Rayaale iyo amiirka
dalka Imaaraadka Sheekh Xadmaan, isla markaana uu mashiinkani yahay
mid loo baahnaa oo wax weyn ka tari doona horumarka caasimadda.
“Imaaraadka Carabtu waa daaqad weyn oo inooga furantay caalamka
carabta aad iyo aad baanu u soo dhaweynaynaa aniga oo wakiil ka ah
Madaxweynaha iyo Golaha Wasiiradaba,” ayuu yidhi
Wasiirka Madaxtooyadu.
Oodweynenews
|