Igu
qabsade dhulkayga qoribaan ka xigaa “faallo”
Waxyaabaha la yaabka leh ee
maalmahaas dhacay waxa ka mid ahaa, in dadka reer Somaliland gaar
ahaan
Igu qabsade dhulkayga qoribaan ka xigaa “faallo”.
Waxay ahayd 26 june 1960, maalintii ay dadka reer Somaliland ka
xoroobeen heeryadii gumaystaha ingiriiska, maalintani waxay shacabka
Somaliland u ahayd maalin aad u farxad badan qof kasta oo dareen
wadaninimo ku jirana ku dhalisay dareen jidhiidhico leh.
Maalintaas waxa xigay in dadka reer Somaliland (British
protectorate) ay doortaan inay si bilaa shuruud ah kula midoobaan
walaalohooda somaliya. Shacabka reer Somaliland waxay ku cadaadiyeen
kuna khasbeen madaxdii xiligaas ee somaliland in la dadajiyo la
midowga dadka walaalaha yihiin ee Somalia (Italian protectorate).
Waxyaabaha la yaabka leh ee maalmahaas dhacay waxa ka mid ahaa, in
dadka reer Somaliland gaar ahaan intii maalmahaas hargaysa joogay ay
raagsadaan midowga, ayna dhacdayba in dad ay hayso shucuur wax wada
wadaagis ay ka daataan dayrka maxkamada goodirka magaalada hargaysa.
Waxaana madaxdii uu halkaas wada tashiga ama shirku uga socday ku
adkaatay inay hawshooda sii wataan waxaanay u xadhko xidheen inay
muqdisho tagaan oo heshiiska midowga soo sexeexaan.
Kalgacaltooyada iyo wanaaga ay hayeen dadka reer Somaliland
wakhtigaas kamay helin badalkeedii dadkii ay walaalaha ahaayeen ay
ula tageen. Waxay la kulmeen xaqiraad iyo waxyaabo aanay ka filanayn
walaalohood. Xumaanta dadka reer solailand lagula kacay kumay ekayn
oo kaliya intii muqdisho joogtay, ee waxa ay markii danbe usoo
talowday caradii ay ka yimaadeen ee Somaliland .
Wax kaleba iska dhaafoo madaxdii reer Somalia ee markaas xilka
haysey waxay isku dayeen inay kala qoqobaan dadkii walaalaha ahaa ee
Somaliland wada daganaa iyaga oo u kala qaybqaybinaya qabiil qabiil,
waxay xidhidhxidheen dhamaan madaxdii u dhashay dadkan ee ka
damqaday arintan.
Gafka iyo dhibaatada dadkan lagula kacay kuma ekayn oo kaliya kala
qayb qabin iyo isku dir, ee waxaa loogu daray xasuuq aan loo kala
aabo yeelayn (genocide) oo intiisa xooga badani socotay intii u
dhaxaysay 1981-1991. waxaa dil toogasho lagu xukumay aqoonyahankii,
ciroolihii, caruurtii hooyooyinkii iyo qofkasta oo ka damqaday
falalkaas iyo xasuuqaas waxshinimada ahaa.
Wakhti waliba waayo leh, naxariista ilaahayna lagama quusto. Waxaa
ilaahay mahadii noqotay in dad aqoonyahan, saraakiil iyo shacab
isugu jiray oo u dhashay dadkani ay sameeyeen ururkii SNM. Ururkani
waxa uu ilaahay ku guuleeyay inuu dadkiisa ka gilgilo heeryadii
gumaysi iyo xasuuqii ku socday.
Dhiig badan oo daatay ka dib, markii dalka laga xoreeyay ciidamadii
afweyne waxay dhamaan beelihii daganaa lixda gobol ee Somaliland
shir ku yeesheen magaalada burco 18 may 1991, iyaga oo madaxweyne
iyo kuxigeen ugu doortay C/raxmaan Axmed Cali iyo Xassan Ciise
Jaamac.
Nabadaynta iyo horumarinta Somaliland kuma jogsan oo kaliya shirkaas
ee waxaa mar kale beelihii daganaa somaliland isugu yimaadeen
magaalada borama bishii 23 feb sanadkii 1993, waxaana madaxweyne
loogu doortay 5 may 1994 allaha u naxariistee marxuum Mahamed xaji
Ibrahim Cigal iyo C/raxman aw Cali Faarax.
Daacadi ma hungowdee waxa ay ergadii beelaha Somaliland mar kale 23
feb 1997 dib Madaxweyne iyo ku xigeen ugu Doorteen Marxuum Mahamed
xaji Ibrahim Cigal iyo Daahir Rayaale Kaahin oo hada ah mdaxweynaha
Jamhuuriyada Somaliland.
31 may 2001 ayay ahayd maalin kale oo farxad leh oo ay dadka reer
Somaliland u dareereen u codaynta dastuurkii ugu horeeyay ee ay si
madax banaan u yeeshaan.
97% waxay dadka reer somaliland ku codeeyeen codka haa taas oo
cadaynaya go’aanka ay ku gaadheen inaanay mar kale ka suuroobayn
inay si dhib yar ku galaan heeryo gumaysi oo kale, waxa kale oo
iyana taas barbar socday nidaamka xisbiyada badan oo uu markaas
Marxuum madaxweyne Cigaal gacanta ku hayey hirgalintiisa.
Qoraxdii timaadaba
Muxuu qalinku sheekiyo
Hadba qodob la yaabliyo
Mahadhooyin qorayaa.
3 may 2002, 3:00 pm ayay markale dadka Somaliland ku warheleen oo
idaacadaha ka dhagaysteen in Madaxweynohoodii, halyeygii nabada
somaliland Marxuum Mahamed xaji Ibrahim Cigal uu ku geeriyooday
magaalada Pretoria ee dalka K/afrika oo uu u joogay arimo caafimaad.
inta badan shacabka reer Somaliland iyo wadamada jaarku farta ayay
dhexda ka qaniinsanaayeen, waxaanay u malaynayeen in nabada ay
yagleeleen burburi doonto, mase noqon arinku sidaas oo “Rabi iyo
ragbaa u baxay”. Marxuum Sh. Ibrahim Sh.yuusuf Sh. Madar, xaaji
cabdi waraabe iyo golihii guurtida ee nabada u lugayn jiray ayaa
warankii murugada ka gooyay dadkooda iyo dalalka jaarka, waxay kala
daabaasheen dalkooda arinka adag ee soo foodsaaray.
Sida dastuurka dadku u codeeyeen 11 bilood ka hor dhigayay, waxaa
xilkii Madaxtinimada dalka ay golaha guurtida ee labadaas oday ka
hormuudka yihiin u dhiibeen madaxweyne ku-xigeenii dalka oo markaas
ahaa Mudane Daahir Rayaale Kaahin halka jagada madaxweyne
ku-xigeenka uu qabtay Mudane Axmed yuusuf yaasiin.
Madaxweyne Daahir iyo Axmed yuusuf kuma aysan joogin halkii uu
arinku taagnaa, waxa ay sii kobciyeen horumarkii dadkoodu
hiigsanayeen, waxa ay sii adkeeyeen nabadii, waxa ay dalka ka suurto
galiyeen doorashooyinkii ugu horeeyay ee dimuqraadi ah ee nidaamka
xisbiyada badan, waxaa ugu horeysay doorashadii golaha degaanka oo
qabsoontay 15 dec 2002, aanay kusoo baxeen saddexda xisbi qaran ee
Kulmiye Udub iyo Ucid. Waxaa ku xigtay doorashadii madaxtooyada oo
qabsoontay 14 april 2003 oo mar kale ay dib ugu guulaysteen
Madaxweyne Daahir iyo Axmed yuusuf. iyo tii ugu danbaysay ee
baalmaanka oo qabsoontay 29 sep 2005.
Sidoo kale waxa ay madaxweyne Daahir Rayaale iyo Axmed yuusuf dalka
ka suurto galiyeen in la diiwaangaliyo dadka u dhashay wadanka si
loo kala garto muwaadinka dalka u dhashay Iyo ka ajinabiga ah, sidoo
kale waxa ay diiwaan galinta ulajeedooyinkeeda ka mid ahaa si ay
dalka uga qabsoomaan doorashooyin xor oo xalaal ah.
Aan u dhaacoco dulucda “Ku qabsasho dhulkayga qoribaan ka xigaa”
maqaalkayga ee badweynta taariikhda somaliland ila xulay. Waxaa in
badan dhagahayga kusoo dhacdhaca marka aan warbaahinta dhagaysanayo
eray xanuun badan igu haya oo kasoo baxa afka hogaamiyayaasha
somaliya, waxay soomaalidu ku maahmaahdaa “tiisaba daryeelaa tu
kalana ku dara” , aniga oo ka mid ah dhalinyada Somaliland waxaa ii
cuntami la, in dadka taariikhda aan soo sheegnay leh (Somaliland) ay
cagaha ku martaan hogaamiyayaal dadkoodii iyo dhulkoodii iyo
caruurtoodii ololiyay.
Hadii aanu nahay dhalinyarada dadkan iyo dalkan Somaliland u dhashay,
waxaa naga xusuusin ah kuwii shalay wax wada wadaaga hormooddka ka
ahaa dadkan reer Somaliland ayay ahaayeen, maantana kuwa jecel
jaarnimo iyo daris wanaag waa anaga. Hadiise aad jeceshihiin inaad
dhulkayaga nala maamushaan, oo aad dab ugu shidaan sida aan
caradiina iyo caruurtiina dabka ugu shideen oo kale, anaga marnaba
taasi noo cuntami mayso, halkudhagayaga ama go’aankayaga ugu
danbeeyaana waxa uu noqonayaa “Igu qabsade dhulkayga qoribaan ka
xigaa”.
Ali Sh.Ahmed-yasin
Hargeisa Somaliland
aliyare45@hotmail.com
aliyare45@yahoo.com
|