HORNWATCH oo si Ba’an
Uga Dayrisay Tacadiy adda Rayidka ee
Xukuumadda Rayaale
Beesha caalamka iyo
Deeqbixiyayaasha doorashooyinka Somaliland oo loogu baaqay inay
cadaadis diblumaasiyadeed saaraan xukuumadda
“Waxaad mooddaa in xukuumaddu u qaadatay go’aanka Guurtida ee
muddo-kordhintu inuu u fasaxayo xadgudubka muwaadiniinta iyo
weriyayaasha dalka”
“Cadaadiska xooggan ee axsaabta mucaaridka dawladdu saartay haddii
uu sii socdo gebi ahaanba waxa uu saaxadda ka saari karaa jiritaanka
axsaabta mucaaridka”
War-murtiyeed HORNWATCH ka soo saaray Hargeysa
Gudida Ilaalada Xuquuqda Aadamiga Geeska Afrika ee HORNWATCH, ayaa
si ba’an uga qayliyey tacadiyo iyo xad-gudubyo xukuumadda Madaxweyne
Rayaale ku hayso shacabka iyo suxufiyiinta warbaahinta madaxabannaan.
Guddiga Ilaalada Xuquuqda Aadamiga Geeska Afrika oo warsaxaafadeed
ka soo saaray falalka bini’aadanimada ka dhanka ah ee xukuumaddu ku
kacday muddada bilaha ah ee sannadkan lagu gudo jiro oo keliya, waxa
Guddigu nasiib-darro aan damiirka aadamuhu ka aamusi karin ku
tilmaamay xad-gudubyo isugu jira xadhig iyo jidh-dil oo hay’adaha
sharci fulinta ee xukuumadda Rayaale si aan loo aabo yeelin ugu
hayso muwaadiniinta ay u aragto inay ka aragti duwan yihiin
siyaasaddeeda iyo suxufiyiinta ka hawlgala hay’adaha warbaahinta
madaxabannaan oo xadhig iyo falal lagaga jajabinayo qalabkooda loo
geysto.
Waxaanay Guddiga HORNWATCH ku xuseen qoraalkooda in tacadiyadda
xukuumaddu ku kacaysaa libin-laabmeen intii ka dambaysay
muddo-kordhintii lixda bilood ahayd ee Golaha Guurtidu xilka ugu sii
dheereeyey Rayaale iyo Axmed Yuusuf. Sidaa daraadeed waxa Guddigu
ugu baaqday beesha caalamka iyo dalalka Somaliland ka taageera
doorashooyinkaba inay cadaadis ku saaraan xukuumadda sidii ay u
joojin lahayd xad-gudubyadaas.
Warsaxaafadeedkaas oo uu ku saxeexan yahay Guddoomiyaha Guddiga
Ilaalada Xuquuqda Aadamaha ee HORNWATCH Mr. Saleebaan Ismaaciil
Bullaale, isaga oo dhammaystiran waxa uu u qornaa sidan:
“Guddiga Ilaalada Xuquuqda Aadamiga Somaliland waxa uu nasiib-daro
ku habsatay Somaliland u arkaa tacadiyo fool xun oo aan damiirka
aadamigu u adkaysan karin xad-gudubyo xukuumadda Madaxwayne Rayaale
ku hayso rayidka, kuwaas oo ay ka mid yihiin xadhigga iyo jidh-dilka
weriyayaasha madaxabannaan la beegsadaan hay’adaha sharci-fulinta ee
xukuumadda Somaliland, iyagoo weliba suxufiyiinta qaarkood ka
burburiyey agabka ay ku hawlgalaan sida kamaradaha.
Xadhigga wariyayaashu ma aha mid ciidammada ammaanka Somaliland
marmar dhif ah ku kacaan, balse waxa uu noqday mid joogto ah kuna
baahsan gobollada dalka oo dhan, una eg mid qorshaysan.
Tan iyo bilowgii sannadkan oo haatan bishii afraad gebagebo tahay,
waxa ciidammada ammaanka Somaliland albaabada u laabeen hal wargeys
oo madaxbannaan oo la odhan jiray YOOL, kana soo bixi jiray
caasimadda dalka ee Hargeysa. Sidoo kale waxay xukuumadda Madaxwayne
Rayaale xabsiga u taxaabeen in ka badan 8 wariye oo ka kala hawlgeli
jiray wargeysada, raadiyayaasha iyo TV-yada madaxabannaan.
Tacadiyaddan xannuunka badani kuma koobna weriyayaasha oo keli ah ee
waxa ciidammada ammaanku la beegsadaan gabbood-fallo isugu jira
xadhig iyo jidh-dilba muwaadiniinta rayidka ah ee taageerayaasha u
ah xisbiyada mucaaridka.
Xaaladdu waxay ka sii dartay markii Golaha Guurtidu muddada
dhammaadka xilka Madaxwaynaha iyo ku-xigeenkiisa ugu dareen 6 bilood
oo kale.
Markaad u fiirsato tan iyo muddo-kordhintii Guurtida intii ka
dambaysay korodhka xad-dhaafka ah ee xadhigga sharci-darrada ah,
xabsi-ku-haynta rayidka intay xidhaan hay’adaha sharci-fulinta
Somaliland iyo madaxda gobollada iyo degmooyinka dalku iyada oo aan
maxkamad la horgeyn muddo bilo ah, laguna hayo saldhigayada iyo
jeelasha dalka, waxaanad mooddaa in xukuumaddu u qaadatay go’aanka
Guurtida ee muddo-kordhintu inuu u fasaxayo ku xadgudubka joogtada
noqday ee muwaadiniinta iyo weriyayaasha dalka.
Arrinta kale ee walaaca weyn ku dhalisay Guddiga Ilaalada Xuquuqda
Aadamiga waxay tahay iyadoo habayaraatee ka hadalka xadgudubyadan
baahsan ee haatan ay ka wado xukuumadda madaxwayne Rayaale dalka aan
lagu soo hadal-qaadin wadahadallada qalaalasaha siyaasadeed ee dalka
oo haatan ka bilaabmay in si fool-ka-fool ah u wadahadlaan madaxda
sare ee dhinacyada isaga soo horjeeda siyaasadda dalka.
Tacadiyadda xuquuqda iyo xorriyadaha dastruuriga ah ee dalka
Somaliland ee hay’adaha sharci- fulinta Somaliland ku hayaan
shacbiga, saxaafadda xorta ah iyo cadaadiska xooggan ee axsaabta
mucaaridka ay dawladdu saartay oo hadduu sii socdo gebi ahaanba waxa
uu saaxadda ka saari karaa jiritaanka axsaabta mucaaridka, habkaas
oo guud ahaan si weyn uga jira guud ahaan waddamada Geeska Afrika ee
aynu jaarka nahay sida Jabuuti, Eritrea, Itoobiya iyo Suudaan oo
aanay haba yaraatee dalna ka jirin axsaab mucaarid ah.
Guddiga Ilaalada Xuquuqda Aadamiga Geeska Afrika waxay ugu baaqayaan
beesha caalamka, iyo deeqbixiyayaasha doorashooyinka Somaliland, in
cadaadis diblomaasiyadeed lagu saaro xukuumadda joojinta
tallaabooyinka u muuqda minjo-xaabinta nidaamkii curdinka ahaa ee
dimuquraadiyadda Somaliland iyo dastuurkii dumuquraadiga ahaa ee
dalka.
Waxaannu ugu baaqaynaa xukuumadda Somaliland inay si degdeg ah u
joojiso falalka xadgudubyada qorshaysan ah ee sifaha sharci-darrada
ah ugu xidh-xidhayso shacabka, gaar ahaan kuwa dawladdu dareento
inay siyaasaddeeda ka soo horjeedaan. Weriyaha haatan sifo
sharci-darro ah ugu xidhan dalka waxa magaciisa la yidhaa
Cabdillaahi Xasan Darwiish oo magaalada Ceerigaabo uga soo warrama
wargeyska OGAAL, shabakadaha internetka ee Qarannews iyo
Hadhwanaagnews, waxaana weriyahaas Sabtidii doraad lagu riday xukun
aan sharciga waafaqsanayn oo hal sanno oo xadhig ah, lix bilood oo
mihnadiisa laga xayiray iyo ganaax dhan 400,000 shll. Weriye
Darwiish ay ciidammada booliska Ceerigaabo bishan 14keedii xabsiga u
taxaabeen, kadib markuu qoray warbixin uu kaga hadlayo musuqmaasuq
ku dhex baahsan habka loo maamulo Wakaaladda Biyaha ee magaalada
Ceerigaabo
Tilmaanta keli ah ee dimoqraadiyadda Somaliland ka jirtaa waxa
kaliya oo ay ahayd saxaafadda xorta ah ee dalka ka hanaqaaday tan
iyo 1991kii, nasiib-darro waxay wariyayaasha iyo hawlwadeennada
saxaafadda madaxabannaani bartilmaameed u noqdeen tacadiyo ay si
joogto ah ula bar-tilmaameedsadaan hay’adihii u xilsaarnaa in iyagu
ilaaliyaan xuquuqda muwaadiniinta.
Nasiib-darrada kale ee ka jirta Somaliland waxay tahay in
saraakiisha xukuumadda ee geysta xadgudubyada xuquuqda aadamiga ay
ku naaloonayaan awoodda iyo shaadhka dawladnimo oo uga ah xijaab
adag oo ka hortaagan in dunuubta iyo gabbood-fallada xuquuqda
aadamiga ee ay ku kaceen wax laga su’aalo, caddaaladdana la horgeeyo.
Guddiga Ilaalada Xuquuqda Aadamiga Geeska Afrika waxay ugu baaqayaan
ergada haatan wada dhammaynta khilaafka iyo qalalaasaha siyaasadeed
ee ka dhex oogan xukuumadda iyo mucaaridka dalka in arrimaha
wadahadallada bud-dhigga u ah ay ka mid noqoto xaaladda liidata ee
xuquuqda aadamiga Somaliland ku sugan yahay iyo wax-ka-qabashadeeda.”
Source: Jamhuuriya Online
|