Hadii lakala go'ay macnaheedu ma aha la isuma talaabi karo,Madxweyne Xigeenka SL

Sheekh Shariifna waxa aanu u aragnaa ninkii kala guri lahaa Somaliland iyo Somalia Xukuumada Somaliland ayaa soo dhawaysay Madaxweynaha cusub ee loo Cumaamaday Dawlada ku Meelgaadhka ah ee Koonfurta Wadanka Somalia.


Madaxweyne ku xigeenka Jamhuuriyada Somaliland oo ah Masuulka labaad ee ugu sareeya Qaranka ayaa sheegay in Madaxweyne Sheekh Shariif uu yahay Siyaasi qunyar Socod ah oo wax badan ka bedeli kara Fikrada ah in Somaliland aanay ka goí Karin Wixii la isku odhan jiray Jamhuuriyadda Somaliland, sidaasi darted buu Madaxweyne ku xigeenku tilmaamay in uu Sheekh Shariif la jaan qaadi karo Rabitaanka Somaliland.


Hadalkaasina waxa uu Madaxweyne ku xigeenku kaga tiraabay Xaflad Qado sharaf ah oo uu la yeeshay Qurba jooga reer Somaliland, gaar ahaana xubnaha iyo taagerayaasha Xisbil-xaakimka UDUB.


Waxa kale oo Md. Yaasiin intaa ku daray in dadka walaalaha ah ee Afka Soomaaliga ku hadashaa aanay sinaba ku kala maarmi Karin, balse la fahansiiyay sida uu yidhi fikrad khaldan oo lagu kala fogaynayo dadka.


Mar uu Madaxweyne ku xigeenku ka hadlayay Sida uu u arko Shakhsiyada Sheekh Shariif iyo Siyaasadiisa, waxa uu yidhi "Waxaan rajayn ka filayaa Maamulka Qabsaday Koonfurta wadanka Somalia, waa Dhalinyaro Cusub oo da'dii talinaysay 1960-kii meesha way ka baxday, da'daasi waa da'ciil qabta oo siyaasad badani soo dhex martay".ayuu yidhi Madaxweyne ku xigeenku,


Isagoo ka hadlaya sida uu Sheekh Shariif u arko Qadiyada Madaxbanaanida Somaliland iyo gooni isu taageeda, waxa uu Madaxweyne ku Xigeenku hoosta ka xariiqay in Xukuumadda Somaliland iyo Shariifku wax badan iskala meel dhigi karaan arrimaha Somaliland, isla markaana uu rajaynayo in is faham badani ka dhalan karo, isagoo arrintaa ka hadlayana waxa uu yidhi "Waxaan filayaa Shariifku inaanu Arrinka Somaliland iyo Somalia si fiican u kala guri doono, Dabcan Soomaali kala maarmi mayso, oo Cid xad xidhaysa iyo kala oodaysaa ma jirayso oo sidaa Yurub baa la noqon doonaa, Qolo waliba horta inay dib isu soo dhisto oo dib u muuqato, nina laga celin mayo Hargeysa nina Xamar laga celin mayo.

Dadka khalad baa la fahansiiyay oo la yidhi xad baa la xidhaya oo nina soo gudbi mayo, taasina waa waxa dadka lagu kala fogaynayo, dadku waa dadkii uun laakiin sidaa Yurub wax u kala leedahay baa aanu annaguna wax u kala yeelanaynaa, dadkuna sidaas bay isu dhex soconayaan" , sidoo kale qadiyada Somaliland ma aha mid mugdi gali karta, mana aha mid dib looga laabanaayo, jiritaanka Somaliland waa muqadas, hadaba Somaliland waxa ku sugan oo ka ganacsada dad u dhashay dalkaasi aynu isku biirnay 1960kii, kuwaasi oo aynu xornimadeenii kala soo noqonay 1991'kii, markaa taas macnaheedu ma aha in Somaliland ayna cidna iman karin oo ka ganacsan karin, ee hadaba dad badan ayaa noo marti ah ayuu yidhi madaxweyne ku xigeenku


Xukuumada Somaliland oo aanu hore iyadu waxba uga odhan Mawqifkeeda ku aadan sida ay u aragto Maamulkan cusub ee loo dhisay Somalia, ayaa Dhawaaqan ka soo baxay Madaxweyne ku xigeenku waxa uu daah furay hadafkeeda siyaasadeed ee ay kula macaamiloon karto Somalia oo beesha Caalamku u aragto inay tahay Dhimbiil ka dhex oogan mandaqada geeska Africa.


Hore ayaa Axsaabta Qaranku uga hadleen sida ay u arkaan Madaxweynahan cusub ee Somalia, taasi oo ay soo dhaweeyen, balse uga digeen in uu ku dhaqaaqo dhabihii ay hore ugu hodmeen hogaamiyaashii ka horeeyay.



Madaxweyne ku xigeenku waxa aad uga hadlay oo xusay in wadamada dariska ah ay kula noolaan doonaan nabad oo ay ku jirto Somalia.


 

Qarannews