Gud.
Hore ee Jaaliyada Somaliland oo ku Biiray
Xisbiga UDUB, Si Weyna u Dhaliilay Xisbiga KULMIYE
Gudoomiyihii Hore ee Jaaliyada
Ingiriiska Somaliland Maxamed Axmed Xirsi ayaa si ba’an u weeraray
kuna tilmaamay mid dalka khalkhal galinaysa arrinta uu dhawaan
xisbiga Kulmiye sheegay in hadii ay ku guulaystaan talada dalka ay
samayn doonaan Raysal Wasaare,
isagoo ku tilmaamay mid ka soo horjeeda sharciga iyo dastuurka dalka
u yaala, waxaana uu sheegay in markii Somaliland xornimadeeda la soo
noqotay ay isku dayday in qaab Raysal wasaare la sameeyo laakiin uu
khalkhal ka dhashay ta uu xisbiga Kulmiye ku socdaana ay tahay taas.
Maxamed Axmed oo ah Gudoomiyihii hore Jaaliyada Somaliland ee dalka
Ingiriiska ayaa sidaasi ka sheegay shir jaraa’id oo uu shalay ku
qabtay Hotel Imperial, waxaana uu hadalkiisii ku bilaabay “Horta
hadii qofku u soo fadhiisto inuu hadlo wax khayr ku jiro ayuu dadka
u tilmaamayaa ama wax belo ku jirto ayaa ka digayaa, maantana waxaan
doonayaa inaan dadka uga digo wixii shacbiga dhibaato ku ah”.
Maxamed Axmed Xirsi isagoo hadalkiisa sii wata waxa uu yidhi
“Halista ugu badan ee maanta Somaliland haysataa maaha wax dibeda ka
yimid ee waa iyada gudaheeda, oo ah caqli xumaanta xisbiyada
mucaaradk ah sababtoo ah marka xisbiyo la sameeyo, xisbiga dawlada
hadii dadkuba ka qancaan in ay helaan mid kale oo badali kara
ujeedada loo samaystayna taa weeye, sidaa daraadeed xisbiyadan
mucaaradka ahi may noqon kuwo macquul ah oo bedali kara dawlada
maanta taagan wax kastaba halagu dhaliilee ta ugu waynina waxa weeye
waxay doonaan haka hadlaane, intay doonaan ha caytamaane ama ha
hanjabaane, waxay isku raaceen oo ay yidhaahdeen waxaanu samayn
doonaa Raysal Wasaare ayay soo qaadeen, qodobka ugu halista badanina
waa taa. Afrika wadan Alle wadan lagu shaqeeyay ma jiro sababtoo ah
way ku baa’ba een Soomaaliyadiina habkaasaa la qaatay oo waatii
shaqayn wayday”. Maxamed isagoo ka hadlaya in markii Somaliland la
soo galay laysku dayay in la sameeyo Raysal Wasaare laakiin uu dalka
khalkhal galin gaadhay waxa uu yidhi:
“Inagu dhexdeena markaynu isku soo noqono dhawr jeer baa la soo
dhigay badka in Raysal Wasaare la sameeyo, markii inoogu horaysay
waxay ahayd shirkii Burco ee 1991, markii dalka SNM soo gashay oo ay
dadku faraxsan yihiin ayaa shirkii Burco lagu qabtay la keenay
Rayigaa Raysal wasaare-nimada in la sameeyo oo xukunkii ayaa laysku
qabsaday markaa Madaxweynaha waxaa loo doortay Alle ha u naxariistee
C/raxmaan Tuur,Iyo Xasan Ciise Jaamac oo madaxweyne ku xigeen ahaa
ayaa halkii loo dhaqaaqi lahaa aaya ka talinteena iyo sidii aynu u
soo guri lahayn qaxoontigeena jooga Daroor iyo Dulcad oo ahayd
waliba markii aynu ku dhawaaqnay gooni isu taaga Somaliland ayaa
laysku qabsaday Burco dhexdeeda Raysal wasaare hala sameeyo iyo yaan
la samaynin, kooxdaa maanta Kulmiye dhex fadhida ee arinkaa ku
dhawaaqdayna waxaan leeyahay mashaakilkii ka dhacay waad ogaydeen
waana laga yimid lagumana qancin in dawaladaa halkaa laga dhiso
markaa waxa uu C/raxmaan Tuur sameeyay dawlad isku dhaf ah oo ay
dhibaatooyin badani ka dhasheen oo uu Burco dagaal ka dhacay Berbera
dagaal ka dhacay, ilaa markii danbe laysula kacay Boorama oo xitaa
halkaa lagu soo hadal qaaday oo cod loo qaaday oo la diiday, maanta
ayaynu hadana maqlaynaa dhawr iyo toban sanadood dabadeed wadanku
Raysal wasaare ha yeesho iyo nidaam”Maxamed isagoo hadalkiisii wata
waxa uu yidhi “Waxaan qabaa anigu xisbiyada Mucaaradka ah gaar ahaan
Kulmiye in aanay ujeedadiisu ahayn sidaasaanu samaynaynaa waxay
ogyihiin in aanay doorashada helayn ay wadamada caalamka
maqashiiyaan iyo deeq bixiyayaasha waxaanu dhisaynaa dawlada wadaag
ah, taasina waxay keenaysaa in wadanku khalkhal galo oo ay taladu
inaga wareegto oo gacanta ka baxdo, saddexda xisbi dastuurka waxa
ugu qoran hal dheeri ninkii helaa madaxweyne noqonaya markaa taa
hala raaco”.
Ugu danbaytiina waxaa halkaasi lagu waydiiyay su’aalo waxayna u
dhaceen sidan:
S: Hadii laga helo xisbiga talada haya ee UDUB oo uu qabsado Kulmiye
ama UCID ma waxaad leedahay waynu baa’ba aynaa oo waxaynu noqonaynaa
sida Soomaaliya?
J: nimanka yidhi Raysal Wasaare ayaan samaynaynaa oo dastuurka
ayaanu bedelaynaa oo aanu kala daadinaynaa sida Empegathi ayay inagu
wadaan markaa waxaan leeyahay kii idiin fiicnaada doorta ee aan wax
dhibaato ah idiin keenayn
S: dadka ma waxaad ku guubaabinaysaa Daahir Rayaale iyo Xisbigiisa
ayaa si fiican dalka u haga sida aragtidaada ah ee ugu celiye?
J: Xisbiga UDUB wuxuu dhaamaa hindisaha la soo dhigay ee la soo wado
S: Axmed waxaad sheegtay in qaabkan Raysal wasaaraha ah uu dalka
carqalad galinayo, xisbiguna islamuu soo qaadin shirarkiisii uu
qabsaday ee waa soo jeedin markaa maxaad u leedahay dalka ayuu
carqalad galinayaa miyaanuu xisbigu soo jeedinta xaq u lahayn?
J: horta xisbigu wuxuu doono ayuu soo bandhigi karaa, aniguna waxaan
naqdiyaa uun soo jeedintooda, laakiina arintooda ayaa u muuqata mid
aan sharci ku socon oo dastuurka dadka ku socon.
S: Axmed waxaad ka mid ahayd siyaasiyiinta Xisbiga Kulmiye, imika
shirkaagan Jaraa’id waxaad aad ugu dufaacaysaa Xisbiga UDUB, ma
waxaad u jeedaa waxaan ku biiray xisbiga UDUB?
J: haa xisbiga UDUB ayaan ku biiray, laakiin markii hore Kulmiyaan
ahaa.
Saxansaxo news
|