Gudoomiyaha Xisbiga kulmiye oo jawaab ka bixiyay talaabada Madaxwayne Rayaale ku Soo celiyay Ilhaan Maxamed Jaamac oo ahayd Xubintii Ay U Xuleen KDQ Ee Cusub.
 


Mudane Madaxweyne waxaan kaa rajaynayaa in laga fogaado wax kasta oo caqabad ku noqon kara habsami-u-socodka heshiiskii lixda qodob ka koobnaa...
Hargeisa (Longlivesomaliland News)-Guddoomiyaha Xisbiga Mucaaridka ah ee Kulmiye Mudane, Axmed Maxamed Maxamuud(Siilanyo) ayaa maanta waraaq u diray Madaxwayne Daahir Rayaale Kaahin taasi oo Nuxurkeedu ahaa in ka xun yahay in Madaxwaynuhu uu soo celiyo Marwo Ilhaan oo ah gabadh uu xisbigiisu u magacawday in ay ka mid noqotay ama ay ku fadhiisato kursiga uu Xisbigoodu ku leeyahay Komishanka Doorashooyinka Qaranka Somaliland.

war-saxaafadeed uu arintaasi kaga hadlayo Guddoomiyuhu ayaa waxa uu u qornaa sidan:


Mudane Madaxweyne,

Tixraac warqaddaada sumaddeedu tahay JSL/M/GXK/009, ee ku taariikhaysan 10/10/09, kuna saabsan soo celinta dhinacaaga ka timi ee Xubinta Xisbiga KULMIYE u soo xulay KDQ Marwo Alhaan Maxamed Jaamac.

Haddaba, Mudane Madaxweyne, kuma hayno shuruucda dalka meel awood kuu siinaysa inaad kala shaandhaysid xubnaha loo xulayo KDQ, taasoo cidda keliya ee sharcigu awood u siiyey tahay Golaha Wakillada JSL.

Sida ku cad waraaqdaada xogta aad u cuskatay inaanay Xubintaasi (Ilhaan) buuxin shuruudaha, maaha mid ku salaysan xog-ogaalnimo

Laga bilaabo Shirweynahayagii Hargeysa March, 2008, iyo kii Golaha Dhexe ee Xisbigayaga Burco August, 2008, waxa jira xubno muhiim ah oo ka mid ahaa Guddiga fulinta iyo Golaha Dhexe ee Xisbiga oo ka tegay Xisbiga, kuwaas oo qaarkood Ururo furteen, qaarkoodna Xisbigaaga ku biireen, qaar kalena danohooda gaarka ah uga tageen Xubinnimadii Xisbiga, kuwaas oo ay ka mid ahayd Ilhaan Maxamed Jaamac, eeg lifaaqa la socda qoraalkan.
Mudane Madaxweyne, waxaan kaa filayaa inaad ku qanci doonto qoraalkeygan.

Sidoo kale, Mudane Madaxweyne waxaan kaa rajaynayaa in laga fogaado wax kasta oo caqabad ku noqon kara habsami-u-socodka heshiiskii lixda qodob ka koobnaa.

Waxaan kaa rajaynayaa inaad Xubnaha Komishanka sida ugu dhakhsaha badan ugu gudbiso Golaha Wakiillada si ay waajibaadkooda sharci uga gutaan.



Wa Billaahi Tawfiiq


Md. Axmed Maxamed Siilaanyo
Guddoomiyaha Xisbiga KULMIYE

Xarunta Dhexe ee Xisbiga KULMIYE
Somaliland, Hargeysa