Guddoomiyaha Golaha Wakiillada oo Saluug ka Muujiyey Xidhiidhka Somaliland iyo Jabuuti

“Anigu ma dareemayo isbeddel badan oo xidhiidhkii Somaliland iyo Jabuuti ku yimi, Waayo gacan dawladeed oo kaalmo muuqato ah iyo taageero siyaasadeed midna kama helno Jabuuti”


Guddoomiyaha Golaha Wakiillada

Guddoomiyaha Golaha Wakiillada Somaliland Md. Cabdiraxmaan Maxamed Cabdillaahi (Cirro), ayaa saluug ka muujiyey xidhiidhka somaliland iyo dalka jamhuuriyadda Jabuuti oo uu sheegay in aan Jabuuti kaalintii looga baahnaa ee siyaasadeed iyo caawimaba ka qaadan Somaliland.


Guddoomiyaha Golaha Wakiillada Md. Cabdiraxmaan Cirro oo xalay u waramayey weriye Maxamed Cabdi Ilig oo ka tirsan telefishanka madaxabannaan ee HCTV, waxa uu sheegay inuu aad u soo dhaweynayo, isla markaana arrin lagama maarmaan ah ay tahay in Somaliland xidhiidh wanaagsan la yeelato waddamada jaarka ah, balse xidhiidhka Jabuuti aannu ugu muuqan mid heerkii la doonayey gaadhay.


“Kolayba waddamada aynu jaarka nahay ee Jabuuti ka mid tahay in aynu xidhiidh wanaagsan la yeelano waan qabaa, inuu meel fiican gaadhana waan jecelahay, laakiin anigu ma dareemayo isbeddel badan oo xidhiidhkii Somaliland iyo Jabuuti ku yimi, waxaan jeclaan lahaa xidhiidhkaasi inuu noqdo mid sii xoogaysata. Waxaad moodaa gacan dawladeed oo kaalmo muuqato ahna kama helno Jabuuti, taageero siyaasadeed oo muuqatana kamaynu helin, laakiin in xidhiidhku dee laba dal oo walaalo ah oo jaar ah oo aad isugu sii dhaw inuu noqdo way fiican tahay, welise iima muuqato isbeddel ilaa hadda muuqda oo yimi,” ayuu yidhi Guddoomiye Cabdiraxmaan Cirro.


Guddoomiyaha Golaha Wakiilladu waxa kale oo uu sheegay in looga baahan yahay xisbiyada iyo xukuumaddaba inay dhaqangeliyaan go’aamadii guddiga dhexdhexaadintu ka soo saartay khilaafkii siyaasadeed ee dalka ka jiray.


Md. Cirro waxa uu xusay in aan ilaa hadda Golaha Wakiillada loo soo gudbin go’aamada guddigu soo saartay si uu u meelmariyo, balse uu soo dhaweynayo go’aamadaasi.


Waxa kale oo Guddoomiyuhu nasiib-darro ku tilmaamay in aan xukuumadda Somaliland ilaa haatan Golaha Wakiillada horkeenin heshiisyo shisheeye oo ay la gashay shirkado, kuwaas oo shirguddoon ahaan marar badan ka codsadeen soo gudbintooda.


“Heshiisyo intii aannu Golaha Wakiillada joognay xukuumaddu gashay oo golaha loo keenay ma jiraan, mararka qaarkoodna way jireen qoraalo aannu xukuumadda u qornay ama codsiyo aanu u gudbinay, laakiin ilaa hadda wax arrintaasi nooga yimi ma jiraan.


Xukuumadda waxa dastuurku ku waajibinayaa arrintaas inay keento, kolay markii ugu damaysay arrintaas fadhi ayey ka yeesheen xukuumadda iyo Shirguddoonka goluhu, arrintaas in aannu fadhi kale oo gaar ah ka yeelano ayaa noo qorshaysan, si aannu arrintaas isula eegno,” ayuu yidhi Md. Cirro.


Guddoomiyaha Golaha Wakiilladu waxa uu qiray inay ku guul-darraysteen in fadhiyada goluhu shaqeeyo maalintii 6 ilaa 8 saacadood.


 

Jamhuuriya Online