|
Gabiley iyo Gu'yaal Tegey
Qaybtii siddeedaad:
Kulanti wacan walaalayaal, waa mar kale iyo taxanaheennii la
magacbaxay; " Gabiley iyo gu'yaal tegey".
Qaybtan waxaynu kaga hadli doonnaa - haddii Eebbe idmo- dhawr qodob
oo ay ka mid yihiin:
hor-u-markii uu iskuulkii Timacadde sameeyey intii u dhaxaysay
sanadihii 1976 kii illaa 1980kii oo dhinacyo badan lahaa. Sida:
korodhka ardayda - gaar ahaanna gabdhaha
Arday badan oo degaanka labadii degmo ee Gabiley iyo Boorama ka
baxsan oo iskuulkii soo galay
Iyo dhalanrogan ama isbedel hooynimada iskuulka saamayn weyn ku
yeeshay oo dheeynimo ah (as a day School).
Haddii aynu ku horrayno dhinaca hor-u-marka ee iskuulku sameeyey
muddada aynu korka ku soo xusnay, waxa la odhan karaa; wuxu sameeyey
hor-u-mar dhinacyo badan leh. Waxana la tilmaami karaa oo
talaabooyin waaweyn ahaa, dhismayaal lagu soo kordhiyey oo loogu
talogalay; in lagu barto farsamada gacanta, xidhiidho booqasho
(visits) oo ay iskuulka ku yimaadeen dhawr jeer labada iskuul ee
sheekh Bashiir ( Burco) iyo dugsigii sare ee Sheekh. Iyo ardayda
Timacadde oo iyaguna bishii Feebarwari 1980kii booqasho qaadatay lix
maalmood ku soo maray labadaa iskuul ee aynu korka ku magacoownay.
Booqashooyinkaa waxa ibafurkood lahaa oo aannu abaalweyn ugu haynnaa,
iskuulka Sheekh Bashiir ee Burco oo na soo booqday markii ugu
horraysey 1979kii!
Dhinaca ardayda iyo qaabdhismoodkoodii waxa ku dhacay isbedel weyn.
Labadii kooxood ugu horreeyey ee iskuul soo galay, waxay ahaayeen
arday ka timid labadii degmo ee Gabiley iyo Boorama- inkasta oo ay
markii dambe badhxeen arday soomaaliyeed oo ka kala yimid meelo kala
duduwani.
Ardayda markii dambe Timacadde soo gashay, waxay ka koobnaayeen baa
la odhan karaa saddex qaybood oo kala ahaa: kuwo ka yimid labadii
degmo ee caadiga ahaa, kuwo ka yimid gobolada kale oo is reer
bariyaysan jirey iyo kuwo ka soo jabay Kililka shanaad dagaalkii
1977kii -kuwaasi oo iskuulka ku dhigan jirey samofal (welfare).
Haddii aynu jaleecno dhinaca hooynimadii iskuulka iyo isbedelka ku
dhacay, waa tii aynu ku soo sheegnay qaybtii toddobaad; in arday
ardayda reer Gabiley ka mid ahi dheey (day) ku dhigtay iskuulka-
bilowgii 1977kii. Haddaba intii dhacdadaasi ka dambeysey, ardaydii u
dhalatay magaalada Gabiley gudaheedu waxay xaqiiqsadeen, in iskuulka
dheeynimo (day) lagu dhigan karo! Maalintaa kadibna, dhammaan
ardayda magaaladu -in yar mooyaane-waxay iskuulka iman jirey subaxii,
waanay ka rawixi jireen!!
Waxa iyana guul lama iloobaana ahayd, tirada gabdhaha iskuulka
dhigta oo sanad walba kordhi jirtey!
Waxaynu odhan karnaa, soo badashadaa gabdhuhu waxay ahayd; riyadii
odayaasha reer Gabiley oo Ilaahay u rumeeyey!! Alxamdu lilaahi...
La soco qaybaha kale ee qormada oo aynu diirada saari doonno -
haddii Ilaahay idmo- dhacdooyin kale oo xiiso iyo xasuusba mudan.
Wa bilaahi At-towfiiq
C/llaahi Maxamed Cumar
Email:
timacadde56@Hotmail.com
|