Feysal Cali Waraabe iyo xubnaha Golaha dhexe oo sheegay inay xilka ka qaadeen sagaalkii xubnood ee ka tirsanaa guddida fulinta ee dhawaan Hogaanka cusub ku dhawaaqay

Hargeysa (TNN)-Iyadoo labadii maalmood ee ugu dambeeyayba Khilaaf culus ka dhex aloosnaa Hogaanka sare ee Xisbiga UCID ayaa maanta Guddoomiyaha Xisbigaasi Eng: Faysal Cali waraaba waxa uu Magaalada Hargeysa ka furay shirweynihii Afaraad ee Golaha dhexe ee Xisbiga Ucid, kaasoo saaka ka furmay Hoteelka Scandanevian ee Magaalada Hargeysa.

Shirweynahan oo ay ka oo qayb galeen 107 Xubnood kk ka mid ah Golaha dhexe eeXisbiga UCID , waxa sidoo kale Xilkii lagaga qaaday Sagaal xubnood oo ka mid ah Guddida Fulinta ee Xisbigaasi, kuwaasoo Guddoomiye Faysal Cali Waraabe ku eedeeyay inay jabiyeen Qodobo ka mid ah Xeerarka Xisbiga u yaala.

Waxaanu Xubnahaasi qaarkood ku bedelay Siyaasiyiin kale oo iyagu ku cusub Xisbiga, isla markaana buuxin doona Jagooyinka ka banaanaaday Guddida Fulinta ee Ucid.

Xubnahahan uu Eng: Faysal Cali Waraabe Dibada uga saaray Xisbigiisa oo ay ka mid yihiin, Guddoomiye ku-xigeenkii koowaad Aadan Mire Waqaf, Xoghayihii Guud Muuse Xaaji Maxamed (muuseInji), Afhayeenkii Xisbiga ucid Xasan Xuseen Codyare, Guddoomiyaha Golaha wakiiladda C/raxmaan Cirro iyo shan Xunood oo kale, waxa sadex ka mid ah lagu Bedelay, C/lahi X. Cumar Jawaan oo uu u Magacaabay Guddoomiye ku-xigeenka Kowaad, C/qani Garaad Maxamed cali shire Guddoomiye ku xigeenka Labaad iyo Maxamuud Cali Madoobe oo uu isna u Magaacanbay Xoghayaha Guud ee Xisbigaasi.

Guddoomiye Faysal cali Waraabe ayaa markii uu Magacaabay Xubnahaasi, isla markaana uu bedelay sagaalkaasi siyaasi ee uu xil ka qaadista ku sameeyay waxa uu Golaha dhexe ee Xisbiga ka codsaday inay ansixiyaan Saddexdaasi Xubnood, isla meel mariyaan Xil ka qaadista sagaalkaasi kale ee uu bedelay.

Guddoomiyaha Xisbiga UCID Eng: Faysal Cali waraabe waxa kale oo uu shirkaasi maanta kaga dhawaaqay in shirweynihii Xisbigaasi dib loo dhigay wakhti aanu cayimin, isagoo tilmaamay ilaa inta Ururada Siyaasada ee la furay kala baxayaan in shirweynihiii Xisbigaasi dib loo riixay.

Shirkan Golaha dhexe ee Xisbiga UCID Maanta uga furmay Magaalada hargeysa oo hal maalin ah socday, waxa sidoo kale xilalkii lagaga Guddoomiyanimo lagaga qaaday, qaar ka mid ah Guddoomiyayaashii Gobolada ee Xisbiga UCID, kuwaasoo uu xilka xayuubintooda halkaasi kaga dhawaaqay Xoghayaha Arrimaha Gudaha ee UCID Maxamed Ibraahim Aadan.

Waxaanu Mr Aadan jagaayinkaasi u Magacaabay xubnahan:
1-Gudoomiyaha Gobolka Maroodi jeex Mawliid Keyse Muxumed
2-Gudoomiye ku xigeenka koowaad ee Xisbiga Ucid ee gobolka Maroodi Jeex Jimcaale Maxamed Ciise
3- Xuseen Geelle Abokor Gudoomiye ku xigeenka labaad.
4-Xoghayaha guud ee xisbiga ucid ee gobolka Maroodi jeex Qareen Mawliid C/laahi Cumar.
5- Gudoomiyaha Gobolka Togdheer Mustafe Jaamac Xasan
6-Gudoomiyaha Awdal iyo Salal Cumar Daahir Cilmi

Source:Waaheen