Eritrea oo ku Eedaysay Maraykanka inuu Wado
Qorshe Lagu Burburinayo Midnimada Soomaaliya
Xukuumadda Eritrea, ayaa ku
eedaysay dawladda Maraykanka masuuliyadda dhibaatooyinka colaadeed
ee ka aloosan dalka Soomaaliya, kuna hawlan tahay qorshe lagu
wiiqayo midnimada Soomaaliweyn, isla markaana u kala qaybinayo
gobollo kala afkaaro duwan sidii waddamada Balkaniska laysku yidhaa
ee Ruushka ka hoos baxay.
Sidaana waxa lagu sheegay warsaxaafadeed uu shalay soo saaray
Wasiirka Arrimaha Dibadda ee Eritrea, isagoo dawladda Somaliland iyo
Maamul-goboleedka Puntland ugu baaqay inay ku noqdaan midnimadii
Soomaaliweyn, si loo helo cudud midaysan oo Soomaaliya yeelato.
Wasiirku waxa uu intaa ku daray in dawladda Maraykanku hormood ka
tahay tallaabooyin lagu burburinayo qarankii Soomaaliyeed, dabadana
ka riixayo kala googoynta Soomaaliya, isla markaana taageeraya
qaddiyadda Somaliland oo ahayd maxmiyad dalka Ingiriiska ka qaadatay
xorriyadeeda 1960kii, balse si degdeg ah ula midowday Soomaaliyadii
Talyaanigu gumaysan jiray, haddana markale madaxbannaanideeda ku
dhawaaqday sannadkii 1991kii, maamulka Puntland iyo degaanno kale oo
ay ka taliyaan qabqablayaal dagaal.
“Dhibaatada ugu weyn ee aasaaska u ah mushkiladda Soomaaliya waa
dawlad la’aanta 17ka sannadood ka jirtay. Murugadu waxay tahay in
xal la gaadho, lagana fikiri karo ilaa inta ay jireen ficillada aan
ku tiirsashada lahayn ee Maraykanku ku kala qoqobayo Soomaaliya oo
uu sida gobolka Balkaniska ee bariga Yurub ugu kala qayb-qaybinayo
dadka Soomaalida qabiilooyin iyo isirro kala duduwan, xalkuna waxa
uu jiraa soo celinta midnimadii Soomaaliya oo dadku wada dhammaayeen,
haddii ay yihiin Somaliland, Puntland, Jubbaland ama Banadirland,
ayna ku sii fogaanayaan siyaasadda cadowgoodu u maleegayo ee uu ku
kala qoqobayo,” ayuu wasiirku warsaxaafadeedkiisa ku yidhi.
Waxa kale oo hadalka ka soo yeedhay dawladda Eritrea lagu sheegay in
budhcad-badeedda ka dillaacday xeebaha Soomaaliya ay sal u tahay
siyaasadda Maraykanku kula dhaqmayo gobolka ee ku wajahan
kala-qayb-qaybinta ku dhisan danaha gaarka ah.
Ma aha markii ugu horreysay ee maamulka Asmara ku dhawaaqo sida uu u
ayidsan yahay midnimo Soomaaliweyn oo markale dhexmarta Somaliland
iyo Soomaaliyada koonfureed, iyadoo xukuumadda Eritrea lagu tuhunsan
yahay in ay tababarro iyo saanad millateri u fidiso kooxaha
islaamiyiinta mayalka adag ee ka dagaallama Soomaaliya, waxaanay
siyaasaddeedu si weyn uga dhex muuqataa colaadaha dhiigga badan ku
daatay ee dalkaas ka aloosan, sidoo kalena Maraykanka iyo dawladaha
reer galbeedka ayaa ku calaamadiyey Eritrea meel hoy iyo gabbaad u
noqotay kooxaha argagixisada Geeska Afrika ee xidhiidhka tooska ah
la leh shabakadda Al-qaacida.
Jamhuuriya Online
|