Ergadii
KULMIYE Ku Dhex Jirtay Oo Laba Qodob Soo Wadda
Ergadii ku dhex jirtay labada garab ee xisbiga KULMIYE ee isku
khilaafsan natiijadii ka soo baxday shirkii Golaha dhexe ee
xisbigaas Burco ugu qabsoomay, ayaa la sheegay inay hawshoodii soo
gebagebeeyeen.
Ergadaas oo ka kooban siddeed xubnood oo afarba dhinac ka socoto,
waxa ay maalmihii ugu dambeeyay ku dhex jireen kulamo gooni gooni
iyo wada jirba ay ula yeelanayeen labadaas garab, si ay u dhuuxaan
barta uu ka aloosanyahay khilaafaadka siyaasiga ah ee madaxdaas
KULMIYE ka dhex oogani.
Ilo xogogaala ayaa Geeska Afrika u sheegay in ergadu markii ay
dhagaysteen doodaha labada garaba ay diyaariyeen laba qodob oo ay u
arkeen in lagu soo afjari karo khilaafkaad jiitamay, kuwaas oo lagu
macneeyay inay yihiin soo jeedimo.
Inkasta oo aanay ergadu labadaas qodob si rasmi ah u soo bandhigin,
haddana warar xogogaala oo uu Wargeyska Geeska Afrika helay ayaa
sheegaya in nuxurka labadaas qodob kala yihiin in aan dib loogu
noqon oo la aqbalo murashixiintii shirkaas lagu doortay kuwaas oo
kala ahaa Md. Axmed Maxamed Siilaanyo iyo Md. Cabdiraxmaan
Cabdillaahi Saylici iyo in mar kale la qabto shirkii Golaha dhexe ee
xisbiga si waxyaabo kale dib loogu noqdo.
Labadaas qodob oo aan weli si rasmi ah u soo bixin, ayaa la filayaa
in ergadu labada garab ugu soo bandhigto kulankooda u horeeya ee ay
wada jir ula yeelan doonaan oo la filayo inuu qabsoomo labada habeen
ee soo socda. Lama oga jawaabaha ay labada garab ee KULMIYE ka bixin
doonaan labada qodob ee ay ergadu u aragtay in lagu soo afjari karo
khilaafka xisbiga. Laakiin waxa socda kulamo ay labada garaba
siyaabo kala gooni gooni ah ugaga tashanayaan labadan qodob iyo
go’aanka ay ka qaadan doonaan.
Ergadan ku dhex jirtay madaxda sare ee KULMIYE oo isugu jira
aqoonyahan iyo culimo magac ku leh bulshada dhexdeeda, ayaa waxa ay
ka koobanyihiin siddeed xubnood, waxaana hormood u ah Abwaan Maxamed
Xaashi Dhamac (Gaariye), waxaanay magacyadoodu kala yihiin:
Abwaan Maxamed Xaashi Dhamac Gaariye….Guddoomiye
Md. Maxamed Jaamac Cabdi…….Xoghaye
Sheekh Khaliil Cabdillaahi
Maxamuud Ibrahim Axmed (Sandheere)
Cabdi Biixi Taarwale
Dr. Ismaaciil Cali
Cabdillaahi Carab
Shariif Abokor
Source: Wargeyska Geeska Afrika
|