Dhismaha Biriish isku
Xidhaya Degmooyinka Maxamuud Haybe iyo Gacan
Libaax oo la Dhagax-dhigay
Wasiirrada Hawlaha Guud, Duulista
iyo Hawada, Duqa caasimadda Hargeysa, salaadiin, ganacsato,
aqoonyahanno iyo marti-sharaf, ayaa ka qaybgalay xaflad shalay
xadhigga lagaga dhismaha jarayey waddo cusub, isla markaana lagu
dhagax-dhigayey dhismaha biriish cusub oo isku xidhaya degmooyinka
Maxamuud Haybe iyo Gacan Libaax ee magaalada Hargeysa.
Dhismaha waddadan cusub oo cabirkeedu dhan yahay 900 mitir, isla
markaana ay ku baxday lacag dhan $45,000 dollar, ayaa waxa kharashka
ku baxaya 60% bixiyey dadweynaha ku dhaqan Degmada Gacan Libaax,
halka 40% kalena ay wadajir u bixiyeen Dawladda Hoose, shirkadaha
Telesom, Dahabshiil, Daryeel iyo shirkadda badroolka Parymy
Resources, taas oo ay hirgaliyeen guddi iskood isku xilqaantay.
Dhinaca kale waxa isla xafladda shalay lagu dhagax-dhigay dhismaha
biriishka cusub oo ah nooca loo yaqaan Irish Brig, kaas cabirkiisu
yahay 1km, isla markaana lagu inay ku baxdo lacag dhan $200,000
dollar, waxaanna kharashkan ku baxayi doona loo qoondeeyey inay
wadajir u bixiyaan dadweynaha labada xaafadood, ganacsatada,
shirkadaha iyo Dawladda Hoose, iyadoo xafladdaas lagaga codsaday in
cidkasta oo gacan ka geysan karta u furan tahay, waxaanna isla
xafladdaas kaga dhawaaqay inuu bixiyo $20,000 dollar gacansade
Maxamed Siciid Ducaale Dahabshiil.
Duqa caasimadda Hargeysa Eng. Xuseen Maxamuud Jiciir oo xafladdaa
hadal kooban ka jeediyey ayaa xusay in ka dawlad hoose ahaan ay
farax weyn u tahay hirgelinta mashruucan oo uu tilmaamay in
iskaashiga dawladda iyo dadweynaha lagaga soo gudbay dhibaato badan
oo ka hortimi.
“Maanta dadweynihii aad ayey u fahmeen ka qaybqaadashada
horumarkooda, iyagaa bilaaba oo isku xilqaama sidii ay wax uga qaban
lahaayeen goldaloolooyinka dhinaca adeegyada bulshada ah. Annaga ka
dawlad hoose ahaan arrintani hawl culus ayey naga furtay, waayo hawl
annaga markii hore fulinteeda nalooga fadhiyey ayey iyagu wax ka
qabtaan.
Qorshahan wax wadaqabsiga dadka iyo dawladda waxa uu qayb ka yahay
dadaalkii aannu ku samaynay maamul daadajinta, si dadku u fahmaan
wax wadaqabsiga, arrintani way anba qaaday waxaanna laga hirgaliyey
degmooyin caasimadda oo dhan,” ayuu yidhi Eng. Jiciir.
Wasiirrada Hawlaha Guud iyo Duulista iyo Hawada Siciid Sulub iyo
Cali Maxamed Warancadde oo iyaguna xafladdaas hadallo kooban ka
jeediyey, ayaa ku ammaanay guddidan is xilqaantay arrintan ay
qabteen, taas oo ay ku tilmaameen mid qayb weyn ka qaadanaysa
horumarka adeegyada bulshada iyo bilicda caasimadda, waxaanay ugu
baaqeen dadweynaha ku dhaqan deegaannada kale ee magaaladu inay kaga
daydaan.
Wasiirradu waxa kale oo ay ballanqaadeen in dawlad ahaan ay diyaar
la yihiin qaybta kaga soo hagaagaysa hawlahan horumarineed ee laga
hirgalinayo deegaannadaas.
Guddoomiyaha Guddida isu xilqaantay hawshan Mr. Maxamed Cismaan
Faxal, oo isna halkaa hadal kooban ka jeediyey ayaa sheegay in
guddigoodu ay ka kooban tahay laba degmo ee Gacan Libaax iyo
Maxamuud Haybe, iyada oo guddiu jirtay muddo sannad ah waxay hore
uga shaqaysay biyo-galinta xaafadda Ganac Libaax, kadib markii ay
aragtay baahidii biyo yaraan ee ka jirtay xaafaddaas iyo dhismaha
waddada oo gacanta Dawladda Hoose iyo ganacsade Dahabshiil iyo
Telesom oo bilowgii howsha qaabishay.
Mr. Faxal waxa kale oo uu sheegay in guddidu sii shaqayn doono, isla
markaana ay ka howgali doono horumarinta adeegyada bulshada ee
labada degmo.
Sidoo kale, waxa halkaa hadallo koobkooban ka jeediyey masuuliyiin
isugu jirta aqoonyahanno, culamaa’udiin, oday-dhaqameedyo iyo
dadweyne kale oo dhammaantood sheegay inay diyaar u yihiin
gacan-ka-geysashada hawshan.
Dhinaca kale, shakhsiyaad ka tirsan beelayada uu dhexmarayo dhismaha
biriishka isku xidhaya xaafadaha Maxamed Mooge iyo Gacan Libaax ayaa
xafladdaas kaga dhawaaqay inay bixinayaan dhul loo iibiyo
qandaraaska dhismaha biriishkan.
Jamhuuriya Online
|