Dagaalka Afka ee U Dhexeeya Saylici Iyo Wakiilka Kulmiye Ee Awdal Oo Sii Xoogeystay Iyo Jawaabihii U

Dagaalka siyaasadeed ee u dhexeeya musharaxa Saylici iyo wakiilka xisbiga Kulmiye ee gobolka Awdal Aadan Xaaji muxumed Aaye ayaa ka kiciyey xiisad siyaasadeed gobolkaasi, taas oo ka dambaysay kadib markii afar maalmood ka hor booqasho la filayey in wafdi ka socda xisbiga Kulmiye ee taabacsan shirkii Burco go'aamadiisii ay u suurto gali weyday inay Boorama u tagaan hawlo la xidhiidha sidii halkaas xafiiska Gobolka maamul cusub loogu samayn lahaa.
Weeraradan dhinaca afka ah ee la isku adeegsanayo saxaafadda ayaa sidoo kale labadii malmood ee aynu soo dhaafnay cirka isku shareeray iyadoo labadaa maalmoodba uu musharaxa Saylici iyo wakiilka xisbiga ee gobolku midba kan kale aanu waxba ula hadhin marka laga eego waayo aragnimada siyaasadeed, maamulka xisbiga ee gobolka iyo guud ahaanba taageerada ay kala haystaan labada garab ee muranka kulmiye hadheeyey u dhexeeya.

Shalay oo u dambaysay ayaa wakiilka xisbigu jawaab kale ka bixiyey Waraysiyo xidhiidha oo uu musharax Saylici u gudbiyey qaar ka mid ah Wargeysyada.

Waraysiyadaas maalmihii ina dhaafay uu Saylici ku weerarey Wakiilka Xisbiga Kulmiye ee Gobolka Awdal Aadan Muxumed Aaye.

Waraysigan uu shalay 7/10/2008 siiyey wargeyska Jamhuuriya, ayaa waxa uu hoos ugu dhigay taageerada muj. C/raxmaan Aw Cali iyo arimo kale oo uu wakiilku xisbiga kulmiye ee gobolku shalay ka hadlay ama uu jawaab ka bixiyey.

Aadan Xaaji Maxamuud Aaye oo arimaha Saylici kagag hadlay Jamhuuriya waxaa ka mid ahaa oo uu yidhi, "Waa shay caadi ah in qofka aan lahayn waayo aragnimada siyaasadeed uu ka cadhoodo wax kastoo ku saabsan taariikhdiisa iyo taageeradiisa siyaasadeed, waana shay iska caadi ah inuu marba marka ka dambaysa uu sii dhex galo wax siyaasadiisa ceebaynaya, balse uu u haysto inuu ku guuleysanayo. Waa tan koowaade labada qof ee kulmiye isku hayaa maaha C/raxmaan Saylici iyo Muj. C/raxmaan Aw Cali ee waa Axmed Siillaanyo iyo C/raxmaan Aw Cali.

Waxa kale oo Kulmiye isku haya aniga oo ah Guddomiyaha xisbiga ee gobolka Awdal iyo musharaxa Axmed Siillaanyo u magacaabay ee aanu xisbigu isku raacin oo ah C/raxmaan Saylici, Sabantoo ah isma soo gaadhi karaan ama iskuma iman karaan in la yidhaa waxa is haya Saylici iyo C/raxmaan mana aha, lamana odhan karo, arday iyo macallinkiisii ayaa ku tartamaya imtixaan, Mansabka C/raxmaan Saylici shalay joogaa, waa xildhibaan gole degaan, halka C/raxmaan Aw Cali taagan yahayna waa mansabka Madaxweyne ku-xigeen, waxaanay ahaan lahayd arin la odhan karo waa tartan haddii ay isku dhaw yihiin labadaa mansab, ama C/raxmaan Salici soo maro dariiqa saxada ah iyo halganka loo soo maro siyaasadda oo uu xitaa soo gaadho xildhibaan Baarlamaan, Wasiir, ku-xigeen wasiir iwm.

waxa uu ku faraxsanyahay ama guul u haystaa inuu yidhaa waxan ka badiyey C/raxmaan Aw Cali oo uu ku celceliyo, laakiin guusha C/raxmaan Saylici uu sheeganayo waxay dhab ahaan lahayd haddii uu awooddiisa iyo mansabkiisa Kulmiye uu igagaga qaado xilka wakiilnimada xisbiga ee Gobolka, waxaanan kula talin lahaa inaanu iska indho tirin mansabkiisa, xaqiidana u sheego dadkiisa debedda jooga, taageerayashiisa gudaha xisbiga, oo aanu naftiisa u sheegin.

Waxana uu C/raxmaan Saylici ku celceliyaa inuu ka guuleystay Muj. C/raxmaan Aw Cali lana ogyahay khayaaliga Axmed Siillaanyo u sheegay isagoo C/raxmaan Saylici kursiga ama xubiinimada hoggaanka xisbiga ugu iibsaday deeqihii qurbajoogga reer Awdal usoo direen dadkii ku waxyeeloobay duufaanadii sannadkii hore ku dhuftay xeebaha gobolka, waana shay xaaraan ah in dadkaagii oo dhibaataysan aad kursi ku iibsato waxay cuni lahaayeen ama isku daaweyn lahaayeen, sidaasaa Siilaanyan u aaminsanyahay inuu wax kastaba C/raxmaan Saylici u hurayo kursigsiisa muranka badani ka taaganyahay mana soconayso yooyoontan iyo been uu C/raxmaan Saylici ku jaahwareeriyo shicibka reer Awdal ama iskaga horkeeno ee waxan odhan lahaa awoodahaaga, hoggaamiye nimadaada iyo taageeradaada iyo xilka aad sheeganayso in laguu magacaabay ha lagaa arko oo aniga iigu horeysii sidaad kursiga iiga qaadi lahayd waxaan aaminsanahay inaan heshiis loo dhanyahay oo kulmiye la yimaaddo mooyee adiga Axmed Siillaanyaba sheegan karin guulo."

 

Source: Wargayska Haatuf