Ciidamada Booliska
Somaliland Oo Mar Kaliya Rasaas Ay Fureen Ku
Dhaawacay 6-Qof Oo Isku Qoys Ah
Lix qof oo isku qoys ah ayaa
ciidamada Booliska Somaliland Magaalada Hargeysa rasaas ku
dhaawaceen, kadib markii khilaaf dhul ah oo laba qoys isku qabsadeen
Xaafada Sheekh Nuur ee Hargeysa.
Dhacdadan aan la jeclaysan ee ay ciidamada Boolisku ku dhaawaceen
lixdan qof ayaa Af kala qaad iyo anfariir ku noqotay dadweynihii
halkaasi ka ag dhawaa. Aabaha qoyskan oo la yidhaahdo Good Cabdi oo
Weriye ka tirsanaa Wargeyska Haatuf uu xalay ku booqday Cisbitaaka
guud ee Magaalada Hargeysa oo lagu daweynayey dhaawicii dadkaasi
ayaa waxa uu aabahaasi u sheegay weriyaha in shan nin oo Askar ah oo
ay wateen qoys ay meel wado ah isku haystaan uu amarka siiyey
taliyaha Saldhiga Doloodho.
Dadkan rasaasta lagu dhaawacay ee lixda qof ka koobnaa ayaa waxay
kala ahaayeen Maxamed Good Cabdi, Muxumed Aadan Cabdile, Raaxo
Cismaan Yuusuf, Sidiiq Baashe Ibraahim, Gaasira Aadan Cabdule iyo
Aamina muxumed Cabdule, dadkaas oo ay rasaastu meelo kala duwan kaga
dhacday.
Dadkan dhaawaca ah ayaa waxa ugu daran gabadh shan caruur ah dhashay
oo ay Xabadi kaga dhacday beerka magaceedana la yidhaahdo Raaxo
Cismaan Yuusuf.
Aabo Good Cabdi isaga oo arrinta ka hadlaya waxa uu yidhi “Waxa
jirta meel aanu degenahay , oo gebi ahaan wadooyinku ka xayiran
yihiin oo xaafada Sheekh Nuur wadooyinkeeda oo dhami way xidhan
yihiin. Meeshaas oo la yidhi labadiina xaafadood midkiina waxba kama
dhisi kartaan, ayaa ninkii waaxda [Degmada] haystay oo shalay
fasax-qaatay uu ku xigeenkiisi iyo laba masuul oo kale warqad
foojari ah u sameeyeen. Markaas abaaro saaka 6:00-dii [shalay]
ayaanu kana u soo baxnay dhowr iyo sodon shaqaale ah [Kuuli iyo
Wastaad] oo meeshi dhisaya, dabadeedtana waxaan ku idhi waar
meeshani way xayiran tahay ee u kaadiya oo waxba ha ka dhisina,
dabadeedtana waxay igu yidhaahdo warqad fasax ah ayaanu haysanaa oo
na loogu soo fasaxay. Dabadeetana waxaan ku idhi wadada iyo Gurigu
waa kala laba. Wadeynu isku haysanaayee intay dawladu inoo bixinayso
u kaadiya, waanu diiday ninkii meesha dhisanayey oo inta uu cararay
ayuu shan Askari soo kaxeystay. Markay Askartii ka soo degtay gaadhi
uu watay waxay yidhaahdeen [Askartii] yaa dacwad ka qaba meeshan la
dhisayo?, aniga ayaa ka qaba ayaan yidhi [Good] jaarna waanu nahay
oo wadooyinka ayuunba naga dhaxeeya ee wax dhul ah iskumaanu
haysanin.”
Isaga oo hadalkiisa si watana wax uu intaa raaciyey “Waxayna igu
yidhaahdeen waraaq ayaanu wadanaa, ana waxaan ku idhi waraaqdan aad
wadataan maaha mid Sax ah ee waa foojari, ayaan u heystaa, jaarna
waynu nahoo, jaar xumadu ma fiicnee, haddii ay warqadu sax tahay
imikaba aad dhisatid’e waaxda ina gee ha inoo soo kala cadeysee,
shaqaalahana, dabadeed inta uu nin askari ayaa inta uu sidaa ii
riixay oo uu qadaadka I qabtay ayuu yidhi taas ayaa sharci ah oo
lagu dhisayayaa, dabadeed odaygii dhisayey meesha oo sagaashan jir
ah oo aabahay leeka ee aan lahaa wadada ha innaga ooddin ayaa inta
uu Hangool la soo ooday qoorta igaga dhuftay iyada oo ay shantii
Askari weli taagan yihiin, intaa kadibna Askartii Rasaas ayey ooda
nagaga qaadeen anniga oo weli baryaya oo sida wanaagsan ula
hadlaya.”ayuu yidhi Aabo Good Cabdi
Mar Aabo good la weydiiyey cida amarka soo siisay inay rasaasta,waxa
uu yidhi “Waxa soo siiyey Taliyaha Saldhiga Daloodho Bedel Jaamac
Diihaal, markay dhibtaasi dhacdayna waxaanu ku mashquulay gurashada
dadkan dhaaca ah oo ka koobanaa sideed qof . Waxa imika ugu daran
gabadh shan caruura oo Agoon ah haysata oo la yidhaahdo Raaxo
Cismaan Yuuusf oo ay xabadu kaga dhacday Beerka, waxa kalena may
samaynin ee Askarigii oo rasaastii nagu ridaya ayeyku tidhi waar ka
daa Gacantu ku go’adee raasaasta, iyadana waa la huwiyey rasaastii.
Sidii ayanu dhakhtarka ugu mashquulsanayn oo aanu xaafadii kaga nimi
caruur yar yar afar ruux oo xaafada ahna way qabteen oo ay xidheen.”
Si kastaba ha ahaate, ciidamada booliska ayaa caadeystay rasaas
aanay ugu aabo yeelin huwiyaan dadweynaha ku dhaqan Somaliland, taas
oo aany cidina waxba ka soo qaadin, waxaana laga dareemi karaa
masuul darada Ciidamada amaanka.
Hadhwanagnews
|