Cabdillaahi Darawal oo shirkii lagu Doortay Rayaale ku tilmaamay Mid ku dhisan Shimbirayahow Heesa

“ Haddii sacabkii iyo shinbirayow heesadii aad u qaadateen inaad guulaysateen, waxaan idiin sheegayaa in dhuxul dab ah la diin dhiibay, annaguna aanaan ahayn Xaqayaga sidaa kaga hadhi doonin ”

Md. Darawal


Md.Cabdillaahi Xuseen Iimaan (Darawal), ayaa shirkii Md.Daahir Rayaale iyo Axmed Yuusuf Yaasiin loogu doortay murrashaxiinta xisbiga UDUB oo doorashada Maxtooyada ku tilmaamay mid aan sharci ahayn oo ku dhisnaa shimbirayow heesa iyo sacab laga dhawaajiyey dad la soo urursaday.


Md. Cabdillaahi Darawal oo xalay wareysi gaar ah siiyay Jamhuuriya ayaa daba joogay hadal uu doraad madaxweyne-ku-xigeenku ka sheegay laanta Af-soomaaliga ee idaacada BBC-da, kaasoo uu ku tilmaamay in si khaldan loo fahmay.


“Waxaan doonayaa wax yar in aan iftiimiyo wareysigii ay idaacadda BBC-du maalintii dhowayd ila yeelatay, kaas oo aad moodo in dad badan ay si khaldan u fahmeen. Runtii waraysigaasi waxa uu ahaa mid aan qabtay goor hore intii aan laga soo bixin shirku sheegii halkan lagu qabtay.markaa aniga waawaantayddii aan shirjaraa’iidaydii horeba ku lahaa waar xisbiga ha baabinina ee joojiya ayuunbay iga ahayd.laakiin madaxweyne-ku-xigeenka waxaad mooday jawaabtiisu in ay u dhacaysay in aan ahay sidii nindoonaya in uu la hadlo.waxaan u sheegayaa in aanay jirin cid lala hadlayaa iyo wax laga wada hadlayaa toona,” ayuu yidhi Md. Darawal oo faah-faahin ka bixinayay wareysiga uu siiyay idaacada BBC-da iyo jawaabta ka soo yeedhay Madaxweyne-ku-xigeenka.


“Ta kale cidda lala hadlayaa sow adiga [ku-xigeenka] iyo maaha madaweynaha, madaweynaha isaga kibirka waan ku ogaa laakiin waxaan garan waayey adigana goorta kibirku ku galay.


Waxa aad iyo aad layaab u ah inaad tidhi; ‘wey ku degdegeen ilcaaminta murrashaxnimadooda,laakiin waxaad ilowsantahay oo aan isleeyahay malaha kibirkaasaa ilowsiiyey, in labdiinuba bilooyin ka hor in aad sidaa ugu dhawaaqdeen,oo uu madaxweynuhu labo jeer oo uu Yurub joogay iyo mar uu xafiiskiisa fadhiyey uu ku dhawaaqay.oo aad waliba ku xasuusan karto uu raaciyey; yaa iga mudan, markaa sababta kuwiinana shici ka dhigtay,kuwa dadkana sharci-darro ka dhigtay waxaan u arkaa in ay tahay aqoon daro uu keyno nin isla weyn oo aan caadi ahayn.”


Waxa kale oo Mr. Darawal oo uu mid aan aqoon ku dhisnayn u tilmaamay cudurdaar ka soo yeedhay Madaxweyne-ku-xigeenka, kaas oo uu ku sheegay in guddoomiyaha guddiga qabanqaabada ay ku qasabtay in uu noqdo kadib markii ay banaanaatay jagadii uu ka baxay alla ha u naxariistee xoog hayihii hore ee xisbiga UDUB Maxamed Ismcaaiil Bullaale.


“ta kale waxaa tidhi; gudida qaban qaabada waxaad waxa igu kaliftay markii uu dhintay ninkii joogay,halkaa lafteeda waxaan u arkaa in ay ka muuqato aqoon-darro, waayo habka iyo nadaamada caalamiga ah ee maamul, marka uu qofku meesha ka baxo maka ka sarreeya ayaa qabta,misa ka ka hooseeya?


Qof walba aqoon leh wuu garanyaa, ka ka hooseeya ayaa jagadii fadhiista ee ka sarreeyaa ma tago.adigoo murrashaxnimo sheegtay, ayaad haddana ka aqbashay in aad noqoto gudoomiyaha gudida qabanqaaba,oo aad noqotay oo aad soo xulatay ood haddana waxaad soo xulatay kala baqatay dadkii,taasina kalsooni daro ayey muujinaysaa iyo in aydaan qadarkab aaminsanayn.”


Md. Cabdillaahi waxa uu ku tilmaamay shirkii madaxweyne Rayaale iyo Axmed Yuusuf Yaasiin loogu doortay musharixinta UDUB ee doorashada Madaxtooyada inuu ahaa mid aan sharciga waafaqsanayn oo nuxurkiisu ku soo ururayay shimbirayahow heesa, “Waxa kale oo aad soo jeedisay in dadka la soo dhaweeyo, annagu magarayno cidda la soo dhaweenayo, mid inaga dhaxaysana maaha ayaan qabaa, haddii cid la soo dhaweynayo anigu waxaan qabaa in adiga lagaaga soo gurmado dhibaatada ku haysa, taasaanan soo jeedinayaa.


Haddii aad sacabkii badnaa iyo shinbirayow heesadii aad u qaadateen inaad na jiidheen oo aad guulaysateen, waxaan idiin sheegayaa in dhuxul dab ah la idinsiiyey, annaguna aanaan ahayn niman xuquuqdooda sidaa kaga hadhaya,” ayuu yidhi Md. Darawal.







Jamhuuriya Online