Axmed-Siilaanyo oo ka Digay Cawaaqib-xumo ka Dhalan Karta Dib-u-dhac ku Yimaad Doorashada Madaxtooyada

Guddoomiyaha xisbiga mucaaridka ah ee KULMIYE Md Axmed Maxamed Maxamuud [Siilaanyo], ayaa ka digay dib-u-dhac ku yimaadda waqtigii loo qoondeeyey qabsoomidda doorashada madaxtooyada ee la filayo inay dalka ka dhacdo 29-ka March 2009, taas uu xusay inay ka dhalan karto cawaaqib xumo iyo iska horimaad.


Axmed-Siilaanyo waxa uu sidaa kaga dhawaaqay aflad ay asxaabta qaranka iyo Komishanku wadajir ugu saxeexayeen heshiiska xeer-dhaqameedka axsaabta siyaasadda ee diiwaangelinta codbixiyeyaasha iyo sidii looga shaqaynsiin lahaa Seerfarka, ayaa ku tilmaamay in Guddiga Doorashooyinku ay dhib weyn ka soo muteen hawshii diiwaangelinta, isla markaana ay xil weyn iska saareen hirgelinteeda.


"Waa markii ugu horreysay ee hawsha diiwaangelinta aynu fulinay, diiwaangelinta oo aasaas u ah doorashooyinka xorta ah ee hagaagsan, innaga bulshadeena reer guuraaga ah ee soc-socd walaac iyo shaki badan ayaa innagaga jiray inay diiwaangelintu dalka ka hirgeli doonto aad baynu dood uga soo galnay, aakhirkiina aynu goosanay in diiwaangelintaas galno oo duniduna innaga caawisay, deeq-bixiyeyaashu gacan weyn oo dhaqaale iyo farsamaba leh ayay inoo geysteen, laakiin hawsha iyo kharashka qaranka ka gashay ay kun jeer ku soo labanlaab maysay tii deeqbixiyeyaasha."


Guddoomiyaha KULMIYE waxa waxa uu ka digay dib-u-dhac dambe oo ku yimaadda doorashada madaxtooyada Somaliland, "Waxaynu ognahay inta jeer ee doorashadu ay dib u dhacday intay wakhtigeedii dhaaftay, waxay maanta ummaddu u dhegtaagaysaa oo sugaysaa inay timaad doorasho wakhtigeedii ku dhacdaa inay timaad. Waynu ogsoon nahay barigii dhawayd saddex ilaa afar jeer ayey doorashadu dib u dhacday, ummaddu ma xamilayso mana aqbalayo doorasho dib u dhacda, sababta ugu weyni waxa weeye waxa iman doonta xaalad cusub oo hor leh, wakhtigii dhammaaday berigii hore shardiga aynu ku kordhinay wuxuu ahaa inaan muddada dambe ee doorashada laga gudbin, haddii taasi timaadna qulqulatooyin hor leh ayeynu galaynaa. Ilaahay waxaannu ka baryaynaa inay doorashadu waqtigeedii innoogu dhacdo taas ayaan idin kula shaqaynaynaa [Komishinka]," ayuu yidhi Axmed-Siilaanyo.








Jamhuuriya Online