Axmed-Siilaanyo Oo Saaxiib Cusub Ka Samaystay Beelaha Samaroon, Salaankana Ka Tuuray Xiddigii Awdal

Shirkii Golaha dhexe ee xisbiga KULMIYE uga socday magaalada Burco oo shalay la soo gebagebeeyay ayaa lagu doortay labada masuul ee xisbigaas uga qayb geli doona doorashada Madaxtooyada.

Shirkaas Golaha dhexe oo ay fadhiyeen 194 xubnood, ayaa waxa ka dareeray 63 xubnood oo taageersanaa labada murashax ee ku loolamayay jagada Madaxweyne ku xigeenka kuwaas oo kala ahaa Cabdiraxmaan Aw Cali Faarax iyo Axmed Xaaji Cali Cadami. Hase yeeshe 131 xubnood oo shirkaas ku hadhay ayaa cod u qaaday labada murashax ee xisbiga u meteli doona doorashadaas, waxaanay u doorteen Md. Axmed Maxamed Siilaanyo iyo Md. Cabdiraxmaan Cabdillaahi Saylici.

Halaga Daba tago

Md. Siilaanyo, oo hadal ka jeediyay madashii lagu doortay, ayaa waxa uu ku dhawaaqay inuu u hawlgeli doono sidii looga daba tegi lahaa saaxiibadiisa shirka ka baxay ee ay hormoodka u yihiin Cabdiraxmaan Aw Cali Faarax iyo Axmed Xaaji Cali Cadami, waxaanu yidhi, “kuligeena maanta wixii ka danbeeya waxaynu ka wada shaqaynaynaa in aynu raadino, soo celino walaaleheenii sidii ay doonayeen aanay wax ugu dhicin ayaanu raadinaynaa, waynu isa saamaxaynaa markale ayeynu gacanta is qabsanaynaa weynu wada hawl galaynaa.”

Ma Aqbalayno

Hase yeeshe xubnaha shirka ka baxay oo shalay galab shirjaraa’id ku qabtay magaalada Burco, ayaa sheegay inaanay marnaba aqbali doonin natiijadii shirkaas ka soo baxday, iyagoo ku dooday inaanu kooramkii shirkaasi buuxin, “Dorashada maanta dhacday ee halkaasi ka dhacday waxay ahayd doorasho xaaraana mana aqoonsanin waxii ka soo baxayna may ahayn wax sharciga iyo distoorka xisbiga midna ku jirta sidaas oo ay tahay marna ma aqoonsanayno waxa halkaasi ka dhacay waxaanan kuu sheegayaa Anaga nimankayaga halkan joogay waxanu ahayn 107 ergay oo halkan joogay muu buuxsamin kooramkii shirku isagoo ay sidaas tahay ayaa haddana shirkii la afduubay oo la yidhi kooramkii wuu inoo buuxaa ee doorashada gala.’ Sidaas waxa yidhi Mujaahid Cabdiraxmaan Aw Cali Faarax, oo isagu u sharaxnaa jagada Madaxweyne ku xigeenka

Mar la weydiiyay go’aanka ay qaadan doonaan waxa uu yidhi, Cabdiraxmaan yidhi “Talaabada aanu qaadaynaa waxa weeye imika halkan waxaanu ku dhisnay gudi gudidaas taladeda ayaanu sugaynaa oo anagu waxaanu nahay Garab gaara markaa wixii meeshaas ka soo baxay waanu ka tashanaynaa.”

Waxa kale oo shirkaas jaraa’id ka hadlay Dr. Cumar Cilmi Dixood, Md. Axmed Xaaji Cali Cadami oo isna u sharaxnaa jagada Madaxweyne ku xigeenka, waxaanay labadooduba sheegeen inaanay aqoonsan doonin natiijadii ka soo baxday shirkii Golaha dhexe ee xisbiga KULMIYE, “Sidaas si leeg waxaan u arkaa in uu sharci daro yahay wixii ka soo baxayna suuq madaw yahay.” Sidaas waxa yidhi Md. Cadami.

Mujaahid Ibrahim Dhegaweyne, oo isna shirkaas jaraa’id hadal kooban ka jeediyay ayaa yidhi “Idinkuba (saxaafadda) waad arkayseen wixii meesha ka dhacay, shalay waxa la qabtay 14 kaadh oo suuqa lagu soo sameeyay, shir gudoonkana waad waydiin karaysaan meel iska furana go,aan laguma gaadhi karo. Haddii xisbiga cadaalad laga waayay iyadoo banaanka la joogana oo aan tala la qaban cadaalada la helayaa hadhaw way adkaanaysaa waxa wax lagu heli karayaa xisbiguna xisbi ku ahaanayaa marka loo dhanyahay taladiisa ee wixii xalaal ku soo baxana la taageero laakinse talada aan wataaba soconaysa markaa waxaan leeyahay cida ku faa’iida la arki doonee maanta la kala tagye.”

Siilaanyo iyo Cabdiraxmaan

Md. Axmed Maxamed Siilaanyo, ayaa muddooyinkii dambe la sheegi jiray inuu bedelay aragtidiisii siyaasadeed ee ku waajahayd gobolka Awdal, waxaana la hadal hayay inuu Xaaji Axmed saaxiibo cusub oo dhinaca siyaasadda ah ka samaystay gobolkaas, iyadoo la tilmaami jiray inuu mad-madow soo kala dhex galay Md. Cabdiraxmaan Aw Cali Faarax, oo ay jaal ku hayeen halgankii SNM.

Waxaana isfaham waaga Axmed Siilaanyo iyo Cabdiraxmaan Aw Cali ka soo ifbaxay shirkan golaha dhexe ee xisbigaas, markaas oo la arkay in Guddoomiye Axmed Maxamed Siilaanyo Madaxweyne ku xigeen u wato Md. Cabdiraxmaan Cabdillaahi Saylici, oo inkasta oo uu siyaasadda ku cusubyahay ah aqoonyahan qunyar socod ah.

Axmed Maxamed Siilaanyo iyo Md. Cabdiraxmaan Aw Cali Faarax, waxa ay ahaayeen saaxiibo isku aragti dhow marka la eego dhinaca siyaasadda, waxaanay soo wada mareen duruufo kala duwan oo ay ugu adkayd markii ay doorashadii hore ee Madaxtooyada Somaliland ka qayb galleen iyagoo isu ah Madaxweyne iyo madaxweyne ku xigeen. Hase yeeshe muddooyinkii dambe waxa ay u muuqdeen siyaasiyiin sii kala durkaya, waxaana kaalintii Cabdiraxmaan, uu Md. Siilaanyo gashaday Md. Cabdiraxmaan Saylici, oo uu doorkan u wato inuu u noqdo Madaxweyne ku xigeen. Sidaas daraadeed waxa la odhan karaa Axmed Siilaanyo, waxa uu gobolka Awdal ka samaystay saaxiib siyaasadeed oo cusub oo uu ku bedeshay kuwii hore, waxaanu shalay salaanka ka tuuray xiddigii gobolka Awdal caanka ku ahayd Md. Cabdiraxmaan Aw Cali Faarax iyo weliba Md. Axmed Xaaji Cali Cadami, oo doorashooyinki hore ee Somaliland ahaan jiray guddoomiyaha guddiga doorashooyinka qaranka.

Source: Wargeyska Geeska Afrika